I avio en paw de temp qe avien l'ideo d'enquntrà i emigrà di noste valade a Paris, ma la qozo nus semyavo pa tan dabelfà. Paris es gros e dalwenh da nuzawti en tute le manyere.

A Milano e subretut a Torino ez jo stà fach qarqozo per i emigrà di Valade usitane, ma a Paris fin'eyro degün avio pensa de barunà d'adrese e veyre d'envidà la jent per qarqe inisyativo.

L'ideo es vengüo a Dino Matteodo, Sendi de Frayse q'es lu pais qe bu Sampeyre avaré la pü broso part de emigrà a Paris, subretut din lu 17eme e a Levallois Perret. En bot demandà la qulaburasyun de lu Sendi de Levallois qe à duna la pü groso despunibilità, l'inisyativo es partio anqe grasye a lu travay qe qarqe juve jo fi dl'emigrasyun, a fach per avyerte la jent.

Lu myey ero de urganizà n'espetaqle de chansun bu Dario Anghilante q'es de Sampeyre e chanto dqò de chansun qe parien d'emigrasyun e subretut «Bessé-Paris» qe quntyo l'estoryo de n'emigrà vers Paris. Bu Dario à dqò partesipà siw payre Mazino q'es l'awtur de sqazi tute le chansun qe Dario chanto e qe à chantà e sunà bu lu fì.

Apres avé mandà apopres na trezenteno d'envit, la surprezo ez stà de veyre aribà may qe 450 persune. Lu Sendi de Levallois qe, bowqo fu gas, es d'urijino Valdustano e gran animatur de l'Asuchasyun di Valdustan a Levallois, à dunà a despuzisyun l'Auditorium dal Sentre Cültüral e la Cumüno e chal di qe lu post ez stà ben just a l'ezijenso: aqulyent e bu na bono aqüstiqo.

Entyere famiye aribaven: payre, mayre, minà, peché e nono, ero bel de veyre qumo avesen gros piazì e retrubase fra lur aqì tan dalwenh da lu pais.

L'espetaqle ez stà bel. Dario e siw payre an chantà bu entusyasme e emusyun perqé avien dran lur en pübliq atent e qe pruvavo de sentiment a squtà le chansun a nosto modo qe parlaven di lur post. Qarqe puesie de Mazino, sempre en usitan, an qumpletà l'espetaqle.

La jent ero quntento. A Paris avio retrubà na brizo lu pais. Tüchi demandaven d'urganizà enqà d'awti bot qarqozo parey, de turnà may.

I düy Sendi de Frayse e de Levallois, din la prezentasyun de l'espetaqle an avansà l'ideo: muntà n'Asuchasyun de y emigrà di Valade usitane a Levallois qumo an fach i emigrà Valdustan, per retrubase e qumbinà d'inisyative.

L'ideo es pyazüo. Esperen ben qe qarqün di nostri emigrà se dune da fà ent'aqesto diresyun. Serio empurtant. De jent di noste valade, de jent qe parlo a nosto modo, emigrà a Paris e din la zono arambo ya nà en barun. Dyamenjo 2 de jenie a Levallois ez stà na belo jurnà e magaro, en may dal pyazì de trubase à dunà, subretut ay juv jò fì di emigrà, na stacho pü forto a la tero da nté yariben.

Noste jurnal, q'es lezü en tute le valade usitane, es ben despust a dunà na man perqé s'aribe a barunà d'adrese de nosto jent qe sun a Paris e alenturn bu l'ideo de muntà n'urganizasyun.