Na paroquio de mountagno dins uno di noste valados; ès témp de missioun.
Lou predicatour fourestìer, un fra doumenican que èro sta chama dal préire dal post perqué ai venésse dounar uno man 'nt aquélo oucasioun per cercar de renfourçar la fede jo 'mpau trabalanto dins le couscience de si parouquians, a péno aruba al avìo tout sùbit coumença lou siou travai: counfessiouns e prèdique.
Pién de bon voulèr al avìo counfessa, predica, ramougna, counseia. Après aguèr counfessa le frémos, le mina, le mendiétos e i garçounéts, per finir al s'èro reserva i ome mèure.
Aquéli i èroun ista bén proun dispounìbil, i èroun ana a les founciouns, i avioun ascouta le prèdique, i s'èroun counfessa.
Ma, na causo curiouso avìo 'mpau 'nteressa lou fra: en counfessioun, bén proun d'aquélis ome i avioun dich que i èroun ana a liéch a 'mbou la jaco.
Mah, al s'èro dich 'ntra éu lou misiounàri, pais que vas usanços que trobes. Se pol que ici ès na marìo abitudo, ou que souvént la sie perqué i soun trop pressa que i se coujoun vesti.
Sénso dounar-ie pa mai d'empourtanço al n'a parla quand-mème al pervost ma, aquél a fach sùbit un moure alarma e ai a chama: "Almènou se soun demoustra penti? Vous sabés pa, reverénd counfratèl, que la majour part d'aquéli que se soun counfessa da vous e que vous an dich que i èroun ana a liéch 'mbou jaco, soun en peca mourtal perqué i soun d'adultères?
En disént que i èroun ana a liéch 'mbou la Jaco, i an pa vourgu dir que i èroun ana a liéch vesti, ma que i èroun ana 'mbou na frémo, na putanasso d'ici que ès estranouma la Jaco.
Mi retènou que aquélos counfessiouns soun rén vàlidos, sa que i retoùrnoun se counfessar n'aut bot".
Alouro, lou fra, avant que coumencésse mésso, de denant l'autar, rechamo aquélis ome per que i vènoun mai se counfessar en lour disént: "Tùchi aquéli que soun ana a liéch 'mbou la Jaco, que i retoùrnoun encaro se counfessar, desnou mi pei pa dunar-ie la cumunioun; la counfessioun que i avioun fach anan ès pa vàlido".
Alouro, un paure ome, jo viéch, tout mal buta dins l'aspét e lou vestir e que se ne stavo al founs dla guiéiso, scasi strema, s'avanço tout mourtifica e, al pervost que 'nt aquél moumént sourtìo de la sacrestìo per coumençar la mésso, ai i di: "Signour pervost, mi siou bén malurous, se anar a liéch 'mbou la jaco ès peca grave, mi siou perdu, saréi n'animo dana, poudrai jamai aguèr l'assoulucioun: mi a liéch a 'mbou la jaco i dèvou anar tùchi i séro per forço; ai rén de cubèrtos!".