Ei tzousì la plu belle dzournâ d'ità,

tzaude e seréne cmà 'l fouhìa da vèi,

per tournâ issì dount a siu nà,

dount glià ma dzente, dount glià moun végl casèi...

El souléglie brigl dint ël grân siël seren,

lou bochs soun vers e lou broussée flurî,

din lou bau prâ a l'ée dzò mèure ël fen

e lou riu tzânton sens dzomai finî.

Bech dint ël siël la pâsse d'usau un vol

prin laa tzariëra lou gossi couron

e i pâsson 'l temp sens plu pensâ a l'icole,

sûbbron darèire lou pciô e aloure i plouron!...

Pei, sla plassètte dla simple bourdzâ 'd mountagne,

la glià 'l batzâ que pisse sens fin l'aighe boune

e cant lou-s-ommi aribbon d'en campagne

s' tzâvon la sen que 'l grâ travâgl lûr doune.

Ma dzente que pâsse e i vai per tu lou cairi

gagnâ soun pân im dì: Boun dzûrn a vou!

E mi a vée ma dzente, a vée mou frairi

ripoundou ben countent: Boun dzûrn a vou!

E am sentou l'âme ledziëre e ardzouvî 'l cheur.

Aloure sla tère da vèi a m'adzenûgliou

per armarsciâ 'l Boun Diu 'd moun grân bouneur

perchè quelle tère l'ée proppi 'l plu be doun,

l'ée-s-ël plu dou troussél qu'ou peuccion aghée

e que ou deven gardâ bou sente pascion!...