Uno diamenjo matin, dë caiqui an fai, un cleasin (Barbou Daviot) ero deisendù aboù soun âne a la Balmo, per portà doua sachâ dë trifla; entrementìe, a soun retourn, a n'aurìo aprofità per portâ a meizoun soun empletto per la semâno. Naturalment a volìo pa s'enchaminâ, per lou retourn, denant aguée begù un boun mez litre a l'ostou dë Conte, quë së trobbo su la plaçetto dë la Coumuno. Coumbinasioun quée journ, dint la groso salo coumunalo la lh'ero lou Counselh radunà. Barbou Daviot eitacho l'âne a la ferâ d'uno fenêtro dë la meizoun coumunalo e vai a l'ostou.
L'âne, aprê un bée moument, forse stoufi d'atendre, së butto a bramâ a quielâ coume un eisourçelà ën fazent un vers dei diau.
Alouro lou messou Raviol sort ën preso dë la Coumuno e vai a cherchâ lou patroun dë l'âne. Cant al a agù trobà a li demando: "Ez el votre, l'âne quë la lh'a eiqui foro?", "Oi" reipount Daviot. "Alouro" replico lou messou, "Tola-lou vitte d'eiqui perquè a deitourbo lh'autri quë soun desoubre!"