L’aucèu es a mand de mouri
Dins aquest istant d’oumbro nuso parle ferme
per que m’escounton lo monde soto sei parpello roujo
dins sei gàbi que leisson tot just passa la man
toursegudo d’infiermitat.
L’aucéu es à mand de mouri.
M’ausissès? parle ferme. L’aubre substanciau
flouquejo dins la sabo dei vulvo dou cèu
enterin qu’espelisson lei aucèu canibale de lus
entre casudo e auroun.
L’aucèu es à mand de mouri.
Subre lou boufa de la colo parle ferme
mounte sagnon lou troupèu. L’oumbro nuso
dei aiglo ensarro lo sang de mei paraulo
qu’escafo la memori.
L’aucèu es à mand de mouri.
Emé la compliceta de la matèri parle ferme
que lei Diéu son plus ges embelinaire de sei pilho
e coumprènon plus rèn à sei mite, meno de silènci
de mai dins l’emperisme dou tems.
L’aucèu es mort.
I a de grilhets
I a de grilhets dins l'èrba de la nuèch
e dins ieu i a tis uèlhs
e dins la tèrra i a ta vida
que fernis còntra ieu
Au bèu mitan dau cèu
una campana dinda
una estèla tomba drech
enterin dos èstres dançan
dins li rocàs jaunes de la luna
Mon amor, mon amor
t'ai boscat dins l'immensitat dau mond
e dins lis autres
te devinave darrièr lis estèlas
e a un moment
ai cresegut sentir ta vida
I a de belugas dins lo riu de l'auba
e dins lo cèu i a ti mans caudas
e dins ieu i a ta vida
que bolega e que cridala mer
Ton agachada de galìs sus Dieu
Se podiàu mai coma un can còrrer lèu
A l’odor de ton recòrd que pressa
Se podiàu mai m’apasturar de ta farfantela
Envergada de gròs vent dins l’exili de l’eternitat
Se podiàu mai siblar ta memòria
Escarcalhada tras lei lamps dei maternitats
Se podiàu mai rebondre lei èrsas de fons de tei naufragi
Dins la garbèla assedada de negadis
Se podiàu mai virar la carrèla de ta cara
E traire dau potz lo mirau de nòstre acoblament
Tu ò frema que vògas lumes amossats
Ambé ta soleta sentida dei estèus
E puèi ton agachada de galìs sus dieu!
commenta