franco-provenzale

Hcole elementar de Cordeneri (Val Soana)

Li maina i sont:

Babando Tiziana

Aimonetto Pierino

Aimonetto Bruna

Gallo Balma Antonella

La Magistra i et:

Brunasso Cassinino Renza

O Cordeneri la tomà ô se fait parè…

La fieui del lafel i se droet pèr fare lo buro. Depoi ô se prent lo lafel enfierà e ô se vudet en t’una baudana. Ô se butet enfumà al fua e ô se fait venir tedo. Vente gnent lasilo ahtachaudar trop.

Sempe en tla baudana, ô se vudet en cuerin e mef de cai e con en pitodo bahton ô se roiet. Ô se gavet dal fua e ô se laset repozar pèr n’euira. Lo lafel ô caiet. Poi ô se roiet bin pèr ronte la caià.

La caià i se cuièt con la rairola e, en tla baudana, ô li vihtet la laitia qui se mehquiet con de farinà e i se donet a li vel.

Per cuièr la caià, ô se paset bin la rairola a fonf del pairel. Depoi la rairola i se gropet e i se pent an tra e ô se laset colar fèr bin la laitia. Depoi en poc, ô se duèrtet torna la rairola e, con le man, ô se frizet bin la caià.

Lo magno, sempe envertoia en tla rairola ô se butet en tel “tchardjimagno” con en roc enfumà e ô se laset ahtar en djèr entir. Poi, ô se gavet la tomà frehtchi qui se portet en crota e i se pozet enfumà a n’as. Tuti li djèr i se salet e i se viret e i laset fin acanque ô li vint na bla crohta e i et meuira.

LI TOMIN

Per fare li tomin ô se pet droar lo lafel apeina bietchìa ô avoi lo lafel enfierà. Lo lafel ô devet ehte tedo e ô se djuntet carqui gota de cai. Ô se laset rèposar pèr quinde-vint menute. Acanque lo lafel ô at bin caìa, ô se sbat e poi ô se butet lo magno en tli faiteron e, da li guitcho, ô li surtet la laitia. En iadjo que ô li surtet pi de laitia, ô se vudet li tomin en t’un piata, i se salont da na banda e da l’auta… e li tomin i sont

pront pèr ehte- mindjià.