La mountagno quë separo la Val Cluzoun

Da la valaddo dë Söizo e dë Cimoun

A uno pozisioun quë së noummo l'Asietto

E quë dë noutri reire ez ità l'ocazioun

Dë valhentizo, dë couragge e d'abnegasioun.

Dei siêcle dezötieme ver la meità,

Cant enfuriavo la guêro dë sucesioun

Dei trone d'Austrìo e pluziera nasioun

Së batìan per empozâ lour rei preferà,

La Franso a tentà d'envaî lou Piemount.

D'ocupâ l'Asietto su lou crēt e Exilles, s' la gaucho,

Fënetrella su la dreito e desendre aval a Turin

Ero fermo entensioun dei gouvernamen parizien

Quë së creîo aboù sa pounderouzo armaddo

S'öbrî fasilo la vîo ver noutro valaddo.

Lou marquēs dë Bellisle aboù trentun batalhoun

A pasà la frountiero quë nou separo dë Briansoun

E s'ez avansà su la Gran Coto e lâ pouzisioun

Quë fan frount a l'Asietto e â Gran Seren

Ounte së trobbo la trouppo dei Count Caqueran.

Lou general piemountē, quë dë batalhoun

N'avìo mequé trezze e pâ gî de canoun

Da opozâ a quelli dë li poutént envazour,

Poîo ren quë countiâ su la valour e li fuzîe

Dë sî entrepidde saudà e bravi ofisîe.

Li Fransē dâ Maréchal D'Arnault bien entrenà

Ver la "trincéo a tënalho" së soun eilansà,

Ma li grenadìe dei Count Di Sansebastiàn

An sabù dei nemis fougoû arestâ l'eilàn

E aboù dë perda sanglanta l'an rëpousà.

Lou marqués de Bellisle, quë dë la Gran Coto

Ouservavo la batalho furiouzo e acarnaddo

E liz eifors inutile dë si valouroû coumbatént,

Arappo un drapéoue së lanso din la mescladdo

A la têto d'un group d'ofisìe coumò ēl valhént,

Aribbo a la "trincéo dë la tënalho" tant disputâ,

Plantó su lou bort soun ensigno dë guêro,

Ma d'emprouvîs un colbe dë sabbre e uno fuzielâ

Lou abattan a têro mourtalament blesà:

A pol papì fâ d'are quë encourajâ si saudà.

Li doû granadìe quë l'an coulpì e aterà

Së noumman Ellena e Adami dei regiment dë Cazal;
Cazì tou dë suitto aprê, da valouroû ē toumbà

Lou Meréchal D'Arnault e d'ofisìe en cantità.

Lou destin dë la journâ ez ormai segnà.

Lou meme sort ē touchà a li batalhoun

Dei General Villemur ver lou Gran Seren,

Aprê aguē subì un masacre en

E tenth aboù soun sanc l'aigo dei valoun

Quë quē journ da li Mourt a prē soun noun.

A la fin dë quello tristo e funesto journâ

Li Fransē, en deroutto, an dëgù së rëtirâ

Laissant su lou camp sinc milo mourt ou blesà

Dë trouppo e catre sent ofisìe foro coumbat:

Uno afrouzo ecatoumbo dë galhart saudà!

Lou cadavre dë Bellisle da li Fransē reclamà

Aboù lh'ounour militar ez ità counsegnà;

E lou journ aprê dë la batalho gagnâ

Lou Rei a Turin ez ità enfourmà,

E sei fanioun fransē soun ità prezentà
Coumò trouféou dë guêro a Sa Maestà.