Alé, mi car amis, varra vou porto a veira ma grasiouza meizoun.
I propri a meità du chumin, ma in poc deitacâ da le ooutre meizoun, l’ ei inna bèla vizoual sut la valada.
I-t inna meizoun vielha que moun pari l’ at bén arenjà per adatéla a le noueve esigense de la vitta. Aou plon pi bas a i èt in eitrablo andounque l’ avèn notre boué vache. Din lou plon de mès l’aven la cuzinna, inna pechita dispensa, le chombre andounqoue alèn durmì è lou banh; i èt onca in bèl pélo. L’éira è lou soulìe soun dzoure, aou ters plon, ma se intre de darìe, è soun aou livèl de la tèra. Devòn, la meizoun l’ at in gront piloun routound qu’ou tient amoun lou coulm. Lou couvèrt ou an loze, è dzoure i soun trèi bèl fournèl an piera. Touit li tral è li pelo soun de maleuzzo è onca li arquitraou soun de boc. Moun pari l’ at gardà le muralhe an piera a vista. La vouta i a flon de l' eitrablo, darìe la meizoun.
Vou anvitto a pilhé in cafè din ma gronta cuzinna andounque pove veira lou vielh fournèl, lou fouie avei lou peiruvve pendù, andounque, in col, coueiziòn la poulenta. Varra, ma mari la fèit sut inna mouderna termocuzinna. L’ aven incò gardà lou vielh tavo è inna grasiouza boncha de nouie.
Ma chombra l’ ei voulula de stil moudern: a i èt in lhèt, in gardaroba avei l'eimiralh, è inna scrivania de freise, l’ ei onca in compiouter, inna riccha biblioteca è in moudern amplont pèr eicouté la muzica. |
