Min car amis, oura vou portou a vè la mia bèla queu.
È i ëst propi ënt ‘oou chentro ëd la frësioun, ma ‘na briza dëstacaia d’arz aoutrë queu, a to ‘na bèla vista su l’ëndrèt ëd la valada.
È i ëst ‘na queu viëi quë min pari ou i eu bin rëngìa për adatala al neuve ezijensë ëd la vita. Aou piënteren è i eu lou bèou ëndoua ou ‘s trëvount ël nostre dès vachë é la crota ëndoua butèn ël toumë për stëjounalë. Aou prum piën g’èn la cuzina, ërzë steunsië é lou banh, a to ‘na bèla lobia qu’è paset ëdavant a toutë zë stënsië. A l’ultim piën è i eu lou soulé, ma oura ou i ëst istà trësfourmà ënt una stënsia ën più. Lou cuert ou i ëst fait ëd lozë, pougìë su li trà ëd maleujjou. Dzëri aou cuert ou i eu ën fumé ëd pèra, ou i ëst bèl gro, për schaudà touta la queu. Tou’ lou bosc ëd la queu, tra é pavimënt, portë é fënestrë, ou sount tuiti ëd malëjjou, përqué ou i ëst l’unic bosc cou gamolët nhint. La choza qu’ëm piait ëd più ëd mia queu è i ëst quë min pari ou i eu mëntunù li mu ëd pèra a vista, për fourtuna ou i eu nhint ënchoousinà coume è alavët ëd moda trënt’an fë.
Vouz ënvitou a pìi ën café ënt la mia grosa cuzina é magara mingèn ënsémbiou poulenta é friquëndò coit zla stua ënt ‘oou peiruël dla nona. G’èn ëd co la cuzina a gas ëndoua mia mari è fait da mingì tui’ li dì për touta la famìi.
A dinà nhint sémpër è i eu touta la famìi, ma për sina nou setèn tuiti ënsémbiou ëntourn a la viëi taoula doou biznonou. Ënt la mia stënsia j’ai touì li mobil ëd famìi: lou ìit ëd mia nona da jouvën, ën tëoulin doou biznounou, lou gouërdaroba doou nonou…ma è i ëst ëd co ‘na stënsia moudèrna a to lou coumpiouter, la stampant, l’impiant stereo é j’ai ëd co la wii.
Ël lozë, lou cuert, lou soulé, lou fumé, la lobia, l’us, la fënèstra, la crota |
