Réire di nuesti Réire

qu'avé dubert e sarà i uéi 'nt'i meire,

que de biei nom avé penjù ai andreit

de l'ubac e l'adreit

di nuesti coumbaloun

coume choque, escarlin e sounaioun

que dindanéien mai

apre de sinsent ann, ou 'ncà de mai !

Esclent 'me l'aram, fres-c 'me la salada

di ort, nom que san encà de rigoulada,

de grimme e masche e d'omme matarel:

Rocha de Chabourel,

Squiolle di Fihe, Quiot di Fermesìe,

Barma dal Sarvanot, Bars di Chabrìe,

Rocha Tuna la Fioca, i Teissouniere,

Coumbal di Cavaliere,

Fount la Chabro, Favìe, i Arpousòu,

Coumba dal Pòu e Rocha dal Saoutòu,

Fount di Croubas, la Couanha, Barma Sona,

Pissai de l'Aiga Bona,

Meira di Fehes, Quiot dal Bel Dinar,

e.... i n'avaria d'àuti da countiar.

E minca 'n nom se ten estrech na counta,

e minca 'n nom à 'n navisar que mounta

de louenh de louenh. Ah i norn di nuesti andreit,

de nueste roche, barme, fount e preit!

Voulén pa fa de blaga,

voulén pa fa per paga,

me 'bou questi biei nom poulén ben dì

que sén fih de poueta... ou per aquì.