Qui sap encara al jorn d'encuèi çò qu'al es un nais? Beleu pauquis. Totun lo nais al es un tomple adont un viatge ilhs faziàn naisar lo chanabol o charbol - can la se diç dins la plus part de las Valadas-. Puèi lo chanabol al se destelhava, d'un caire los chanavuèlhs que a la mal paraa poiàn servir per far fuòc, de l'autre la tèlhas que drant d'esser brustiaas abò de bonas brustias chalià passar al bataor.

   Perquè dioc tot aiçò, bòrd que vuèlh pas aicì de segur vos embetar abò un travalh de etnolingüistica; perquè puèi lo titol la peira dins lo nais? Aie sonjat a la question de la grafià dins nostras valadas com a un nais adont avem, per tròp d'ans, fait naisar totas las problematicas gropaas a cèsta question.  Al es per aiquò que tiro una peira dins lo nais, per far bojar las aigas, d'aigas dausaüra venguàs escuras e tirar fòra los fais de chanabol, los destelhar, brular los chanavuèlhs, brustiar, penchenar la rista e teisser una bona teela.

   Deou dire que sioc istat tirasseat per los peels dins cèsta question: parlar de grafià, per mi, al es un pauc s'enfraschar dins un drausier empenetrable mesme se personalment me sioc ja donat una responsa qu'ilh es evidenciaa d'a cest escrit. Ilhs m' an demandat de tractar cest argoment, al es a dire de reprener de lo chabon l' istòria de l' escritura de l' occitan e per pas far pendre d'un caire plus que de l'autre l'escandalh de la grafià, me sento oblijat, per aüra, de me servir d'una lenga neutra: l' italian (mas aurioc estimat melh escrire sus de questions de lingüistica en me servent de l' occitan).