Lou Roumiage Prouvençal de la Vierge Adoulourado en Coumboscuro -qu'aquest an s'es passa lou 9 de la Madalèno- per rèn soun encharme. Es un message de fè e de umano serieta, que arubo al cor e à l'idéio de un mouloùn de gent.

   Dins un mounde mecanicisto e raciounalisto mai troubàr lou gust de pregàr en chaminand plan plan per la mountanho! senço deguno gèno, senço li fuòls calcùles d'aqui que se demanden: "Ma de que me sièrv tout acò? de que me raporto dins la sacocho?"...!

   Tout acò es de countèsto vivento, realo e courajouso. Tout acò es de revoulucioun coustrutivo, prefounso, mouderno e anciano al mème temp.

   Es iqui que l'òme vertadiarament se rebèlo à la lougìco estoufanto e centralisanto dal mounde e avanço uno proupousicioun nòvo e bouleversanto: un engaja e persounal biais de viure, de pensàr, de s'ourganisàr soucialament, au de foro de li leges dal proufit enferouni e de la massificacioun.

   E aquelo prièro la far en lengo nostro prouvençalo! Segùr, dran li  enfenìdo e inutìlo afermacioun que se fan sus la necessita de demassificàr l'òme, aquesto es uno demounstracioun pratico e drécho, councreto e realo de endividualisacioun.

   Es pr'acò que lou mounde ié ven, an-aquel "Roumiage" e li amis e estimaires de nostro civilisacioun minouritario d'Oc ié prèguen e ié chanten loung dal chamin di Mistèri senço deguno gèno.

   En tuchi aqui que soun vengu lou 9 de la Madalèno, an-aquelo bello journado de fè e de culturo prouvençalo, disén nostre gramacìs prefouns. Gramacièn soubretout li prèires i li persounes que an coumenta, emé tant de gaubi e de counvincioun, li Mistèri Jouioùs dal Rousari: dins l'ourdre: Michelino Isoardi de Chastelmanh, Bep Rous dal Jouve di Pourraches (v.D'Esturo), Doun Marìn d'Estròp (v.Mairo), Luigino Miraglio de Vaudìer (V. Gès), Doun Minotti, de Chanuéies (v.Mairo).

Per soun merit aquel journ sian ista tuchi uni al soun de nosto lengo.

   Se lou Senhour nous ajudo, arveire a l'an que ven!