Un viatge la li era un òme de campanha qu'al aviá un filh e al voliá que cest al venguèsse preire. Un jorn al es anat parlar al curat de son paìs e cest a li a dit que la chalià li mostrar qualcaren drant de lo mandar en seminari.
Lo paire, fier com un artaban, a li a respondut:
-Al es ja bien enletrat e al estudia totjorn !
-Alora mandamlo aici a la cura e li fazarei un pechit esam.
Lo paire a li a mandat son filh e lo curat al a esaminat un pauc mas bòrd que 'quel jove al sabià pas respondre, a li a fait cesta domanda:
-Sem, Cam e Iafet eran filhs de Noè. Qui al era son Paire?
Lo filhet al a dit - Sem
-Mas non!
-Cam
-Mas non!
-Iafet
-Non, non tu nen sabes pas gaire; vai a maison e estudia encara un pauc, t'anares un autre viatge a te far preire!
Quel filh al es anat a maison tot en plorent e son paire a li a demandat:
-Çò que as- ti, çò que as- ti ?
-Lo curat al m'a dit que nen sabioc pas gaire e que la chalià que estudiessi encara un pauc drant d'anar en seminari.
-Mas t'as pas sabut ? Çò que al t'a demandat ?
-Al m'a demandat una chausa qu'avioc jamai entendut: Sem, Cam e Iafet los eran filhs de Noè, qui al era son paire? Mi drant li ai dit Sem, puèi Cam e Iafet e lo curat al m'a totjorn dit de non e mi sabioc pas mai çò que li respondre!
-Boric d'un asne que te siàs ! ven aici, ven aici :... e al a polat dins lo teit (l'estable) adont la li era una vèça que ilh se nomava Bòcha e ilh aviá just fait tres bèlis veçons.
-Agacha aiqui: Moret, Pernò e Blanchon ilhs sion los nhots de Bòcha. Qui ilh es sa maire ?
E el: - Moret
-Mas non ! e al refazià la demanda
E l'autre: - Pernò
- Mas non, non !
Ensoma lo filh al a dit tuts e tres los noms dals veçons e al a jamai respondut just.
-Asne que te siàs! La maire ilh es Bòcha!
-Ah, òi, òi ! ilh es Bòcha, aura sabo , sabo tot !
Alora quel paure òme al es tornat en çò dal curat abó son filh.
-Mossù lo curat, escusatz-nos mas mon filh al era un pauc genat e al a vià pas en tendu t ben la demanda. Per la resta al sap pro, demandatz-li encara qualcarenot.
Lo curat alora, armat de bona paciença, al li a mai demandat:
- Sen, Can e Iafet ilhs eran filhs de Noè, qui al era son paire?
E lo filhet al a respondut, calme e segur:
-Bòcha !
-Ah, òi, òi, vai pura que te siàs pròpi una bòcha ! e al la fotut fòra de la Gleisa.
commenta