Tuchi i an, a la linde abril, en Izrael e 'din toutes  les comnunità ebraiques dal mound se ten lou YOM HASHOA', la journà dedià a lou record d'i sies milioun d'ebreou esterminà dedin la secoundo guero moundial. YOM  'din la lengo ebraico vol dir journ e SHOA' vol dir dezastre, rouvino: so que d'abitudo se dì, embè na parolo emproprio, "olocausto".

  Decò da nous isì se fai carcaren per lou Yom Hashoà. La sesioun de Couni de la Coumunità Ebraico de Turin e l'Asouchasioun Italio-Izrael - asouchasioun enté travaioun en paou de ousitanisto de nostes valades - apres aver ourganizà dran-ouan un pichot encountre 'din la sinagogo de Couni, an prepaouzà aquest'an n'encountre, sout la guido dal rabin Somekh de Turin, 'din la sinagogo de Saluses,  la vilo entè i ebreou soun està leteralment dechimà da i nazi-fasisto. Ben de mounde es vengù, ebreou d'es viles proche, ativisto de l'Asouchasioun Italio-lzrael e soubretout tantes persounes de Saluses, e en premiero filo lou vescou, Mounsenhour Diego Bona. Ioù ai decò vivù lou Yom Hashoà en Izrael Isì toutes les sirenes dal pais sonoun ensemo per doues minutes, en bon lou matin e un l' apremesjourn..'Din aqueles doues lounges minutes tout lou popoul d'Izrael s'afermo rede,  per  far na cozo ben semplo ma tetun ben drolo: navizar. Suz les aoutovies les vitures s'apiantoun,  memo cozo fan  i bus 'din les viles,  tout se quezo e les sirenes bramoun. La fai daboun vene i frisoun.

   Lou rest de la journà 'din toutes piasetes trobes troupel de jouve, tra i des e i quienze an, que se pasoun la parolo  a lou microfounou  per  leze  listes senso fin embé i nom e counhom d'es vitimes de la Shoà. Acò es la cozo mai coumouvento: lou contrast entre aquestes meinà ravies de vito e i nom que is, embé l'alegro encousienso tipico de lour age, lezoun: nom difichil, bourà, de counsounantes, de ebreou poulac, unguerez, ucrain, pourtà al mazel 'din na bornho desperasioun, ai mez de l'endiferenso e de lou chinisme de tout lou mound, isubià da tuchi - da la Guiezo Catolico a lou gouvern de Loundro, a la Crous Rouso - tapà  senso coulpo 'din i Lager, la lueio pi enfernal que l'ome aise jò mai enventà.

   Se aquesti ebreou pourguesoun saber que curo, apres 50 an,  i lour nom soun pa  isubià, ma vivoun 'din la goulo d'aquestes meinà izraelianes, e que lou lour popoul pa mac es pa està anientà, ma es aribà, apres 2000 an, a retournar a Geruzalem e a bastir n' estat bel, chivil, rich, demoucratic e fort. Izrael, embé sa jouventù alegro e variegà (perqué i ebreou soun aribà isì da tuchi i cantoun dal mound), es la pi seg uro garansio que n'aouto Shoà poularè jornai pus aribar.

   La leturo d'i nom a decò aquesto valenso: que mac lou record e la memorio - e pa, coumo voularioun i catolic, lou perdoun - poloun salvar, poloun portar de age en age la testimounianso de so qu'es està, e ese n' amouniment per tuchi i temp a venir.  Ben pr'acò la memorio es foundamental 'din la coulturo ebraico e 'din la Torah: es embé la memorio que aqueste popoul a sabù mantene la sia identità en 2000 an de diaspouro.

   Per la memo razoun la memorio devario ese empourtanto decò per nouzaouti ousitan, que anèn pe rdend, journ apres journ, nostes  reis e  l' esenso memo de so que sien: la  lengo.