1. L'arberc dei Rouchoun Rous

 

Lou soulei ensimavo en tegnont d'or la pouncho d'es mountagnes aquelo matinà dei 6 d'avoust 1743. Dedin l'àire fresc dei matin, 'n ome, quin dessout lou pes de sa cabasso, mountavo la driero pouà de la Chabaliero.

Steve Garnier pouiò aver na trentenasso d'an ma la duro vito de privassioun e de travai qu'ei faziò per mantenir la famiho l'avion vieì 'n ont ouro. Pu jouve de catre meinà, i sioou l'avion pa agrevessì: soun fraire premier ero mouort encà pichot e l'àoutre, Toni, pu viei d'el de carque an, ero pa james està erveious. Ei trebulavo a tirar avonti e a l'ero souvent malate.

Marguerito, sa sore, aviò 46 ann e i s'ero pa marià: l'ero stà na jòlio fiho e la i aviò pa mancà i partì, ma sa grondo afessioun per la famiho, lou bezougn d'ajuar sa maire, paren forto, a slevar la meinà, aviò fenì per la far dementiar d'esse jouve e i garssoun, en paou per bot, s'èroun erlugnà d'aquelo fiho souvent tristo e sempre pieno de travai. Steve aviò douze an de monc qu'ie e per el, mai que na sore, l'ero sta na maire. I l'avio slevà oubé mai d'afessioun que i àoutre, beloou per lou besougn de sentir sus soun moure la caresso legiero de na pichoto maneto. E a l'ero creissù d'acont a n'aquelo fiho pieno de passiensso e de gaoubi e ei s'ero afessiounà a n'ie sempre de mai mon mon que lou temp passavo. Meme apres s'esse marià, soun afessioun aviò countinuà a l'estachar a Marguerito e ton que a l'aviò de crussi sempre da ie al anavo se cousseiar e cherchar courage.

E aquest-on de crussi maleirouzament ei n'aviò tonti: Marì, sa fremo, que ero neipà atendiò en pichot dedin carque jour. Ei seriò neissù a Travessagn e el aviò poour que aquel moument aribes. L'ero pa lou premier meinà que neissiò eilamoun dedin na mountagno ma tetun ei pouiò pa n'en far a monc de se sentir charn de poulo tuchi bot que ei penssavo a soque oriò pougù aribar se le cozes foussoun pa anà coumo chal.

E vouì; ben de crussi! Ben de mal de testo. Blins ero pien de sooudà. La menassavo na guero oubé la Fronsso e l'aviò dooutres ann que tuchi vivion oubé la poour de veire i Fransses soubrar la frountiero ma la capitavo pa james ren de noou e, d'aquel mentre, la troupo anavo e veniò. Les poussessioun eroun pistà e assacajà; souvent i sooudà se fazion counssegnar fen e paio per i mul en leissont les ieres vueides e i pra oubé les moutes n'aire. En tonti post, coumo ei Pra de l'Alp e dentour lou Sere de Pouont, enté i Piemountes s'eroun fourtifià, en pouiò gnonco anar taiar la poco erbo que restavo. Ben per acò, auro que a l'anavo assus tenir coumpaniò a Marì, a l'oriò fach en paou de fen da ensselar dedin l'arberc e la grangeto enté ei seriò stà ei segur da i sooudà.

La founteto que gourgouiavo d'acont la viò aviò destrach Steve da ses idees. La cabasso pezavo e malgrà l'àire fresc a l'aviò vuèio de tastar la bouono aigo que neissiò dessout i verous. Ei s'ero acachà en poouzont l'àigo dedin lou coup de soun chapel e ei s'ero bagnà les bouches. Na lonjo freissoun i aviò passà per lou corp suà e alouro a l'aviò erpres dabort lou chamin en aribont ben vite a la simo de la pouà. Lou pion de Travessagn s'estendiò dron a n'el, couatà dedin l'oumbro que lou soulei, beissont adazi ain d'es Chalonches, faziò pareisse encaro pu niero. Da i arberc, encà endurmì dedin les tampetes penches de brino, la veniò de tont en tont lou sounaiar stoufà d'en picoun. Carque massiero aviò jo viscà lou fuec e la tubo, en escapont da dessout les laouzes dei cubert, mountavo drecho vers lou sel en eslarjont tout entour lou fià aspre de la bouzo bruzà.

Dondo Neno, l'ero na massiero que de matin a la grezegno sooutavo en tero d'ei liech per far soun cassinoi e netear lou bestiam e la trasso.

Soun arberc ero rambà a la viò e, en veiont per la fenestro Steve que passavo, i ero sourtiò de fouoro en s'estregnont dedin sa plarino "Boun jour Steve; aribes-tu? Marì vai esse countento de te vèire; pàouro fremo! I trebulo decò jo e lou moument s'aprocho elo pa ver? ". "E vouì, dondo Neno", aviò respoundù Steve en apuiont la cabasso ei mur de la court. "Lou pichot devariò nàisse un d'aquisti jour, lei propi papus lou judissi de leissar Marì souleto: Agnes fai prou soque i pol ma lei encà en meinà, que vouloou....Auro istou mi eissì; d'ei temp a faou en paou de fen". "Sui countento que te fermes eissì; coumo acò sui pu tranquilo meme mi en sabont aquelo fremo pa ton souleto. Coumo vailo a la ruà?". "Sempre istes dondo Neno; onssi, sempre piri: i sooudà von e venoun; i dizoun que st'ooutoun l'aribarè de brut, ma en tont lou brut i lou fon is; figurasse que i laissoun i mul arage a traves di Pra de l'Alp e fin dedin les champà d'uerge! E en pol pa lour dir ren; sabè ben coumo lei... i nous tratoun coumo se foussoun de nemis". "Ou sai Steve; maleirouzament lei coumo acò; nous chal mac pensar que tout acò fenisse en bel jour e que lou Bon Dioou nous ajué...". "'N' aven da bezougn, dondo Neno" aviò respoundù Steve en tournont s'enchaminar. "Mi auro vous laissou; pourtasse ben e ...magaro venou pei vous sounar semot que l'aribo l'ouro..."."Ven sensso geno; soque sui bouono ou faou voulentier...lei pa lou premier bot que ajuoou na creatura a naisse!".

Steve aviò remerssià la massiero oubé en sourire de recouneissensso e al aviò erpres lou chamin vers soun arberc que pareissiò jo, amoun, en paou pu 'n assus, dessout en rouchounet que lou soulei beizavo apeno en fazont luzernear la peiro rousso. Dondo Neno l'aviò guinchà s'erlugnar, quin dessout sa cabasso, e i aviò sentù dedin ie na grondo peno per aquel jouve desbiandù da la fourtuno e tourmentà da i crussi e que puro ero sempre gentil e ajuont oubé tuchi. I l'avio acoumpagnà penssieroujo oubè l'esgart fin que i l'aviò vist scazi aribà, e alouro i ero tournà dedin a countinuar si viroui apres s'esse schooudà les mon freides sei pichot fuec de bouzes.

Steve aviò slounjà lou pas en se leissont a les espales les oumbres freides dei quiot e al aviò pres lou vioulet jo souleià que mountavo assus de sa mountagno. L'arberc ero aquì a dui pas; les laouzes encà umites de rouzà luzion dessout lou soulei jo chaout. Dron l'uis, dedin en cantoun erparà, na jolio fìheto de noou ou des an penchenavo adazi si lonc pel biount que l'aire scardasseavo ain de l'eissino en s'amouzont oubé aquie fil d'or que d'eissì a moument serion stà erbeì dedin na grosso tresso. Steve s'ero aprouchà sensso esse vist e ei s'ero fermà a guerdiar la fìheto oubé soun esgart tranquile. Coumo i erssemeavo a Marì! Bioundo e jolio coumo n' ongel, i aviò l'esgart judissious e les manieres pienes de gaoubi de na fremeneto.

"Boun jour Agnes; soou tuchi en pioto? ".

"Papà!" aviò crià la fìheto en couront vers Steve oubé l'aire jouious. "Papà, coumo sui countento de vous veire eissì! Sten tuchi ben; mamà preparo lou fuec e Tougneto duerm encaro!". Steve aviò sarà dedin si bras la fìheto festouzo e, dei temp, Marì en oouvont a parlar, aviò dubert l'uis en se fazont avonti coumo delibrà d'en pes en lou veiont aribar, pressà di dir, di demandar tontes cozes ma encapablo de durbir goulo mentre i se saravo dedin si bras, oubé Agnes, en cherchont decò ie na careso, en cherchont en courage en tren de l'abandounar. I eroun stà en moument coumo acò, i cor que bation un vezin a l'aoutre, enfin i eroun entrà dedin l'arberc, dedin la paouro bastisso enté l'amour seren e la grondo afessioun d'aquelo famiheto uniò semeavo schooudar les vieies muraies grizes e freides. Steve aviò poouzà la cabasso e dabort ei s'ero quinà sus en liechet enté durmiò na pichoto de scazi sieis ann: Tougneto sa fìho pu jouve.

 

  1. Lou doun de Son Loouren

 

Marì batiò lou bur dron l'uis de l'arberc en viront souvent i uei ain dei quiot enté Steve seavo e les fihes stendion i andagn en gardont les vaches que peission tranquiles ei mes di quiapeiret de la jairo. L'ero na jolio fremo bioundo de l'aire piazent. La groussesso aviò rendù pezouges, ma pa enbrutì, les fourmes de soun corp. Lou moure delicat s'esquiarzissiò d'en sourire grassious coumo aquel de na Madono tuchi bot que soun esgart se poouzavo su Steve e les fihes que chacharavoun en travaiont ain dei quiot. I aviò 29 ann e da 11 i ero marià oubé Steve: i ero neisuò dedin na famiho enté la mancavo pa la meinà e i ero stà slevà a la duro en enprenont ben vite a trebular per viooure coumo toutes fremes de la mountagno.

En espouzont Steve, les trebulassioun avion pa segur quità e la vito aviò countinuà a ese duro coumo dron, ma lou ben que i se voulion lour ajuavo a afrountar lou destin e lour dounavo la fouorsso de sourire a n'un demon sempre istes. Pei l'ero aribà la meinà; lou travai e les privassioun eroun ooumentà ma tetun en sourire, na caresso de lour fihetes valiò ben tout acò, e Marì demandavo pa d'are a la vito que de countinuar a partajar oubé i sioou i maigre piazer e i tonti crussi de lour ezistonsso.

E lei propi perqué i trebulavo a s'esmaginar na vito diferento d'aquesto que l'aoutre sero i aviò pa fach de festes en oouvont Steve i parlar de la letro que lour aviò pourtà Tofou Galion en aribont d'en Fronsso. L'ero na letro de Jacou, lou couzin de Steve, que ero frà dedin en counvent pa ben luegn de Digno.

Frà Jacou, ben couneisù en Prouvensso e en Piemount per i studi que ei faziò sus les erbes medichinales de mountagno, lour diziò sus la letro que ei seriò vengù a Blins lou mes d'avoust per rende vizìto a soun paire e a sa maire tuchi dui viei e magagnù. Ei lour parlavo d'en ric marchont qu'aviò en gront coumersse de pel e d'estras. Al l'aviò bezougn de carcun fiable, coumo Steve, per far lou peleaire e coumo Marì per ajuar la damo dedin la grondo meizoun. Agnes oriò pougù gardar i meinà pichot de la famiho. I serion stà gouvernà e ben pagà, i orion fin counchedù a Steve de venir a Blins dui mes d'istà per ajuar si viei parent. Tout acò diziò la letro de frà Jacou, e Steve, sensso se moustrar ton chaout, ei penssavo que la seriò pa stà mal de tentar, fousselò puro mac per dui ou tres ann, aquel tont que lour oriò permetù de se far carque soldi e slevar Agnes de na maniero meiouro. Marì pouiò pa i troubar tuchi tort ma a penssar de leissar Blins, d'enté i ero pa james sourtiò, la i veniò en gros stent e la i faziò ben esmai de leissar sa gent e ses abitudes per anar sout a padroun. Lei prou ver; Agnes seriò creissuò dedin na famiho richo e i oriò de segur enpres de cozes utiles ma vai saber coumo l'ero de mal s'adatar a na vito ton diferento meme se pu jolio. Gnonco l'ideo de gagnar de soldi l'encourajavo pa gaire; e puro i n'avion bezougn mai que james: l'aviò pa gaire que i avion bastì la meizoun de la ruà e i avion encà ben de debi da pagar....E auro la famiho anavo mai ooumentar...Na nouvelo goulo se seriò jouncho a 's aoutres, e ben vite meme....

Marì, aquel matin de Son Loouren s'ero levà que i stavo jo paren ben, ma i aviò pa encà dich ren a Steve en sabont coumo a l'aviò poour que lou moument aribes! Talament poour que en lei penssont la i veniò da sourire: ie aviò mai de courage, i aviò pa trebulà i aoutre dui bot e meme auro la seriò stà la memo cozo.

Paoure Steve!... Brave coumo lou jour, ei se crussiavo sempre per tuchi....Ma auro, malgrà ie, i seriò stà oublijà de lou sounar... Lou lourdim que i faziò pasar de bares nieres dron i uei e les chissagnes que de tont en tont la piavoun sei batouiroun de la brouiro, voulion ben dir que lou moument tarzavo pa d'aribar e que ben vite i seriò stà n'aoutre bot maire. Coumo Dioou vol, lou bur ero bele fenì de far e Marì aviò pourtà la brouiro dedin; Steve, coustumà a far lou cassinoi, oriò gavà lou bur e ei l'oriò fach passar dedin lou moiou.

Lou soulei, aout ei mes d'ei sel, pegnò d'oumbres courtes d'entour i codou e les roches. L'ero scazi messejour. En se mourdont les bouches per pa criar ton que lou mal ero pù fort, Marì aviò preparà lou fuec. I oriò fach eschooudar en paou de pooutìes d'uerge que avanssavoun d'ei matin: per les fihes l'oriò decò agù na conto de bur fresc. I aviò atendù que lou fuec, ben visc, oougues poussà viò la tubo aspro a traves les laouzes dei cubert, pei en se rezont ei mur de l'arberc, i ero sourtiò de fouoro e, dei mentre que i se preparavo a sounar Steve, i l'aviò vist virà assus, en tren a guediar vers ie.

Lou soulei batiò chaout e luzent sus i rouchoun e les casses, e Steve s'ero pourtà na mon duberto ei front a s'erparar i uei. I aviò pa fach a temp a lou sounar: en la veiont rezuò ei mur a l'aviò d'abort capì soque se passavo e, en se betont a coure assus dei quiot, a l'ero ben vite aribà d'acont a n'ie que lou guinchavo s'aprouchar muto, sempre apuià ei mur; muto perqué i sabiò que Steve aviò capì e que l'aviò pa bezougn de parlar. En tranfiont per la coursso, l'ome s'ero avezinà a sa fremo que enfin aviò bisbià "Steve....creiou que lou moument sié pa luegn; laissemé pa souleto....Ajuome Steve.... Laissemé pa souleto..Ajuome...".

Aqueles paroles sounaiavoun dedin la testo de Steve e na cozo stronjo ero en tren a capitar dedin el. Na cozo que l'estounavo e lou sourpreniò. La poour que per ton de temp l'aviò tourmentà despareissiò dron les paroles d'aquelo fremo sufronto e ei se sentiò lou courage naisse, creisse dedin el: lou courage de pouisser dir sincherament a sa fremo "Vouì Marì; mi te sui d'acont per pa te leisar trebular souleto, per te dir que tout anarè ben...ou sai, ou sentou...". E a l'ero segur que coumo acò la seriò stà perqué les roches que embrassavoun lou valoun en luzont dessout lou soulei, i ou dizion, i ou erpetion coumo l'ertunir de la vous grondo e misteriouzo de la naturo. La vous d'aquel Dioou, creatour d'es mountagnes, que oriò beneizì lou miracle de la vito que ei mes d'aqueles mountagnes se seriò erpetù. E Steve, finalament calme e segur d'el coumo al ero papus stà drierament, aviò ajuà oubé duech Marì a s'aboouzar sei liech. Pei a l'ero tournà de fouoro per sounar les fihes a brendo: les vaches chooumavoun tranquiles e per na pesso les serion stà braves. Agnes e Tougneto guerdiavoun jo asus vers l'arberc: l'apetit gaiart de lour age lour faziò stentar de venir a brendo. Steve lour aviò fach en segn oubé la mon, e toutes doues s'eroun betà a coure, countentes que la fous ouro de minjar.

Dondo Neno s'ero rendù counte que carcaren anavo pa a n'acò de Steve. Da soun arberc, i n'aviò vist prou per capir que magaro d'eissì a pa gaire i orion agù bezougn d'ie, e alouro, en veiont Steve de fouoro que atendiò les fihes, i l'aviò sounà: "Steve! Steve! Alo carcaren de noou?" "Vouì, dondo Neno...e se pouguesse venir assus me sentarioou pu tranquile..."." A venou Steve, venou d'abort". E, en dizont a si pichot nebou de star brave i aviò tacà ooutro, vers i arberc de Pra Carlevar, per sounar ses coumaire, Chafreo e Iot, decò massieres a n'aquelo mountagno. Les tres fremes s'eroun enchaminà scazi de coursso en tenont enterooussà lour longes gouneles per pa s'entrambear assus dei vioulet dezaruì. Les s'eroun prezentà sus l'uis de l'arberc dei temp que les fihes de Steve courion jo defouoro oubé lour conto de bur. Mamà stavo pa ben e chariò la leissar erlamar. Tougneto, de boun coumont coumo i ero sempre, aviò pa demandà mai e, tout en minjont sa conto, i aviò tacà chavar la tero oubé en berchot per cherchar lou charbounet de Son Loouren que i aoutre an i ero pa james aribà a troubar. Ma aquest'on i ero pu grondo e i ero seguro que lou charbounet seriò sooutà fouoro. Agnes, ben que jouve, capissiò soque ero en tren a capitar: meme se i couneissiò pa encà tout sei mistere de la vito i n'en sabiò prou per aver poour e per sentir tonto peno de l'esgart sfraià de sa maire.

Dedin sa testo, milo idees passavoun e repassavoun: i se sentiò souleto e dementià e i oriò vourgù pouisser far coumo sa soureto que s'amuzavo tranquilo. L'esgart perdù dedin lou vueit, Agnes embrassavo soun agnelet bionc, na bestieto doumesteo e mistouzo coumo en chanet, que la quitavo pa d'en pas, de pei que i l'avion destrià. El decò ero soulet coumo ie en aquest moument; el decò se sentiò de trop dedin tout aquel vai e ven de gent. Nuià que sa patrouneto s'amuzavo pa oub'el, l'agnel aviò mourdù la conto que Agnes se dementiavo de minjar e, finalament, la fìheto ero sourtiò da ses idees e, en oousont i uei i aviò vist soun paire, ferm sus la remo de l'uis mentre que dondo Neno diziò: "Vai puro tranquile Steve: lei pa encà ben lou moument...Se la na da bezougn te sounen pei; vai puro".

E alouro, Steve aviò pres ses doues fihes per mon e a l'aviò beissà ain dei vioulet, vers les vaches que chooumavoun encaro. Dedin aquie seicontou jour de bel temp a l'aviò ertirà na cucho de fen qu'ei vouliò ensselar a la grangeto. Oubé les fihes al ero intrà dedin la pichoto bastisso e mentre que ei desliavo les trousses éles scardasseavoun e pistavoun lou fen sus la selo. Tougneto, pieno de vueio de rire, brandavo oubé sa sore en la curbont de fen oudourous e alouro, en paou per bot, Agnes aviò dementià si crussi e soun rire jouious s'ero mesquià a n'aquel de l'aoutro fìheto.

Steve s'ero navizà d'acò e ei n'ero 'stà countent. La i faziò de peno que Agnes fous ton tristo: paouro meinà; i aviò jo fach tout soque i pouiò st'istà per ajuar sa maire, e de bot, en paou perqué i ero guchiò mouorto en paou perqué i restavo penssieroujo e tristo, i semeavo creissuò n'ont ouro, sensso pus vueio de s'amuzar.

I picoun des vaches que se deschooumavoun avion sounà les pastouretes: Steve les aviò mandà en pasturo e el aviò fenì d'ensselar soun fen. Da l'arberc la veniò pa segn de vito; Steve ero sus les espines ma a l'encalavo pa anar assus veire soque la se passavo. Ei sabiò que ei seriò mac stà d'embaras; miei leissar les massieres tranquiles. E en tont a l'ero tournà sear, andagn apres andagn. E lou temp tetun ero pasà meme se pion. Les oumbres dei sero s'eslarjavoun nieres ain des Chalonches fin a erjougne lou quiot en endurmont la naturo e les cozes dedin l'escur de lour caresso freido. L'ero ouro d'anar enquiaoure e Steve e les fihes avion endraià les vaches vers l'arberc. En se quinont per soubrar la remo dei pichot uis de la trasso, Steve aviò oouvì en paou de tramenà dessoubre, dedin l'arberc, e alouro a l'aviò stachà vite les vaches a lour crupio en racoumandont les doues fihes d'estar braves, aquì, assetà sus lour liechet que a l'aviò meirà a la trasso lou sero de dron.

E a l'ero sourtì per mountar dessoubre, per esse finalment oubé Marì; lou cor bataiavo fort dedin soun estomi. Oubé na mon jo sus la maneo de l'uis, Steve s'ero fermà e aviò virà i uei a la pouncho d'es roches, eilamoun enté les se perdion dedin lou sel viooulet, eilamoun enté tuchi sero 'n estelo s'aviscavo dron que les aoutres, pu belo que les aoutres, a luze propi dessoubre l'arberc. I uei de Steve s'eroun fermà sus aquelo perlo penduò dedin la grondo voouto dei sel e alouro ses labres s'eroun dubertes per bisbiar pianet na priero; na priero a l'estelo, na priero ei Dioou de l'univers entier. E lou pichot lume dei sel i aviò counfirmà tout lou courage que a l'aviò proumetù a Marì; lou courage di esse d'acont, sempre, sus la viò spinouzo de la vito. Alouro a l'aviò poussà l'uis, en entront calme e dessidà. Les massieres eroun toutes d'entour lou liech ei lume de la pichoto lucherno a ueli e d'es breisseles d'en joli fuec enté buiò na brounssà d'àigo: en bramet court ma jo ardì e fort aviò fermà Steve enté a l'ero en l'avertont que la famiho ero creissuò.

En oouvont l'uis se durbir, dondo Neno s'ero virà vers Steve en dizont: "Lei anà tout ben, Steve; isto tranquile... la vous es aribà en joli fihet sensso far trebular trop sa maire... I betà nom Juon, paer, coumo soun paiei...". "Vouì; Juon... Juon Loouren", aviò respoundù Steve, scazi sensso se navizar d'aver parlà, sensso esse boun se rende counte que tout ero fach e que aquelo vouzeto gaiardo l'ero aquelo de soun fi, neissù eilamoun ei founs de na mountagno. E coumo acò, ei lume de na lucherno stubio, mentre que a la trasso les vaches rugnavoun en fazont bataiar adaziot i picoun, lou pichot Loouren ero vengù ei mount, tal a coual coumo 17 siecle dron ero neissù Gezù, lou Fi de Dioou.

Steve s'ero avezinà ei liech: en paou quin sus el meme ei guinchavo stounà aquel miracle se repete sensso pouisser ertenir doues grosses grimes que ravioulavoun adazi ain d'es jaoutes barbues. Dedin sa ment creonto e devoto la passavo l'imajo de la crupio de Betleem e na priero de recouneissensso e gramassis mountavo vers aquel Sont Meinà que aviò vourgù venir ei mount dessout na balmo freido, paoure coumo Juon Loouren que les massieres venion de poouzar dedin i bras de sa maire. Marì, jolio coumo la Vierjo, se quinavo sus sa creaturo e, ben que i fous abatuò e sufronto, en sourire pareissiò sus soun moure spali. Sa mon stregnò aquelo de Steve per dounar e cherchar courage e, coumo per fenir aquel cadre d'amour, Agnes, que ero sourtiò pianet da la trasso, s'aprouchavo smeravià sus la pouncho di pe en embrassont soun agnelet, statueto vivento d'aquel Deineal ei mes des roches.

Mentre que tuchi, erbeì dentour la paiolo, coumenssavoun a schambiar carque parolo e carque sourire, dondo Neno, fremo pountigliouzo e seguro d'ie, ero pa encà a la fin de soun obro. Soun animo religiouzo i diziò que l'arestavo encà da far na cozo empourtonto e que chariò la far vite. Dessidà coumo sempre, i ero anà vers la brounssino pieno d'aigo e i n'aviò verssà n'estis dedin na bolo. Tuchi eroun stà quiet e avion apuià en janoui en tero mentre la massiero, en oousont i uei vers en signet de la Vierjo, stachà a la testiero dei liech, aviò dich oubé sa vous quiaro e forto: "O Vierjo sonto, Maire de Dioou, beneizis l'aigo puro de la mountagno e fai que en coulont sei front d'aquesto creaturo i la purifié dei pechà qui a artà e i la rende meritablo de veire lou lume de ta grazio". En se quinont sei meinot i l'aviò bagnà na frizo sus la testo oubé l'aigo fresco de la soursso: "Loouren, mi te bateoou ei nom dei Paire, dei Fi e de l'Esprit Sont....".

Defouoro, dedin la nuech jo soumbro, les grimes de Son Loouren cheion a traves lou sel seren ma, amoun a la pouncho de la rocho, pu groso, pu luzento que ses sore, l'estelo de tuchi sero veiavo sei viei arberc e sus la cuneto novo.

 

 

  1. L'arberc dei Rouchoun Rous

 

Lou soulei ensimavo en tegnont d'or la pouncho d'es mountagnes aquelo matinà dei 6 d'avoust 1743. Dedin l'àire fresc dei matin, 'n ome, quin dessout lou pes de sa cabasso, mountavo la driero pouà de la Chabaliero.

Steve Garnier pouiò aver na trentenasso d'an ma la duro vito de privassioun e de travai qu'ei faziò per mantenir la famiho l'avion vieì 'n ont ouro. Pu jouve de catre meinà, i sioou l'avion pa agrevessì: soun fraire premier ero mouort encà pichot e l'àoutre, Toni, pu viei d'el de carque an, ero pa james està erveious. Ei trebulavo a tirar avonti e a l'ero souvent malate.

Marguerito, sa sore, aviò 46 ann e i s'ero pa marià: l'ero stà na jòlio fiho e la i aviò pa mancà i partì, ma sa grondo afessioun per la famiho, lou bezougn d'ajuar sa maire, paren forto, a slevar la meinà, aviò fenì per la far dementiar d'esse jouve e i garssoun, en paou per bot, s'èroun erlugnà d'aquelo fiho souvent tristo e sempre pieno de travai. Steve aviò douze an de monc qu'ie e per el, mai que na sore, l'ero sta na maire. I l'avio slevà oubé mai d'afessioun que i àoutre, beloou per lou besougn de sentir sus soun moure la caresso legiero de na pichoto maneto. E a l'ero creissù d'acont a n'aquelo fiho pieno de passiensso e de gaoubi e ei s'ero afessiounà a n'ie sempre de mai mon mon que lou temp passavo. Meme apres s'esse marià, soun afessioun aviò countinuà a l'estachar a Marguerito e ton que a l'aviò de crussi sempre da ie al anavo se cousseiar e cherchar courage.

E aquest-on de crussi maleirouzament ei n'aviò tonti: Marì, sa fremo, que ero neipà atendiò en pichot dedin carque jour. Ei seriò neissù a Travessagn e el aviò poour que aquel moument aribes. L'ero pa lou premier meinà que neissiò eilamoun dedin na mountagno ma tetun ei pouiò pa n'en far a monc de se sentir charn de poulo tuchi bot que ei penssavo a soque oriò pougù aribar se le cozes foussoun pa anà coumo chal.

E vouì; ben de crussi! Ben de mal de testo. Blins ero pien de sooudà. La menassavo na guero oubé la Fronsso e l'aviò dooutres ann que tuchi vivion oubé la poour de veire i Fransses soubrar la frountiero ma la capitavo pa james ren de noou e, d'aquel mentre, la troupo anavo e veniò. Les poussessioun eroun pistà e assacajà; souvent i sooudà se fazion counssegnar fen e paio per i mul en leissont les ieres vueides e i pra oubé les moutes n'aire. En tonti post, coumo ei Pra de l'Alp e dentour lou Sere de Pouont, enté i Piemountes s'eroun fourtifià, en pouiò gnonco anar taiar la poco erbo que restavo. Ben per acò, auro que a l'anavo assus tenir coumpaniò a Marì, a l'oriò fach en paou de fen da ensselar dedin l'arberc e la grangeto enté ei seriò stà ei segur da i sooudà.

La founteto que gourgouiavo d'acont la viò aviò destrach Steve da ses idees. La cabasso pezavo e malgrà l'àire fresc a l'aviò vuèio de tastar la bouono aigo que neissiò dessout i verous. Ei s'ero acachà en poouzont l'àigo dedin lou coup de soun chapel e ei s'ero bagnà les bouches. Na lonjo freissoun i aviò passà per lou corp suà e alouro a l'aviò erpres dabort lou chamin en aribont ben vite a la simo de la pouà. Lou pion de Travessagn s'estendiò dron a n'el, couatà dedin l'oumbro que lou soulei, beissont adazi ain d'es Chalonches, faziò pareisse encaro pu niero. Da i arberc, encà endurmì dedin les tampetes penches de brino, la veniò de tont en tont lou sounaiar stoufà d'en picoun. Carque massiero aviò jo viscà lou fuec e la tubo, en escapont da dessout les laouzes dei cubert, mountavo drecho vers lou sel en eslarjont tout entour lou fià aspre de la bouzo bruzà.

Dondo Neno, l'ero na massiero que de matin a la grezegno sooutavo en tero d'ei liech per far soun cassinoi e netear lou bestiam e la trasso.

Soun arberc ero rambà a la viò e, en veiont per la fenestro Steve que passavo, i ero sourtiò de fouoro en s'estregnont dedin sa plarino "Boun jour Steve; aribes-tu? Marì vai esse countento de te vèire; pàouro fremo! I trebulo decò jo e lou moument s'aprocho elo pa ver? ". "E vouì, dondo Neno", aviò respoundù Steve en apuiont la cabasso ei mur de la court. "Lou pichot devariò nàisse un d'aquisti jour, lei propi papus lou judissi de leissar Marì souleto: Agnes fai prou soque i pol ma lei encà en meinà, que vouloou....Auro istou mi eissì; d'ei temp a faou en paou de fen". "Sui countento que te fermes eissì; coumo acò sui pu tranquilo meme mi en sabont aquelo fremo pa ton souleto. Coumo vailo a la ruà?". "Sempre istes dondo Neno; onssi, sempre piri: i sooudà von e venoun; i dizoun que st'ooutoun l'aribarè de brut, ma en tont lou brut i lou fon is; figurasse que i laissoun i mul arage a traves di Pra de l'Alp e fin dedin les champà d'uerge! E en pol pa lour dir ren; sabè ben coumo lei... i nous tratoun coumo se foussoun de nemis". "Ou sai Steve; maleirouzament lei coumo acò; nous chal mac pensar que tout acò fenisse en bel jour e que lou Bon Dioou nous ajué...". "'N' aven da bezougn, dondo Neno" aviò respoundù Steve en tournont s'enchaminar. "Mi auro vous laissou; pourtasse ben e ...magaro venou pei vous sounar semot que l'aribo l'ouro..."."Ven sensso geno; soque sui bouono ou faou voulentier...lei pa lou premier bot que ajuoou na creatura a naisse!".

Steve aviò remerssià la massiero oubé en sourire de recouneissensso e al aviò erpres lou chamin vers soun arberc que pareissiò jo, amoun, en paou pu 'n assus, dessout en rouchounet que lou soulei beizavo apeno en fazont luzernear la peiro rousso. Dondo Neno l'aviò guinchà s'erlugnar, quin dessout sa cabasso, e i aviò sentù dedin ie na grondo peno per aquel jouve desbiandù da la fourtuno e tourmentà da i crussi e que puro ero sempre gentil e ajuont oubé tuchi. I l'avio acoumpagnà penssieroujo oubè l'esgart fin que i l'aviò vist scazi aribà, e alouro i ero tournà dedin a countinuar si viroui apres s'esse schooudà les mon freides sei pichot fuec de bouzes.

Steve aviò slounjà lou pas en se leissont a les espales les oumbres freides dei quiot e al aviò pres lou vioulet jo souleià que mountavo assus de sa mountagno. L'arberc ero aquì a dui pas; les laouzes encà umites de rouzà luzion dessout lou soulei jo chaout. Dron l'uis, dedin en cantoun erparà, na jolio fìheto de noou ou des an penchenavo adazi si lonc pel biount que l'aire scardasseavo ain de l'eissino en s'amouzont oubé aquie fil d'or que d'eissì a moument serion stà erbeì dedin na grosso tresso. Steve s'ero aprouchà sensso esse vist e ei s'ero fermà a guerdiar la fìheto oubé soun esgart tranquile. Coumo i erssemeavo a Marì! Bioundo e jolio coumo n' ongel, i aviò l'esgart judissious e les manieres pienes de gaoubi de na fremeneto.

"Boun jour Agnes; soou tuchi en pioto? ".

"Papà!" aviò crià la fìheto en couront vers Steve oubé l'aire jouious. "Papà, coumo sui countento de vous veire eissì! Sten tuchi ben; mamà preparo lou fuec e Tougneto duerm encaro!". Steve aviò sarà dedin si bras la fìheto festouzo e, dei temp, Marì en oouvont a parlar, aviò dubert l'uis en se fazont avonti coumo delibrà d'en pes en lou veiont aribar, pressà di dir, di demandar tontes cozes ma encapablo de durbir goulo mentre i se saravo dedin si bras, oubé Agnes, en cherchont decò ie na careso, en cherchont en courage en tren de l'abandounar. I eroun stà en moument coumo acò, i cor que bation un vezin a l'aoutre, enfin i eroun entrà dedin l'arberc, dedin la paouro bastisso enté l'amour seren e la grondo afessioun d'aquelo famiheto uniò semeavo schooudar les vieies muraies grizes e freides. Steve aviò poouzà la cabasso e dabort ei s'ero quinà sus en liechet enté durmiò na pichoto de scazi sieis ann: Tougneto sa fìho pu jouve.

 

  1. Lou doun de Son Loouren

 

Marì batiò lou bur dron l'uis de l'arberc en viront souvent i uei ain dei quiot enté Steve seavo e les fihes stendion i andagn en gardont les vaches que peission tranquiles ei mes di quiapeiret de la jairo. L'ero na jolio fremo bioundo de l'aire piazent. La groussesso aviò rendù pezouges, ma pa enbrutì, les fourmes de soun corp. Lou moure delicat s'esquiarzissiò d'en sourire grassious coumo aquel de na Madono tuchi bot que soun esgart se poouzavo su Steve e les fihes que chacharavoun en travaiont ain dei quiot. I aviò 29 ann e da 11 i ero marià oubé Steve: i ero neisuò dedin na famiho enté la mancavo pa la meinà e i ero stà slevà a la duro en enprenont ben vite a trebular per viooure coumo toutes fremes de la mountagno.

En espouzont Steve, les trebulassioun avion pa segur quità e la vito aviò countinuà a ese duro coumo dron, ma lou ben que i se voulion lour ajuavo a afrountar lou destin e lour dounavo la fouorsso de sourire a n'un demon sempre istes. Pei l'ero aribà la meinà; lou travai e les privassioun eroun ooumentà ma tetun en sourire, na caresso de lour fihetes valiò ben tout acò, e Marì demandavo pa d'are a la vito que de countinuar a partajar oubé i sioou i maigre piazer e i tonti crussi de lour ezistonsso.

E lei propi perqué i trebulavo a s'esmaginar na vito diferento d'aquesto que l'aoutre sero i aviò pa fach de festes en oouvont Steve i parlar de la letro que lour aviò pourtà Tofou Galion en aribont d'en Fronsso. L'ero na letro de Jacou, lou couzin de Steve, que ero frà dedin en counvent pa ben luegn de Digno.

Frà Jacou, ben couneisù en Prouvensso e en Piemount per i studi que ei faziò sus les erbes medichinales de mountagno, lour diziò sus la letro que ei seriò vengù a Blins lou mes d'avoust per rende vizìto a soun paire e a sa maire tuchi dui viei e magagnù. Ei lour parlavo d'en ric marchont qu'aviò en gront coumersse de pel e d'estras. Al l'aviò bezougn de carcun fiable, coumo Steve, per far lou peleaire e coumo Marì per ajuar la damo dedin la grondo meizoun. Agnes oriò pougù gardar i meinà pichot de la famiho. I serion stà gouvernà e ben pagà, i orion fin counchedù a Steve de venir a Blins dui mes d'istà per ajuar si viei parent. Tout acò diziò la letro de frà Jacou, e Steve, sensso se moustrar ton chaout, ei penssavo que la seriò pa stà mal de tentar, fousselò puro mac per dui ou tres ann, aquel tont que lour oriò permetù de se far carque soldi e slevar Agnes de na maniero meiouro. Marì pouiò pa i troubar tuchi tort ma a penssar de leissar Blins, d'enté i ero pa james sourtiò, la i veniò en gros stent e la i faziò ben esmai de leissar sa gent e ses abitudes per anar sout a padroun. Lei prou ver; Agnes seriò creissuò dedin na famiho richo e i oriò de segur enpres de cozes utiles ma vai saber coumo l'ero de mal s'adatar a na vito ton diferento meme se pu jolio. Gnonco l'ideo de gagnar de soldi l'encourajavo pa gaire; e puro i n'avion bezougn mai que james: l'aviò pa gaire que i avion bastì la meizoun de la ruà e i avion encà ben de debi da pagar....E auro la famiho anavo mai ooumentar...Na nouvelo goulo se seriò jouncho a 's aoutres, e ben vite meme....

Marì, aquel matin de Son Loouren s'ero levà que i stavo jo paren ben, ma i aviò pa encà dich ren a Steve en sabont coumo a l'aviò poour que lou moument aribes! Talament poour que en lei penssont la i veniò da sourire: ie aviò mai de courage, i aviò pa trebulà i aoutre dui bot e meme auro la seriò stà la memo cozo.

Paoure Steve!... Brave coumo lou jour, ei se crussiavo sempre per tuchi....Ma auro, malgrà ie, i seriò stà oublijà de lou sounar... Lou lourdim que i faziò pasar de bares nieres dron i uei e les chissagnes que de tont en tont la piavoun sei batouiroun de la brouiro, voulion ben dir que lou moument tarzavo pa d'aribar e que ben vite i seriò stà n'aoutre bot maire. Coumo Dioou vol, lou bur ero bele fenì de far e Marì aviò pourtà la brouiro dedin; Steve, coustumà a far lou cassinoi, oriò gavà lou bur e ei l'oriò fach passar dedin lou moiou.

Lou soulei, aout ei mes d'ei sel, pegnò d'oumbres courtes d'entour i codou e les roches. L'ero scazi messejour. En se mourdont les bouches per pa criar ton que lou mal ero pù fort, Marì aviò preparà lou fuec. I oriò fach eschooudar en paou de pooutìes d'uerge que avanssavoun d'ei matin: per les fihes l'oriò decò agù na conto de bur fresc. I aviò atendù que lou fuec, ben visc, oougues poussà viò la tubo aspro a traves les laouzes dei cubert, pei en se rezont ei mur de l'arberc, i ero sourtiò de fouoro e, dei mentre que i se preparavo a sounar Steve, i l'aviò vist virà assus, en tren a guediar vers ie.

Lou soulei batiò chaout e luzent sus i rouchoun e les casses, e Steve s'ero pourtà na mon duberto ei front a s'erparar i uei. I aviò pa fach a temp a lou sounar: en la veiont rezuò ei mur a l'aviò d'abort capì soque se passavo e, en se betont a coure assus dei quiot, a l'ero ben vite aribà d'acont a n'ie que lou guinchavo s'aprouchar muto, sempre apuià ei mur; muto perqué i sabiò que Steve aviò capì e que l'aviò pa bezougn de parlar. En tranfiont per la coursso, l'ome s'ero avezinà a sa fremo que enfin aviò bisbià "Steve....creiou que lou moument sié pa luegn; laissemé pa souleto....Ajuome Steve.... Laissemé pa souleto..Ajuome...".

Aqueles paroles sounaiavoun dedin la testo de Steve e na cozo stronjo ero en tren a capitar dedin el. Na cozo que l'estounavo e lou sourpreniò. La poour que per ton de temp l'aviò tourmentà despareissiò dron les paroles d'aquelo fremo sufronto e ei se sentiò lou courage naisse, creisse dedin el: lou courage de pouisser dir sincherament a sa fremo "Vouì Marì; mi te sui d'acont per pa te leisar trebular souleto, per te dir que tout anarè ben...ou sai, ou sentou...". E a l'ero segur que coumo acò la seriò stà perqué les roches que embrassavoun lou valoun en luzont dessout lou soulei, i ou dizion, i ou erpetion coumo l'ertunir de la vous grondo e misteriouzo de la naturo. La vous d'aquel Dioou, creatour d'es mountagnes, que oriò beneizì lou miracle de la vito que ei mes d'aqueles mountagnes se seriò erpetù. E Steve, finalament calme e segur d'el coumo al ero papus stà drierament, aviò ajuà oubé duech Marì a s'aboouzar sei liech. Pei a l'ero tournà de fouoro per sounar les fihes a brendo: les vaches chooumavoun tranquiles e per na pesso les serion stà braves. Agnes e Tougneto guerdiavoun jo asus vers l'arberc: l'apetit gaiart de lour age lour faziò stentar de venir a brendo. Steve lour aviò fach en segn oubé la mon, e toutes doues s'eroun betà a coure, countentes que la fous ouro de minjar.

Dondo Neno s'ero rendù counte que carcaren anavo pa a n'acò de Steve. Da soun arberc, i n'aviò vist prou per capir que magaro d'eissì a pa gaire i orion agù bezougn d'ie, e alouro, en veiont Steve de fouoro que atendiò les fihes, i l'aviò sounà: "Steve! Steve! Alo carcaren de noou?" "Vouì, dondo Neno...e se pouguesse venir assus me sentarioou pu tranquile..."." A venou Steve, venou d'abort". E, en dizont a si pichot nebou de star brave i aviò tacà ooutro, vers i arberc de Pra Carlevar, per sounar ses coumaire, Chafreo e Iot, decò massieres a n'aquelo mountagno. Les tres fremes s'eroun enchaminà scazi de coursso en tenont enterooussà lour longes gouneles per pa s'entrambear assus dei vioulet dezaruì. Les s'eroun prezentà sus l'uis de l'arberc dei temp que les fihes de Steve courion jo defouoro oubé lour conto de bur. Mamà stavo pa ben e chariò la leissar erlamar. Tougneto, de boun coumont coumo i ero sempre, aviò pa demandà mai e, tout en minjont sa conto, i aviò tacà chavar la tero oubé en berchot per cherchar lou charbounet de Son Loouren que i aoutre an i ero pa james aribà a troubar. Ma aquest'on i ero pu grondo e i ero seguro que lou charbounet seriò sooutà fouoro. Agnes, ben que jouve, capissiò soque ero en tren a capitar: meme se i couneissiò pa encà tout sei mistere de la vito i n'en sabiò prou per aver poour e per sentir tonto peno de l'esgart sfraià de sa maire.

Dedin sa testo, milo idees passavoun e repassavoun: i se sentiò souleto e dementià e i oriò vourgù pouisser far coumo sa soureto que s'amuzavo tranquilo. L'esgart perdù dedin lou vueit, Agnes embrassavo soun agnelet bionc, na bestieto doumesteo e mistouzo coumo en chanet, que la quitavo pa d'en pas, de pei que i l'avion destrià. El decò ero soulet coumo ie en aquest moument; el decò se sentiò de trop dedin tout aquel vai e ven de gent. Nuià que sa patrouneto s'amuzavo pa oub'el, l'agnel aviò mourdù la conto que Agnes se dementiavo de minjar e, finalament, la fìheto ero sourtiò da ses idees e, en oousont i uei i aviò vist soun paire, ferm sus la remo de l'uis mentre que dondo Neno diziò: "Vai puro tranquile Steve: lei pa encà ben lou moument...Se la na da bezougn te sounen pei; vai puro".

E alouro, Steve aviò pres ses doues fihes per mon e a l'aviò beissà ain dei vioulet, vers les vaches que chooumavoun encaro. Dedin aquie seicontou jour de bel temp a l'aviò ertirà na cucho de fen qu'ei vouliò ensselar a la grangeto. Oubé les fihes al ero intrà dedin la pichoto bastisso e mentre que ei desliavo les trousses éles scardasseavoun e pistavoun lou fen sus la selo. Tougneto, pieno de vueio de rire, brandavo oubé sa sore en la curbont de fen oudourous e alouro, en paou per bot, Agnes aviò dementià si crussi e soun rire jouious s'ero mesquià a n'aquel de l'aoutro fìheto.

Steve s'ero navizà d'acò e ei n'ero 'stà countent. La i faziò de peno que Agnes fous ton tristo: paouro meinà; i aviò jo fach tout soque i pouiò st'istà per ajuar sa maire, e de bot, en paou perqué i ero guchiò mouorto en paou perqué i restavo penssieroujo e tristo, i semeavo creissuò n'ont ouro, sensso pus vueio de s'amuzar.

I picoun des vaches que se deschooumavoun avion sounà les pastouretes: Steve les aviò mandà en pasturo e el aviò fenì d'ensselar soun fen. Da l'arberc la veniò pa segn de vito; Steve ero sus les espines ma a l'encalavo pa anar assus veire soque la se passavo. Ei sabiò que ei seriò mac stà d'embaras; miei leissar les massieres tranquiles. E en tont a l'ero tournà sear, andagn apres andagn. E lou temp tetun ero pasà meme se pion. Les oumbres dei sero s'eslarjavoun nieres ain des Chalonches fin a erjougne lou quiot en endurmont la naturo e les cozes dedin l'escur de lour caresso freido. L'ero ouro d'anar enquiaoure e Steve e les fihes avion endraià les vaches vers l'arberc. En se quinont per soubrar la remo dei pichot uis de la trasso, Steve aviò oouvì en paou de tramenà dessoubre, dedin l'arberc, e alouro a l'aviò stachà vite les vaches a lour crupio en racoumandont les doues fihes d'estar braves, aquì, assetà sus lour liechet que a l'aviò meirà a la trasso lou sero de dron.

E a l'ero sourtì per mountar dessoubre, per esse finalment oubé Marì; lou cor bataiavo fort dedin soun estomi. Oubé na mon jo sus la maneo de l'uis, Steve s'ero fermà e aviò virà i uei a la pouncho d'es roches, eilamoun enté les se perdion dedin lou sel viooulet, eilamoun enté tuchi sero 'n estelo s'aviscavo dron que les aoutres, pu belo que les aoutres, a luze propi dessoubre l'arberc. I uei de Steve s'eroun fermà sus aquelo perlo penduò dedin la grondo voouto dei sel e alouro ses labres s'eroun dubertes per bisbiar pianet na priero; na priero a l'estelo, na priero ei Dioou de l'univers entier. E lou pichot lume dei sel i aviò counfirmà tout lou courage que a l'aviò proumetù a Marì; lou courage di esse d'acont, sempre, sus la viò spinouzo de la vito. Alouro a l'aviò poussà l'uis, en entront calme e dessidà. Les massieres eroun toutes d'entour lou liech ei lume de la pichoto lucherno a ueli e d'es breisseles d'en joli fuec enté buiò na brounssà d'àigo: en bramet court ma jo ardì e fort aviò fermà Steve enté a l'ero en l'avertont que la famiho ero creissuò.

En oouvont l'uis se durbir, dondo Neno s'ero virà vers Steve en dizont: "Lei anà tout ben, Steve; isto tranquile... la vous es aribà en joli fihet sensso far trebular trop sa maire... I betà nom Juon, paer, coumo soun paiei...". "Vouì; Juon... Juon Loouren", aviò respoundù Steve, scazi sensso se navizar d'aver parlà, sensso esse boun se rende counte que tout ero fach e que aquelo vouzeto gaiardo l'ero aquelo de soun fi, neissù eilamoun ei founs de na mountagno. E coumo acò, ei lume de na lucherno stubio, mentre que a la trasso les vaches rugnavoun en fazont bataiar adaziot i picoun, lou pichot Loouren ero vengù ei mount, tal a coual coumo 17 siecle dron ero neissù Gezù, lou Fi de Dioou.

Steve s'ero avezinà ei liech: en paou quin sus el meme ei guinchavo stounà aquel miracle se repete sensso pouisser ertenir doues grosses grimes que ravioulavoun adazi ain d'es jaoutes barbues. Dedin sa ment creonto e devoto la passavo l'imajo de la crupio de Betleem e na priero de recouneissensso e gramassis mountavo vers aquel Sont Meinà que aviò vourgù venir ei mount dessout na balmo freido, paoure coumo Juon Loouren que les massieres venion de poouzar dedin i bras de sa maire. Marì, jolio coumo la Vierjo, se quinavo sus sa creaturo e, ben que i fous abatuò e sufronto, en sourire pareissiò sus soun moure spali. Sa mon stregnò aquelo de Steve per dounar e cherchar courage e, coumo per fenir aquel cadre d'amour, Agnes, que ero sourtiò pianet da la trasso, s'aprouchavo smeravià sus la pouncho di pe en embrassont soun agnelet, statueto vivento d'aquel Deineal ei mes des roches.

Mentre que tuchi, erbeì dentour la paiolo, coumenssavoun a schambiar carque parolo e carque sourire, dondo Neno, fremo pountigliouzo e seguro d'ie, ero pa encà a la fin de soun obro. Soun animo religiouzo i diziò que l'arestavo encà da far na cozo empourtonto e que chariò la far vite. Dessidà coumo sempre, i ero anà vers la brounssino pieno d'aigo e i n'aviò verssà n'estis dedin na bolo. Tuchi eroun stà quiet e avion apuià en janoui en tero mentre la massiero, en oousont i uei vers en signet de la Vierjo, stachà a la testiero dei liech, aviò dich oubé sa vous quiaro e forto: "O Vierjo sonto, Maire de Dioou, beneizis l'aigo puro de la mountagno e fai que en coulont sei front d'aquesto creaturo i la purifié dei pechà qui a artà e i la rende meritablo de veire lou lume de ta grazio". En se quinont sei meinot i l'aviò bagnà na frizo sus la testo oubé l'aigo fresco de la soursso: "Loouren, mi te bateoou ei nom dei Paire, dei Fi e de l'Esprit Sont....".

Defouoro, dedin la nuech jo soumbro, les grimes de Son Loouren cheion a traves lou sel seren ma, amoun a la pouncho de la rocho, pu groso, pu luzento que ses sore, l'estelo de tuchi sero veiavo sei viei arberc e sus la cuneto novo.