LI MAINA DLA HCOLA I SONT:

Classe I

Lucani Marco

Martinelli Anna

Reinaudo Angela

Classe II

Lucani Mariella

Reinaudo Nelly

Classe III

Rocco Michela

Classe IV

Martinelli Barbara

Recrosio Davide

Reinaudo Mara

Reinaudo Patrizio

Rocco Mara

Classe V

Lucani Corinna

Querio Marzia

LÉ MAGISTRÉI SONT:

Stefano Maria Gabriella

Oberto Maria Margherita

LI PRA

Li pra, en Val Soana, i sontgnent tant grant. Tenti i sont en riva. D’an pra à l’auto ô i ét lé partié qui i sont marqquaié con li tèrmo. Ô sé butét en roc en poc gro à mèf “lo tèrmo” et d’auti dui pitoni roc, un pèr banda dlo tèrmo “li téhtémoni”.

En iagio, canqué titi i avont dé vacé et i avont bésen dé tanta èrba, ô sé dovéit faré atension à gnent pasar lé parié dla propriétà s’ ô sé voléit gnent rusiar con lo patron dél pra apia !

LI TARPON

En tli pra ô sé véit dé pitodi monton dé tèra. I sont fait da li tarpon. Fé béhtié fi i mingiont lé boié. I sont pitodé et i hquieiront gnent tant ma i ant en bob nas. Lo péi ô l’ét néiro et lucit comé en vélü. Li tarpon i fant dé longé galérié sot à tèra et i hcaton con lé pioté da douant qui sembiont dé palèté. Lé galérié i portont à na tana sot al tarponèr.

Li tarpon i portont dé dant à li pra, ma à carqui ciosa i sèrvéissont pèrqué qui mingiont lé boié.

LO IAM

S’ ô sé vét avéi dé bon fen, ô sé dévét en iamar li pra.

« Cia dé Crot » i sa dit qué l’èrba bona i sé pèrt subit s’ ô s’en iamét gnet, pèrqué i at la rèis pi cürta. Envécé, l’èrba grama, i ét comé la gent grama et i at la vita longi pèrqué la réis i ét pi profonda et i sé pèrt mai.

Lo iam, en tli pra, ô sé portét gia d’ötont, canqué ô sé largét pi lé vacé.

Lo fahton qu’ ô sé drouét à portar lo iam ô l’ét fait con bohc dé sérvagio et ô sé portét en téhta.

Pèr faré en fahton da iam, « Michèl dè Crot » ô butét vint eiuré. Poi lo iam ô sé hpatét. Adagio ô sé hpatét d’ötont, ma quasi sempé ô sé hpatét dé primà, apéna qu’ ô déhgéilét, paré ô pét pénétrar dabin en tél téren.

Canqué li pra i sont en-iama, ô sé dévét anco pulili. Fé varcan fi ô sé fait sempré dé primà et ô sé drouét lo rahtél.

LO FEN

Lo fen en Val Soana ô sé taiét lo méis dé giügn, en poc en rétart rèhpèt à la piana darei qui lo taiont lo méis dé mai.

Ô Fos ô vint taia entor lo quindé dé giügn ; ô Crot envécé i lo taiont entor lo iiét dé giügn.

LA SÉFA

Pèr taiér lo fen ô sé drouét la séfa. Douant d’alar taiér, lo séador ô dévét martélar la séfa. Ô pontalét la lama enfimà l’airéla et ô piquét con en martél piat. Martélar ô l’ét gnent facilé, pèrqué s’ ô sé donét en colp da fi et en colp da lai, la lama i sé déhcartét et i fait « clic, clac ».

Canqué la lama i ét martélai ô sé pét comenfir à tair lo fen. Lo séador, ô sé portét apré la pèra, dinté en tél cuèr. Paré, sé la séfa i taiét pi dabin, ô tirét féra la pèra et ô molét la lama.

LA MÉSÉIRI

La méséiri i sèrvéit pèr tair l’èrba o per tair lo fen apia à li roc, à lé pianté, à lé partié. I la drouont hquasi sempé lé fénè. I at lo mangélo dé bohc et la lama fait comé en quart dé lunà.

LO RAHTÉL

Lo rahtél da fen ô l’et en bohc. Ô at en lonc et lo géif ô tint lé dent. En iagio, tuti li capfamii i savont faré li rahtél, orà ô li fait anco “Michél dé Crot”. Canqué lo rahtél ô l’ét rontu o sensa dent, ô seé rengét con lo rébèc. Lo rahtél sèrvéit gnent mahqué plo fen, ma anqué plo giaf, pèr l’èrba.

LO FORQUIN

Lo forquin ô at lo mangélo dé bohc et dué brué dé fér. Ô sèrvéit pèr hpatar lo fen.

FARÉ FEN

Lo fen ô sé séiét con la séfa. Lo séiador ô comenfét da sénéhtra et ô vat à dréiti. Apia à lé partié, lo fen ô sé séiét con la méséiri.

Canqué lo fen ô l’ét taia, venté hpatalo. Pèr fé varcanfi ô sé drouét lo forquin. Envé noit, con lo rahtél ô sé ramafét lo fen en tenti muélét sé no la rosà i lo bagnirét trop.

À la matin apré à canq’ ô ruét lo séroi ô sé hpatét torna et apéna qu’ ô l’ét séc da na banda ô sé virét da l’auta.

En tél dépoi-méfégèr tart, sé lo fen ô l’ét preiu séc, i sé fant tornadé muél et logèr apré ô sé hpatét mauto iagio.

Canqué lo ten ô l’ét bél, lo fen ô sécét en düi gèr. Ô dévét gnent éhté trop séc sé no lé foié et lé fieui i sé frisotont et ô i é vihtét mahqué pi lé buhcé.

PORTAR FEN

Canqué lo fen ô l’ét séc, ô sé portét en tla mura.

Con lo rahtél ô sé comenfét à embréhtalo. Poi i sé htendont lé cordé:dué pèr li fai pi pitoni, tréi pèr li fai pi gro. Lé cordé i sé butont pèr lonc.

En iagio, à canqu’ ô sé fasivét lo fen dé montagni, i sé butavont tréi cordé : dué longianié et na travèrsai. Apéna lé cordé i sont htendué, ô sé fait dé brafié et i sé butont enfima, poi ô sé gropét lo fai. Lé cordé, da na banda, i ant na tacola dé bohc con dui guicio. En tél prim guicio ô sé fait un grop fis pèr tinir la corda, en tèl secont, ô sé fait n’angasa con la corda pèr gropar lo fai.

Canqué lo fai ô l’ét envion, ô sé pinét pèr faré céire giu lé buhcé qui posont féra et poi ô sé fait la tèhta et ô sé ciargiét.

En Val Soana lo fen ô sé portét en téhta et ô sé drouét dé carét et gnanca dé lédé. À la fin i sé cuiéiiont lé réfénèré en tél fiorér et i sé portont en tla mura.

Pèr portar lo fen ô i ét aoi lo foiarèl ma da noiauti ô sé drouét gnent tant. En tli ten vié i drouavont la travéci, ma ora ô i et hquari pi gnun qu’ ô l’at.

LA MURA

Lo fen ô sé portét en tla mura qui i ét quasi sempé apia al beui. La mura i at düi pian et féiqui enfuma ô sé démandét lo trabial. En tél trabial ô i ét dé grosé duèrturé qué adiagio i sé séront con d’as. Pèr entrar en tla mura ô i et na grosa porta à dué partié. La porta i sé sérét con en froi dé bohc qu’ ô sé frémét con en cugn.

À canqu’ ô sé ruét con lo fai en tla mura, i sé gavont lé cordé et ô sé hportét lo fen enfuma la biéhta durando lo forquin.

Lo fen ô sé bogét da la mura mahqué al moment da donar da mangiar à lé vacé. Ô sé envionét aleuira li trosél qui sé gropont en tél fiorér.

A la vaci i sé donont düi trosél à la matina et düi à la noit: en trosél dé fen et un dé récorf. Lé vacé i mingiont pi avolentèr lo récorf.

VAIRO QUALITAIÉ DÉ FEN

Lo prim fen qu’ ô sé taiét ô l’ét “lo fen”.

Lo sécont nosauti lo démanden “lo récorf”.

Lo tèrs i lo taiant gnent et ô l’ét “la pahturà”.

En iagio tuti i alavont en montagna a faré fen et ô sé taiavét “lo fen dé montagniE.

Lé buhcé qui végnont en tli maiaf i sont « lo vaciairaf ».

Ora pi gnunt ô vat à montagni à faré fen et s’ ô gné n’ét gnent preui ô sé cétét à düimilalire al miria.