Maria Rita i es naisuo din lou 1964 a Roure, fio de "Andreinou", lou padroun de l'oste "Amici"; i es sempre istà isì, e travaio 'din l'emprezo de famio. Mauro enveche es naisù (1958) e creisù a Moncalieri, dapè Turin, e venio isì en vilejaturo. Apres s'ese diploumà perito de telecoumunicasioun a dechis, coumo nous countaré, de vene vioure isi, bele se avio troubà subit lou post en fabrico. Es marià aboù Lorena, decò ie na fio "acouizio" a la comunità de Roure, e a doues minà, Andrea (12) e Laura (10). De travai fai lou pintre, e parlo desgenà "a nosto modo". La nosto chacharado se paso 'din l'oste de Maria Rita.

   Sié countent de vioure a Roure?

   MARI ARITA. Mi siou naisuo isì, ma i a 'sta en moument couro erou pi jouve, vers i seze-dezuech an, que me sario piazù d' istà enté na vilo, coumo tuchi i mie amis. Eiro istou tan ben isì, siou ben countento, devese anà vio me fazario mal.

   MAURO. Segurament me piai vioure a Roure, se nou avariou pa siernù acò 'din mio vito.Jò couro veniou isì da turisto me piazio soubretout la gent, e l'ei istà fachil de enserime 'din lou pais. Ai encà d'amis de Turin que me chamen si me piazario retournà ilaval: nou, senso i pensà dui bot.

   Cali soun i proublemo e i 'vantage per qui viou 'din un pais coumo Roure?

  MARIARITA. I proublemou soun soubretout i servisi: escolo, sanità, ufisi, per tout acò chal avé la maquino, senso fas pa nen. I vantage soun que vives 'din 'n pais encà poulit, i a 'n'aoute raport abou la gent. Pensou que i a mai de vantage que de proublemo a istà en mountanho.

  MAURO. Isì fas na vito tranquilo, as pa la preso de la sità. Mi que travaiou per miou counte faou magaro dez ou ounze oure de travai al journ, ma aboù n'aoute andi, n' aoute ritme de vito. L'ei quiar tutun que soubretout per i minà e l'escolo deves viajà a Saluse ou a Couni.

   Ma ezist decò un vantage pi spechific, lià a la forso d'aquesto coumunità...

   MARIARITA. Cha dì que da de foro tout semeio pi bel de so que l'ei. Ma l'ei vé que isì sien unì, s'ajuen de mai, fazen tante coze ensemo...

   MAURO. Aven decò lou vantage d'ese tanti jouve pi ou menu de lou meme age e aboù i meme ideie, e pr'acò sien aribà a pourtà anans 'n baroun d'atività. Se vos l'ei istà decò 'n caz se troubà tuchi ensem.

   MARIARITA. Decò lou fatour d'ese a mità valado nous ajuo. Isì ezist pa izoulament que i a 'din i pais de l'aouto valado.

   A Roure s'es bloucà e decò envertio la tendenso a l'abandoun d'i nosti pais. Coumo espiegà acoqui?

   MARIARITA. Aven tengù dur, e aven ajuà aquii que da Turin soun vengù isì...

   MAURO. L'ei vé: mi 'n bot, da vilejant, pensavou que la gent de mountanho fouzés sarà, ma l'ei pa istà parei. Mi jò alouro me troubavou miei isì que pa aboù i amis de Turin.

   MARIARITA. Lou turisto que vien mec per esfruchà la mountanho se vos i parles nhanco ensem, al countrari se veies de gent enteresà a i proublemo d'isì, alouro serches de i achetar. Penso que aven tres amis que 'din i derìe temp soun vengù istà isì, despost a fa' n'emporto pa cal travai, an jò pià la rezidenso e volen pa pus anà vio. Se creo coumo un "indotto", enté n 'atività ne atiro n'aouto.

   Entre i tante inisiative ecounomique de Roure calo secound vozaouti es està la pi empourtanto, aquelo que a dounà lou segnal fort?

   MARIARITA. La couperativo a ajuà tantou. Ben de jouve an troubà lou premie travai aquì...

Ma cha dì que l'ei istà gent aribà de foro que a pousà la cozo, e la gent dal post l'a achetà magaro decò pr'acò.

  MAURO. La couperativo a agù na groso empourtanso , dran 'bou na prouposto turistico novo e coualificà, e eiro bou l'edilisio, en demoustrand que decò en mountanho se pol vioure senso anà en fabrico.

   Pensà que l'esperienso de Roure pole moustrar carcozo a i aoute pais d'i valade?

   MARIARITA. Dran de tout lou courage de pa anà vio, e apres la voueio d' ese unì, perqué se sies soulet fas pa gaire.

   MAURO. La cozo principalo l'ei d'avé un travai: se pol nhanco fa na coulpo a i tanti que soun anà vio, perqué se as pa 'n travai pos pa istà senso fa nhente. Se pol pa pensà d' istà isì e butà su, que sai, n' estudi de "informatica", ou ese tuchi dependent de l'Estat. Ma se rezolves lou proublemo dal travai isì la coualità de vito es sens'aoute milhiour.

   Roure es decò 'n pais entè i tradisioun ousitane, coumo i danse ou i chansoun, soun ben forte. Que pensà d'aqueste fenomenou d'i group que fan muzico "ousitano" e d'i tanti cours de bal que l'a pr'aqui?

   MARIARITA. Secound mi es na cozo belo veire tanti que an vueio d'emparà. Purtrop i moustren mec coumo se balo, e pa so que vol dì sorte e fa festo ent'en pais...

   MAURO. Lou bal l'ei mec n'aspet de la nosto culturo...

   MARIAR1TA. Apres pensou pa que sie pousibou fa capì aquesto culturo a de gent que viou foro d'i valade. Aquesti lou pìen souvent coumo na serado per beve e fa i fol, senso capì la valour d' i noste tradisioun. La n'a que voularien encà moustrà a nouzaouti coumo se balo.

   MAURO. Dizou pa sempre, ma almenou 'din i feste coumo la Baia devarioun avé 'n minim de respet: a la deriero Baio es capità de gent que se butavo ent'al mes d'i bal reservà ai persounage de la Baio...

   Sie anà veire i serade de carcun d'aquesti noou group? Per ezempi de Lou Dalfin?

   MARIARITA. L'ero na groso boljo da alcoul e de tapage, e d'i coze ousitane n'empourtavo pa nen a digun.

   MAURO. 'Din la muzico es just que chascun faze so que se sent. Ma aquelo l'ei na muzico que courispound pa a nosto maniero de vioure.