Lou cor nous pica encaro la fèsto de l'Elvo e l'auro d amoun, qu'a douna na reussito forovìo. Nous de la Coumboscuro avihen estréch counfihanço emé i fraire d'Elvo travers i nuèste vesìte, soubretout per i Pastourale de Dinial di derrìe uvern: me propi amoun nous aviho touche descuèrbe que souffìo encaro fort l'aire d Troubaire. En faço de uno enterminablo courouno de baisse e de crest, caressa de n'aire fresq coumo de primo, que boufavo ardi dai linde pastural, avén vourgu dounar n'embrassado couralo ai felibre e ai biéi group de l'aute endréch, que an vourgu melanjar i lour tradicioun bou i nostre.

   Es aquelo boufado que fai retournar à sa granjo, tuchi i an Péire Antòni, per dir:"Isto iqui e rejouìssete!": Miliou Raino, quouro "arubo l'uvern à Elvo", predin la guiéiso per i reire e per aqui que soun mort ou luégn; Jan Péire Raina 'bou grinour nous fai lese"Aloumatin usarén le vaches": e lou Sendi Péire Raino chanto la nosto lengo d'amour e de pas, message de freiranço. Souto la marco di tradicioun e de la lengo Elvo, sarra din l'afrour,  à la cimo de na coumbo, lou 25 d'avoust èro lou centre d'en mounde nòu, senço counfin. Per lou dir 'bou quarcun, lou landeman l'Euroupo èro din na souleto chambro de l'Oustau S.Brancaci, ent' avihen durmi gent de cinq nacioùn.

   La matina d'aquel journ s'èro duberto emé la S.Messo, lesuo la puspart en patuà e chanta en prouvençau dai joue de la Coumboscuro (ah, lou jolli descours de don Dao, talament anima de 'na simplesso,  qu'anavo drecho al cor!). Aprés de la Messo, dedicacioun de la plaço à Frederi Mistral.

La sesiho coulturalo i s'es tenguo din la magnifìco guiéiso roumanìco, e aprés la relacioun generalo sus l'Escolo, facho per lou Segretari Gustavi Buratti, an parla paire Gaetano Di Sales, per coumemourar la regretablo despareissuo dal coumm.Vergìli Buratti; Jan Pèire Raino, qu'a lesu uno jòlio coumunicacioun sus Elvo soun patua; mad.elle Graciello Bava, de la Soucieta Segusium, qu' a coumenta i prouverbi de Miana (val Dora),  lou prouf. Hirsch (Allemagno), qu'a savourousamen recourda lou parla prouvençau di valdés emigra al Wurtemberg; M.llo Morgues de Cannes a lesu un estudi sus li antique danse arma; lou majourau Ravous Arnaud a douna en resumi de l'ideo latino din l'obro de Mistral. An pourta lou salut di soue valade: Conrad Scaler (Walser de Suisso), Bermond e Merlo (val Clusoun), Teofilo Pons (T.Pellis), Toni Boudrìe, Ottonelli, Dao (Varacho), Pèire-Antoni, Miliou Raino, Pèire Raino (Mairo), Sergio Arneodo (que a recourda la necessita de sousténe lou journal Coumboscuro) e lou sìou group de Coumboscuro (v. Grano).

   Soun ista nouma dui nòu manteneire: Pèire Raino, conse de l'Elvo, e Bep Rous dal Jouve per la val d'Esturo. Benvengu à lour, manteneire fièr e libre de lengo e de fe!

   Din l'entretenguo foulclourìco de l'aprés mesjourn avén vist i chate la "Reneissenço", de la "Respelìdo" de "Osco Manosco" dançar à la magnifìco; e i'e respoundìen San Péire, Chasteldelfin e La Chanal abou "treço", "gigo" e "countrodanço". Coumboscuro entramés a jua la piègço "L'oulo", de Arneodo, per testimouniar la reneissenço de la literaturo patoisanto.

 Gramacis à tuchi aqui que an coumprés lou sens d'aquesto journado e an juta à parialo.