LI VARCAN DE CAMPAGNI: PÈR PORTAR Ô SE DROET…

LI FAHTON

Li fahton i se droont pèr portar iam, erba, trifole, quegne e neuis. De primà, acanque i se repoleisont li pra, i se rahtelont li roc e li baquet, qui se butont poi en tli fahton e i se portont via.

De fahton ô gne n’et de vairo sort:

1. Fahtà e mèda fahtà pèr l’erba

2. Fahton plo iam

3. fahton plo martchìa

4. lota da varcan e da martchìa

Qui qui li droet?

Fahton: le fenè e li mainà

Lota: i om

Come qui se portont?

Li fahton i se portont en tehta fazendo pasar la pola enfumà al buffet.

Le lote i se portont a ahpaule e i ant dué pole.

La pola i et en toc de teila forta faiti a man da le fenè.

Li fahton da martchìa i ant la pola recamai. Lo fahton da martchìa ô serveit pèr portar lo buro e lo magno a vende e pèr portar ô mazon le tchiose tchetaie. Lo fahton ô vint cuètà e gropà con en faudai.

Fin qu’ô se droet pèr fare li fahton?

Pli fahton da varcan: boch de servadjo;

pli fahton da martchìa: boh de boson

Come qu’ô se varcanet lo fahton?

Ô se cunei lo bohc d’otont e d’invèr. A li branc ô se gavet via l’ahcorfi e i se butont setchir dint a de tubo dareui qu’ô paset lo fum dl’ahtua a bohc.

Pèr fare li fahton da iam, li branc i vegnont taìa pèr avei la mesura giuhtà e poi i sont varcanà a man; pèr li fahton da martchìa li branc i sont rahquià con en trinche. Poi i se piegont le cohtane enfumà li djenoi pèr avei la forma giuhtà.

Ten butà per fare lo varcan:

plo fahton da iam: vint euire

plo fahton da martchìa: trei djèr

Trile droaie: banc a dolar e cotel a dolar

LA FAHTÀ

La fahtà i serveit pèr portar l’erba e li rif dle quegne. Duè mède fahtè d’erba i sont lo paht giuht pèr na vatchi.

LO IAM

Ô se portet en tli pra apena qui i et via la nei. Na part i vint djà portai e ahpatai d’otont. Pèr portar lo iam ô se droet lo fahton que le fenè i tchardjont en tehta. I om i portont lo iam a ahpaule con la lota. Lo fahton ô se poset enfumà l’ahtchardjeui e ô s’empieit con la trent. Per gnent ahparcase, la fenà, i butet en tla tehta e en ti ahpaule lo djouet e poi i tchardjet lo fahton.

Pèr portar fer lo iam dal beui ô se droet la fueri o la caretà.

LE TRIFOLE

I se portont dal tchamp a la crota con lo fahton o con de sac qui se tchardjont enfumà al paion. Lo paion ô l’et fait con de teila de mazon e ô l’et empì con pai de seila e ô at la pola pèr posei butalo en tehta.

LO GRAN

Ô se portet con lo fiorer qu’ô se tchardjet en tehta enfumà al paion. Le quegne e le neuis i se portont en tel fahton. La fruiti e la verdura i se butet en te de cavagnet.

LO FEN

Lo fen ô se portet en tla murà o con de corde o con lo foiarel. Ô se droet trei corde: na a mef pi londji (trei metèr) e duè pi curte da banda. Tute le trei corde i se gropont con le tacole de bohc.

LO FOIARÉL

Lo foiarél ô l’et fait con dui bahton de bohc e con de corde entretchìa. Ô at d’aute duè corde, na pèr banda, dli bahton, per tirir e groppa.

Per portar l’erba ô se droet lo fiorer fait con de sac de terlif o con de teila de mazon. Lo fiorer ô se groppe con de pole o de corde e dui anel.

Lo fen ô se tchardjet en tehta. Ô se portet gnent con le lede, li mul o li brantchi. Lo fen de montagni, gropà a fai, ô se pozet enfumà duè droze grose e ô se trenet fin’a al fer e poi ô se butet dju con lo fer droando le djirele.

Le foie pèr butar sot a le behtie i sont de boson e de fo e i se portont en tel bisatchon, enfumà al paion. Lo pai del gran i se butet dint en tel paion e sot a li vel acanque le vatche i fant.

LA LEDA

Li Valsoanin i ant encomenfia a droar le lede depoi qui sont venu li maret do Tcherezole, da la Val D’Ohta e dal Veneto. Li maret i fazont le lede a la maneri dli leui pais e i le droavont pèr menar lo bohc.

I eront faite con lo bohc de fraino e pèr farle i droavont lo piolet e lo faufet. Le lede i avont due guide sot e n’as enfumà e i om i le tirivont. Ô se poseit gnent droar la leda pèr fare d’auti varcan perquè li pra i eront gnent seli, ma pieni de palet.

Al djer d’enquè, en Valsoana ô i et encò na leda : ô la droet « Tita de Tchiampii » pèr menar djiu lo bohc da Lazazia.

PÈR VIADJIR Ô SE DROAVET….

La vi grosa i et ahtai faiti, fin ô Ronc en tel 1893 e i l’aveit faiti na compagnia dlo “Genio zappatori”. La data i et ahcriti enfumà al “Fontanin”.

Poi i avont fait lo trato do Ronc o Cordoneri en tl’anf 1894 e poi do Cordoneri o Tchampii en tel 1897.

La manutension dla vi i eret comunal. Come servifi pla djent ô i eret le viture a caval. I eront de viture dehcuerte e i avont a d’iadjo en caval, a d’iadjio na cobia. Con le viture i alavont prende la djent fin ô Pont perquè do Pont ô Corgnei o i eret n’auto co fazivet lo servifi.

Lo prim qu’ô a fait lo servifi ô l’et ahta lo “Pioio” qu’ô aveit li caval e due viture: na pi pitoda e n’auta pi grosa.

N’auto qu’aveit fait servifi o l’et ahta Chiale de Vilaneva. La vitura i servivet avoi pèr portar la djent, ma ahcazi tuti i alavont a piote pèr rehparmiar le due lire qu’ô cohtavet lo viadji.

La vituri i portavet avoi la pohta e ô la menavet lo “Pioio” puramente son meser Nigro.

La vituri i at portà su la djent fin al 1915. Poi lo medem varcan o lo fazivet la ditta “Olbertan” de Pont qui proave de coriere duerte. Le viture pitode i eront demandaie “dome”, i avont due ruè; le pi grose i avont catro sedil e due ruè pi grose derer e due pi pitode douant, con le bare douant dareui qui se tocavont li caval.

Pèr butar a sohta la djent acanqu’ô püvet, i avont lo sofiet e pla noit i avont de lanterne a petrolio butaie douant, na per banda.

Li sedil i eront de bohc fodrà de teila o de pel.

Lo viturin ô aveit lo fuet fait de corde entretchia atacaie enfumà en mandjelo per totchier li caval. Lo fuet ô lo batave dint an tchiozo de fer, dreit. Li caval i venivont bardà con na grosa pola qui pasavet sot a la panfi; n’auta pola i pasavet sot a la cua con le guide qui vinivont en sel douant e i se tacavont al mors, en butchi.

INTERVISTA FATTA AL SIGNOR VIGLINO RODOLFO (DIALETTO DELLA VALLE DI FORZO)

En calo anf i et ahtai faiti la vi que do Ronc i vint fint ô Mulin?

La vi qui vint su ô Mulin, i et partia mahqué dal Pont del Creht, nint do Ronc, e i l’ant faiti dal 1911 al 1914, douant dla granta guera.

Ô i eret carcun qu’ô portavet su la roba pla djent?

Ô i eret de condutchent qui avont li mul: ô gne n’eret un ô Arcant, dal Mario d’Arcant, un ô Pesei e l’auto ô Mulin.

Lo condutchent de Pesei ô l’eret lo pà de Rodolfo, qu’ô portavet su la roba con li mul, perquè, a fe ten lai, ô i eret mahquè la mulateri. L’auta roba i vinivet portai ahpaule.

Fin qui droavont?

I droavont li mul.

I portavont su la roba a qui qu’ô la comandavet o pèr calo qu’ô aveit l’ezertchisio, dareui la djent i alavet a tchetar a quilo, a medi quilo.

La roba i la portavont su da la Fusinà. La vì fint a la Fusinà i eret djia en tel 1895.

I tchardjivont avoi de persone?

Le persone i le tcharjivont gnent, mahquè s’ô i eret carqui malado o pèr alar demandar lo medjio o pèr alar a l’ahpedal. Lo medjio ô vinivet su con lo caval e o vinivet do Pont. Ô Ronc, a se ten lai, ô i eret encò gnent lo medjio. Bonanima de mon papa ô portavet su de rodji a varcanar; acanque i eret faiti ô tornavet menala djiu a vende o Turin.

Mon papa ô viadjivet con la coriera fint al Pont del Crelat e poi a piote fint ô Pesei.