Li min amis Jacou, Jouan é Mariéta ou sount vinù, peur lou prum vì, da Bessans, për pasà ‘na zmana ëd vaquënsi eisì ënt ël Valadë
Jouan “Sëi gro countënt ëd vè lou toun pais. Ën qué valada sèn?”
Meurguitta: “Sèn ënt lë Valadë ëd Lën, trai ëd lë valadë francoprouvensal doou Piémount. Ou sount valàdë strètë é loungë a to valoun a l’ëndrèt é a l’ënvèrs.
Mariéta: “eisì sèn a li Catèl, just?”
Meurguitta: “Sè, li Catèl ou sount ‘na frësioun doou coumun ëd Mizinì, lou più bèl doou moundou”
Jouan: “Coza qu’è i eu ëd si bèl? Tè ëm lou fà vizità?
Meurguitta: “D’ëzgù, ëncaminèn da ‘sta quintana, ma fa tensioun qu’è i eu ‘na dëntèla ënt ‘oou mès dla vìi. Eisì sèn a 800 metër, a l’ëndrèt, ën post chaoud, da lèrimuzi, coume dizèn nouzaoutri”
Mariéta: “Varda, è i eu n’arc ëd pèra! Pièn sto soutpasajou. Ëndoua ou méinët?”
Meurguitta: “ D’eisì ès vait aou Quëstèl. Poi pouèn alà vè la fuzina ëndoua ou font li quiò tui’ li divendrou é la fountana ëdvant a la chapèla”
Jacou: “È i eu gro ëd queu, ou sount una atacàia a l’aoutra, è istet-i gro ëd gën?”
Meurguitta: “Oura sèn mëc neuousënt é nouantëeneuou, ma ën vì, mëc fin a lh’an sincanta, Mizinì è i avet milasincsëntecarantësinc pérsounë”. |
