Païsatges de peira, arquitecturas e insediaments de las Valadas Pò, Bronda e Infernòt, escrich da l’arq. Antonio de Rossi (Politècnic de Turin. Institut d’arquitectura de montanha) nos acompanha dins un viatge a la descubèrta di tresòrs d’arquitectura que son dins nòstras valadas. Dins la premiera part nos parla de la montanha coma païsatge construït, en general de l’arquitectura de las valadas occitanas italianas, de l’estructura de lhi insediaments en val Pò e de las tipologias e caràcters de l’arquitectura. Dins la seconda part nos guida dins un viatge a la descubèrta de la bassa, mesana e auta valada: lo Mont Brac e Balma Bòves, la Certosa de la Trapa, l’auta valada. Dins la terça part nos pòrta al tema de l’arquitectura liat a la modernitat, en presentant d’exemples d’arquitectura de la bassa valada de Gabetti e Isola, lo Monastier Dominus Tecum de Prat d’ Mill e Ostana coma país laboratòri d’arquitectura alpina. Aquesta publicacion, en doas lengas: italian–occitan, curaa da la Chambra d’Òc sus encharja de la Comunitat de Montanha, fai part dal projèct “Occitan lenga Viva”, L. 482/99, “Nòrmas a tutèla de las minoranças linguísticas estòricas”. Que sie per tuchi un bon viatge dins lhi nòstri país de peira. 

Aldo Perotti - President de la Comunitat de Montanha Val Pò, Bronda, Infernòt e Varacha