franco-provenzale
Finalmënt ëd co për Mërguitta è i ëst aruvà lou moumënt ëd pìi la patente për gouidà la maquina, parèi è i eu pënsà d’alà a l’aoutoscola. È i ëst gro countënta é è vait a ënfourmase për savé li papé qu’è ventet fà.
Ën prum moumënt è zmiët tout adouërn: è i eu mëc dabezounh doou papé d’identità, lou codiche fiscal, trai foto, lou chertificà dou medic, li versamënt é ën feui da coumpilà. Oh poouvra mè! Ël choze ou ëncaminount a vinì coumplicaië!
Mërguitta è i eu perdù lou papé d’identità, è ventët ërfalou. Alëra quiëlla è vait subit ën coumuna për vè sën qu’è i ëst nechesari.
Mërguitta: “Boundì, madama. Sëi eisì përqué j’ai perdù lou papé d’identità coza j’ai da fà për ërfalou?”
Ëmpiegata: “ È ventët vinì eisì a to trai foto é la diquiarasioun ëd li quërëbinhé qu’è t’istaia faita la denouncha ëd zmarimënt doou documënt “
Courajou! Alëgra Mërguitta è vait da li quërëbinhé a to ën chertificà ëd nashita. Ënt la cazerma ou coumpilount ën papé ëd denouncha é quiëlla è lou firmët. Coume è i ësti pousibil quë li papé un su l’aoutrou ou rizolvount la sitouasioun? Finalmënt! Oura ritirà lou papé d’identità, è i ëst tou’ prount për alà a iscrise a scola gouida.
Mërguitta è i ëst geu bèle stoufia ëd girà da ‘na part a l’aoutra, ma soun pari ou rit.
Pari: “Veu veu! Lamentete nhint quë t’è meuc a l’inisi! Pënsa a cant è touchët poi a te ocupatë ëd l’ICI, li boul, ërz asicurasioun, la diquiarasioun ëd li redit…é via dëscourënt!”.