franco-provenzale
Silvana:"L'ooutro disondo, de vepro, l' avèn dechidù avei in grup d' amis de trouvese a mingé din notra cazëtta an mountanha . Onhi d' un l' at pourtà in plat tipic de notra valada.
Fazàt jò frat è l' avèn aviscà lou fournèl , parìe apré pouiòn fare bruzaté le chatinnhe sut la péla bruzatouìra. L' avèn bità tot bén arenjà lou tavo è l' avèn ancaminà a mingé:
Per premiera choza, l' aion de jamboun è de sooutisse, apré de anchooué aou vert din lou banhèt avei l' alh. Mi l' aviò preparà li anhoulot avéi ma nona. Ièroun plen de chert è de verdurra, onca de bourache. Apré mi amis l' aion pourtà lou bulhî incò choout avei li banhèt . L' avèn minjalo avei in poc de salada d' andivia è de tartiffle bulhé sensa pèl. Din lou coundiment de l' andivia l' aiòn bitai, avei l' olho , l' azil è lou sal asì la moustarda chitâ.
Coumme dous, ma nona l' avat preparàno la torta de pruss. Le chatinnhe bruzatà l' on livrà la bèla sina.
Mi me plèit in baroun cuziné è l' èi chità de libbre de richëtte , ma na foout asì in baroun qui soun de tradisioun de famelha que se faziòn jò din lou secoul pasà, tipic de se valade isì o de la Fronsa.
Apré sina l' èi gardà inna fëtta de torta de pruss pèr fare tasté a ma nona pèr veira coumme ière venouâ. L' aviòn pour qui na fouise pà prò, ma a n' ière finca trot.
Pierina: “Ti è ta nona sìe de brave cuziniere. ”.
Silvana: “ Ma nona l' at mountrame a cuziné corra iero pechita è onca ma mamma."
Pierina: " Aloura me mountre pì carcarèn?"
Silvana: “ Ti save in baroun de choze, in jorn se trouvèn pì per chengese le richëtte".”