Lo jornal OCCITANIA VIVA (Ousitanio Vivo en grafia Pò coma resulta da la testada) es naissut fai 21 ans. Na neissença aventurosa: per paire e maire quatres chats e sensa en sòut e, en carque moment, aventurosa es estàa la sia vita ma la testa dura e sobretot la cresença e lo sacrifici d'aquei que l'an menat, l'an fach viure. Es ren l'estoria de lo jornal que vui contar icì,  avem ja vurgut far una sina per ren se trobar a descute e travalhar dins una reunion de redacion, ma i more d'aquei que se son abaronat lo Sande 25 de novembre a La Charveto d'Aselh per la "sina de Ousitanio Vivo", la disian lònja e l'estoria la contiaven escasi tota. Malorosament eron pa tuchis: carcuns era en vir per lo mond, carcuns es vengut pigre a se bòujar, carcuns a  pilhat pòur d'aventurar-se, a la fin de novembre, a la poncha de la Val Maira, per d'autres es tojorn la question que las Valadas  son pa coma i raj d'una roa que se beicon un laute, ma chal calar, traversar e remontar. Nos engrava per aquei, ma venaren d'autras ocasions en d'autras luea. Revenent a i more que contiaven l' estoria, a fach jai reveire aquel ni jove ni vielh ma tot enrocat de pels bianc de Renat Maurin que d'la creatura avia modelàa la testa que resta tojorn viventa e pensanta, aquei de i tres "pasioneros" ("i 3 dell' Ave Maria" coma disia lo film): Ines, Dino, Dario que en carque moment se sabia ren ben se vivien per l' Occitania o aquesta vivia per lor, ma segurament an demostrat d'esser ben gorenh  e de tenir dur (aute que "ce l'abbiamo duro"). Mancavon ren auti dui paire de nostas Valadas occitanas: Fredo Vala e Franc Bronzat e lo lor empenh es tojorn viu coma se pol  veire sus lo jornal. De vieia marca era encara Mauro Rabbia, ma lo jai mai gròs era de veire na bona quantità de joves e carcun d'aquesti tira ja dechis la corda. La Val Maira a agut naturalment lo mai de presença: i joves d'Estrop an sonat e chantat coma chal e, acò nos a fach piaser, eron presents lo Sendic e n'assessor d' Aselh. Malorosament lo President de la Comunità Montana, l'amis Mariano Allocco era ocupat per de rason aministratives. La visita a lo Museu Etnografic "La Mizoun d'en bot" nos a entusiasmat (compliment a Maria Luisa Ponza e Rolando Comba), la sina a  la Trattoria della Gerdetta a laissat tuchi ben sodisfach.

 E avura? Avura far Ousitanio Vivo saré dur coma dran, ma almen abo la pansa piena. Avem ren l'entension de laissar passar d'autres 21 ans (carcun devaria rampinhar abo la cana) e parei, beleu l' an que ven, polarion se retrobar dins n'auta luea, n'aute pais, n'auto valada. Avem ja espedit d'esplorador que nos remolisson la bava tuchis i bot que cònton.