Una d’las características comunas a las culturas dichas minoritàrias es la capacitat d’exprímer e de reculhir la diversitat e d’ofrir coma aquò d’esgard e de prospectivas diferents. Es istat parelh bèla derant la pandemia dal Covid-19 que istem vivent: ben de comunitats se son organizaas a lor dedins per fornir d’informacions e de sosten e dins ben de cas las activitats se son adreçaas decò a l’exterior en ofrent d’ocasions de reflexion, d’ajut e de solidarietat de tipe diferent en tochant lhi tèmas de la disparicion di saubers socials, dal rapòrt abo lo territòri e lhi ecosistèmas.

Lo Prèmi Ostana jamai coma aqueste an s’es fach pòrtavòutz d’autors e d’expressions en lenga maire en se propausant coma una ret de culturas e d’activitats per la valorizacion e la defensa de la biodiversitat linguística. Derant las dificultats e l’impact global dal coronavirus lo Prèmi a volgut chauçar la vèsta digitala per sobrar encara un bòt las frontieras e lors restriccions e per continuar a propausar un luec d’encòntre e d’eschambi, en donant vita a l’Edicion Especiala Online.

Fòrta d’las 11 edicions passaas, la ret dal Prèmi, facha de passions, de projècts, de lenga, de culturas, es istaa vivaça e reactiva: dins ben gaire de temp lo comitat organizatiu a mes en comunicacion d’autors, d’artistas e de responsables d’las minoranças, que an produch de contenguts multimedials d’auta qualitat, en donant vita a una programacion de dui jorns compausaa da de lecturas, aprofondiments culturals, performances musicalas, conferenças partecipaas e documentaris dins una combinacion de formats de natura divèrsa. Lhi autors ospitats dal Prèmi provenon da tuchi lhi 5 continents per un total de 37 lengas maires.

L’edicion especiala online s’es debanaa a l’entorn dal siti www.premioostana.it que a ospitat 15 oras de contenguts en dirècta. Entre lhi critèris principals que s’es donat lo Prèmi en edicion especiala lhi a segurament aquel de gardar la “convivéncia”, paraula clau trobadorenca que signífica “l’art de viure ensem en armonia”, e pr’aquò son istats chausits d’enstruments e de modalitats que permetesson la partecipacion activa dal públic interressat, da las conferenças al diàlog en dirècta sus lhi social networks.

Durant las setmanas precedentas al festenal granda es istaa l’atencion de la premsa e d’las radio. Lhi contenguts relatius a lhi autors que an partecipats e d’unas avantpremieras sus lhi tèxts son istaas reculhias dai jornalistats de la premsa e dal web en fasent passar lo Prèmi Ostana sus de rets localas, nacionalas e internacionalas, en obtenent un retorn de públic inatendut (d’articles sus Avvenire, Il Manifesto, Radio3, etc... aicí es visibla la rassegna stampa). Per lo grop de trabalh dal prèmi la XII edicion es un’excellenta preparacion al Decènni Internacional d’las Lengas Indígenas 2022-2032.

Lhi video, documentaris e performance, an obtengut 4000 visualizacion durant lhi dui jorns dal prèmi e esquasi 1000 utents an seguits la dirècta dal siti web. A travèrs lhi canals de social networking e la condivision en cross posting sus las pàginas de TargatoCN e TorinoOggi son istaas rejonchas las 20000 visualizacions en temp real.

L’edicion especiala online a reculhit de testimonianças e de creacions elaboraas durant lo períod de la pandemia, propausat de materials e de reportatges provenents da las edicions passaas dal prèmi que aüra son disponiblas sal siti www.premioostana.it/. Vos envitem a desfulhar lo programa e a seguir las intervencions que truchon un baron de tèmas diferents, da l’experiença de l’epidemia dins la literatura (La cèrca de Pendariès de Max Roquette, dins l’aprofondiment de Monica Longobardi e Matteo Rivoira), dins l’art (tres performances en breton, occitan e francoprovençal), dins la sociolinguística (las testimoniançaç d’las letras da Ostana), sus lhi mèdias (la resposta d’las lengas maires al coronavirus). Las conversacions abo lhi premiats (da lhi Estats Units a la Nigèria en passant per la lenga basca, cheyenne e lo mond kabil), lhi aprofondiments sus lhi tèmas de l’ambient, la produccion poètica, l’estòria di pòples indígens. A sarrar la dui jorns de celebracion d’las lengas de minorança una performance tribut a Luis Sepulveda e lo documentari de Bob Holman “The Language Matters”.

Las conferenças en dirècta: disponiblas sal siti e dedins lo webinar de Zoom, d’ente es possible partecipar e pasar de demandas

Lhi video, las performances, las lecturas, lhi documentaris transmés en dirècta aüra son disponibles sus las pàginas dal siti