Aquesto es-uno di pus bele danse de la Val Varacho. Lou nom de tresso ven da la feguro prinsipalo, aquello que al Bessé i dìen decò "tuchi" perqué i es la souleto feguro de la Tresso triho balà da tuchi i dansaire.
Lou Desrat, estudious franses de lou sec.XIX, din siou "Dictionnaire de la Danse - Paris 1895" nou dì que : -Le dictionnaire de Compan donne ce mot come titre d'une ancienne danse. Malgré mes recherches, je ne l'ai jamais recontré.-
Per acò que ne sai, l'ai pa encà sentuo recourdà deforo de la Val Varacho. Isì, al journ d'encui i la bàlen ent'la Cumuno de San Peire. Ent'la Cumuno d'en Blins l'a de persoune de sessant'an que i la counoùissen ben, ent'al mentre que a La Chanel i s'avìzen mec pus que n'iage i la bàlaven; a Chasteldalfin, magaro que i l'àssen encà balà entrà i doue guere moundiale, i la san pa pus gaire. Aquihi de Fraisse e dar Mel i
la counissìen decò perqué i anàven bala-lo a Roure (Cumuno de San Peire) bou aquihi d'aquì, ou a Madono de la Beoulo (Cumuno dar Mel) bou i Gerbois que i venìen a lou rumiage.
La bono voulentà que aquihi de San Peire an agù per garda-nou aquesto danso vivo, creou que vene soubre de tout da la Bahìo que en recourdant la liourado(1) di Sarocheni sierv a tene 'n paou de coze di noste tradisioun antique.
I es la souleto di noste danse vieie que chal esse sies persoune, tres garsoun e tres mendìe(2) per bala-lo. I es facho de doue part que soun la Tresso triho (3) e lou Balet e i es la souleto danso d'en Blins que vol lou Balet oubligatori apré la danso triho (an aquest Balet amoun i dìen lou Baletas).
L'avaré mec pus sies ou set sounaire qu'i san a souna-lo, ma toutun (4) i muzique que i an i se semehien encà 'n paou uno bou l'aouto.
Isì, dedin la fouehio di fegure, reportou la maniero de bala-lo de San Peire que creou sie la pus justo (e que i es sourtìo 'n butant ensem la muzico de lou vioulinisto Jusep da Rous bou aquello de lou sounadour d'armonic Jan Bernardi). Apré reportou i diferense que i soun a San Peire per acò que regardo Jan Bernardi, Jusep da Rous e i sounadour dal Bessé; bou 'co pré, dìou decò carcozo de la maniero de bala-lo que i avìen en Blins,(l'ero na maniero difrento, pa pus ou menou justo).I tres coubie se bùten uno apré l'aouto, coume se vé din la feg.1, de 'n cant de lou sit dal bal.
La premiero coubio part souleto e fai aqueste fegure:
1)ANÀ OOUTO vouech pas de travers que soun de saout bel simple. Dui pas de travers i se fan ent'al temp de un pas dal balà.
L'omme ten la man drecho sal travers de la fremo e aquesto ten soun manchino, de soubre de lou bras de l'omme, sal travers de l'omme; i aoute doue man i se le doùnen un bou l'aoute e i ténen anan 'n fazent coume la fes 'n triangoul. I van al soum de la salo. (Feg.1)
2)VENE ISHAI vouech pas de travers.
I retournen arìe senso vira-se e senso chambià la pouzisioun di man (i vìren mec la testo per veire 'nt'i van!).
3)LOU BALÀ
Jusep: (sinc.) pas dal balà, coume per ez.
Jouan: (catre) aquel de la countrodanso.
L'omme ten i doue man de la fremo coume din lou balà de la countrodanso. I bàlen se piasso (5).
4)LOU VIRÀ.
Jusep: (sinc.)Pas dal virà coume per ez.
Jouan: (sìes) aquel de la courento.
I vìren bou l'ouro (6) e i ténen i man coume din lou virà de la courento.
Apré i se làisen anà, e, 'n pasant un per cant di aoute doue coubie, i van a butase darìe d'aqueste.
Ent'aquel mentre part la secoundo coubio que repet i meme (7) fegure fache da la premiero coubio.
Apré la terso coubio repet mai (8) i fegure que i an fach i premiere doue coubie.
5)TUCHI ou VOUECH
dui touquet pas de travers, a poc pres de 16 pas per un. Ent'aquest cas chal (9) vierte que lou numbre di pas chambeo 'n paou da 'n bot (10) a l'aoute.
Toute tre i coubie pàrten, van al soum (11) de la salo e retoùrnen, e van mai al soum de la salo, e i van anan coum'acò trinc que la muzico lou dì. Ent'aquest anà oouto e ishai i fan 'n vouech coume dì la feg.2 en maniero que l'asse sempre na coubio per cant e uno al mes. I retournen decò arìe senso virasse e senso mirà i man coume din lou "vene ishai".
BALA'
coume inant
coume inant (12)
VIRA'
coume inant
coume inant
Cante quito la muzico de lou Tuchi, la coubio que i es pus lougno de lou sit de partenso fai lou balà e lou virà. I aoute retoùrnen a siou post senso balà.
Apré la premiero coubio (que pol decò esse la secoundo ou la terso, counfourmo coume i soun retournà a siou post) fai l'anà oouto, lou vene ishai, lou balà e lou virà.
Apré la secoundo coubio fai aqueste fegure.
Apré la terso coubio fai aqueste fegure.
Apré i fan mai lou vouech coume ei dich inant, senso fenì bou lou balà e lou virà.
Lou balet i lou fan just que i an fenì lou tuchi, coume i fan aquel de la courento a modo de San Peire; i fan tres bot lou balà e lou virà.
Couro Jouan Bernardi ero jouve, i dansaire demandaven souvent que lou vouech ou tuchi fous fach de tres touquet nou pa de dui.
Jusep da Rous sono le prime quatre fegure sies bot: ent'aquesto maniero i dansaire, apré que i an fach tuchi la primo part (i premiere quatre fegure) i la repeten mai tuchi 'n bot; e aquesto cozo al la fai tan denan dal premie vouech que denan dal secound.
Juspet dal Bessé (Pettinotti) e siou fraire, apré l'anà oouto e lou vene ishai, i sònen dui bot lou balà e lou virà, coune capito dedin la Courento (balà-virà-balà-virà); mi me pensou que aquesto coustumo sie n'estis novo ou, en tuchi i cas, mec dal Bessé.
En Blins ei pancà vist balà la Tresso, ma bou l'ajut de Batistin Gallion, counouisou la muzico e n'estis la maniero de bala-lo.
Le tres coubie van al soum de la salo e, uno al bot, fan i premiere catre fegure, apré i fan lou vouech e apré 'n balà e 'n virà. Just apré (perqué i recouménsen pa lou anà, lou vene,etc.) i fan lou Baletas que sarìo perparei aquì: i se doùnen tuchi i man en cerqui e balen per vouech pas, apré sempre tuchi ensem, i vìren bou l'ouro per vouech pas; i polen repete-lou carqui bot, ma, ent'aquest cas, lou virà chal que i lou fassen, lou premìe bot bou l'ouro e lou secound bot countro l'ouro.
N'aouto difrenso es que en Blins, cante i fan lou vouech, en arubant al soum do la salo, e pei decò en arubant a la simo, i se vìren arìe en fazent 'n pichot revinquet, 'n maniera que lou vouech resto coume dì la feguro n.3.
Se l'à 'n bal que soudisfeo i jouve l'es aquest e se l'a 'n bal bel eprende l'es decò aquest; bou 'co ei bono esperanso que i jouve repìhen e countùnen a bala-lou.
Fraisse, lou 20 d'avoust 1972.
NOTE.
1-Liourado: cacciata
2-Mendìe: ragazze
3-Tresso triho: Tresso propriamente detta
4-Toutun: nonostante ciò
5-Se piasso: sul posto, senza muoversi dal posto
6-Bou l'ouro: in senso orario
7-Meme: le stesse
8-Mai: di nuovo
9-Chal: occorre
10-'N bot: una volta
11-Soum: fondo
12-Inant: prima, ossia come detto prima
commenta