I soun restà stupì de veira de rouine roumane souere de sëlle de Suza.
Soun pasà dzot l' arc de Aougousto avei in arc soulèt, ma avei lou cuvert.
Sil.: "Serafin gueita! Te n' anvize que l'avèn leizù sut la gouidda touristica la descrisioun di travalh fèit da li Roumòn. Me pleirit veira asì le ruine de l'arena! Quisà se i fon de counchert?
Ser.: " L' avén pà lou tén de fare tot, inqouéi apré merenda, deven alé charché l' indiris que l' on dounano pèr trouvé l' oubèrgi per stanouèit. Alèn, apré alén pilhese carcaren da beire , i jò bué-z-oure".
Aloura s' encaminnoun din la Plasa Chanoux, andounqoue, dzot li portio, a ièt in baroun de bar è, din lou chumin pedounal, trovoun l' ufissi dou tourismo. Eisì, inna fumèla i mountre le chose ampourtonte da vizité. L' at onca indicaie l' ingleiza de Sant' Ors, li mouzei è coumme fare pèr alé vizité li bèl castél qui soun tot d'antorn, din la valada.
De vepro, soun alà a sina, a mingé lou lard d' Arnad è la foundouà an pasòn, a dreita, sut lou pount de la Douira Baltea. Apré soun alà a éicouté in bèl counchert de in grup loucal qu'ou chantave de vielhe chansoun francoprouvensale.
Lou jorn d'après, l' on dechidù de veira lou mouzeo dou chenovvo avei lou pechit negosio qu'ou vend incò le teile de chenovvo coumme sëlle que se faziòn in col a Graviére, andounque ière Marianin qui travalhave ben avei soun tëlìe.
Si.: "Eicouta na choza, doumòn alèn vizité lou fort de Bard qu'ou smilhe in poc a sal d'Eisilhe!”
Ser.: "Devòn tot, pouriòn pilhé la sejovia que nou mene fin-a an pouinta de la mountanha, i soun trot bèle se crete isì! Aprè voudriò chité quarcarèn de bel da pourté a meizoun"
Sil.: "L'aven pa bezonh d' arèn! Ma pourrion chité inna grolla, in pechit jal de boc, de fountinna è de loze coumme dous, mi sèi in poc groumonda!
Lou marì tén, però, l'a fèit fermé Silvana è Serafin incò in jorn an plut din la sità è apré l'on féit le lour proumenade pian - pianot per d'outre sità è per d'outri castel de la valada per livré ben li lour jorn de vaconsa an Val d'Aousta.