franco-provenzale
Për festegì li dizieut an ëd Mërguitta é li vint ëd Mini, Quëttlina é Perou ou i ont dechidù ëd rigalali ën viajou.
Mërguitta: “È i ëst n’ëideia meravilhouza, n’ai ‘na joi mata, Mini qu’ën n’ën distou d’alà a ënfourmanou ënt una agensia ëd viajou?”
Mini: “Sè, t’a razoun. Pouèn alà a Siriai, è mè zmiet qu’è n’eu una. Parei pouèn vè toutë ël pousibilità”.
Mërguitta: “Ma t’ët pense d’alà a to lou treno, a to l’aereo o a to lou bëstimeunt? J’alèn vizin o lounh? È faiti geu fret për alà aou mar?”
Mini: “Pruma ëd tout douèn dechidri ëndoua alà é poi vien coume. Ëm piazrì gro prouà l’aereoplano daou moumënt quë l’ai ëncoù mai pìia ën touta la mia vita.”
Parèi ou coumbinount ëd piì la couriera për alà a Siriai.
Ën’ l’agensia, spetënt lou soun touërn, ou tacount a vërdà li papé publichitari. È n’avet ëd toutë ël sort da fà zburdì la fëntazia.
Agensia: “Vardà quë propi ënt ëstou moumënt è i eu d’oufertë fourmidabilë për la Bretanhi, la Spanhi é la Catalounha. Sé ou voulé alà a to l’aereoplano è i eu ëd vol diret Turin-Barselouna.”
Mini: “T’oou sastou coza pouèrian fà? Alà a to l’aereoplano fin a Barselouna, girà ën poc la Catalonha é ërtournà a to lou treno passant për la Val d’Aran, Toulouza, Mounsegur, Carcassoun, Arles, Avinhoun é Nisa”.
Mërguitta: “Mini, t’avù propi ‘na bèla ëideia, t’è propi buërb, fazèn parèi”.
L’agensia è verifiquët su la tèilaranhi la disponibilità ëd post për sè itinerari, è s’incariquët ëd toutë ël prenoutasioun é ou li prountount li biët. Ou sount prount ën dui dì.