franco-provenzale

Hcole elementar de Cordeneri (Val Soana)

Li maina i sont:

Babando Tiziana

Aimonetto Pierino

Aimonetto Bruna

Gallo Balma Antonella

La Magistra i et:

Brunasso Cassinino Renza

LE VATCHI……. DE CORDENERI

.. “ a la matin bonoira lo marguer ô comenset son djer de varcan….

Lafel paré l’ede mai beiu !!!…

La vatchi i se donet lo lafel acanque i se bietche. Lo lafel ô surteit dal piet dla vatchi. Li piet i ant le pupè. Ô i et de vatche qui n’ant catro, de flè qui n’ant ses e d’aute qui n’ant uet. Fefì i sont propi vatche da lafel. Douant da bietchièr lo piet ô l’et pien e dur, depoi ô vint pi mol.

Lo lafel ô fait bin e ô donet de forfi. Li mainà pitoni i mindjont mahquè lafel e i n’ant preui pèr vinir grenti.

Lo lafel ô l’en poc djauninent, ô at gnugi fià e ô l’et abahtanfi dof.

En tel lafel ô se troet: aivi, gras, fuquèr, sal, vitamine. So se laset lo lafel ferà dal frigo ô troiet e ô vint bruhc. Acanque ô se butet lo cai en tel lafel ô vint caia e ô se pet fare lo “magno”.

Gnent tuti li lafel i sont medemi. Ô depent da la rafa, da le vatchi, da li meis qui i donot lo lafel, da l’età, da fin que la vatchi i mindjet, da fin qui beit da la pulifi, da la maneri e da li iadjo qu’ô se bretche e dal ten.

LA RAFA

La rafa: ô i et vario rafe de vatche. Ô i et le vatche da tcher e feiqui da lafel. La rafa olendeisi, la Simmenthal e l’alpina i sont bone sia da tcher que da lafel. Le vatche da tcher, come la Romagnola,la Marquidjana, la Maremmana, la Pugliesi i donont poc lafel: ô gne n’et apeina preui per donar al vel.

LE VATCHE DA LAFEL

I ant tehta gnent tant sota, corna sutile, os pitoni, eua fina, bin tacai, pel finci, piet grosi con de grose veine.

Le bone vatche i donont lafel pèr terzent djer. Lo prim meis i nen donont quetant, poi sempe meno fin acanque i n’ont pi gnendeztot. Via via qu’ô paset lo ten, lo lafel ô vint sempe pi ahpès.

L’ETÀ

Lo pi bon dla vatchi ô l’et depoi lo ters o lo quart vel: aleuira si qui at de lafel. I vat calando depoi at fait ses o set vel.

LA MINDJIR

S’ô se vet que la vatchi i doneit de bon lafel vente tratala bin e donali tot fin qu’ô li vat. Acanque i mindjet fen i at meno lafel. Acanque i muntet en montagni e i mindjet la bona erba dl’arp, lo lafel o l’et pi gras e ô at na fieui bla ahpèsà. Vente donali avoi de farinà. L’erba trop frehtchi i gonfiet la vatchi e i pet avoi crepar.

LA BEIRE

La vatchi i at besen d’aivi polia. D’inver ô l’et mieui donaiela teda.

LA PULIFI

Ent’un beui be poli, ent’un beui dareui qu’ô se cambiet soent l’aria, le vatche i vihtont bin, i sont blè sane e i donont depì de lafel.

COME QU’Ô SE BIETCHET

En Val Soana ô se bietchet dui iadjo al djèr : a la matinà e a la noit.

Vente bietchièr tot lo lafel pèrquè l’ultim ô l’et propi lo pi bon e s’ô se laset en tel piet ô pet empili.

LO TEN

La vatchi i vihtet bin acanque ô fait ne trop tchauit né trop freit. S’ô i et lo catì ten ô l’et mieui gnent lardjile e tinile en tel beui.

LA COLOHTRA

Lo prim lafel que la vatchi i donet depoi avei fait lo vel ô se demandet colohtra. Ô l’et djauninet e ahpès. Lo lafel dla prima bietchìa ô se trait via, lo secont ô se donet al vel e ô serveit da purga. Con la colohtra ô se pet gnent fare né lo buro né lo magno pèrquè i at en guht gram.

Ô SE BIETCHET

Douant da comenfir a bietchièr, vente lavase le man e poi lavar le pupè e lo piet dla vatchi con aivi teda. Ô l’et gnent facile bietchièr e vente tratar bin le vatche s’ô se vet gnent tchapase carqui cauf. Le sedele i devono ehte lavaie con aivi cozenta.

Ô se devet gnent lasir lo lafel en tel beui, ma vente colalo e butalo al frehc.

LO LAFEL Ô L’ET EN AMIS

Tuti li djèr, a la matinà bon’euira, ô se bietchet. Con lo lafel ô se fait colafion e la richta o se butet en tel crotin.

O SE DONET LO LAFEL

Li mainà apena nait, i mindjont mahquè de lafel. Se la mama i at son lafel, i ô donet al mainà. Se la mama i n’at gnent ô se tiret su lo mainà con lo lafel de vatchi o de bec. A d’iadjo la mama i donet en poc de son lafel e en poc de feiqui de vatchi perquè i n’at gnent preui. En iadjo, acanque na mama i avet gnent de lafel, i donavet lo mainà a baila. Ô se taquet lo prim iadjo en mainà al sen, depoi dodecatorde euire qu’ô l’et nait.

Li primi gèr, dal sen, ô li surteit na colohtra qui purguet lo mainà, qu’ô se taquet ses iadjo al djèr. Depoi finc o ses meis o se comenfet a donali en paht al poht dla tèta e, piu o meno, a n’anf, ô se gavet tot lo lafel dla mama. S’ô se donet al mainà lo lafel de vatchi, ô se djuntent en poc d’aivi e de fuquèr, ma s’ô i et lo lafel dla mama, li mainà i vegnont su pi dabin.

En Val Soana, le mame qui avont quetant lafel i posont anlevar gnent mahquè lo leui mainà ma, tenti iadjo i n’en prendivont avoi un da via. Li dui mainà i se demandavont “ frare da lafel”. La fenà qui i anlevavet i eret la baila e lo pitodo preit da via ô se dizivet “mainà bailà”.

Na mama i eret obligai a donar lo mainà a na baila acanque i aveit gnent de lafel o i aveit en lafel gnent bon. Aleuira i fercavet na fenà qui aveit partorì e qui aveit quetant lafel.