S'agù pende ben pi d'un lume ar courme que passavaper tout l'estabi (lou pu gros) d'la Ruà achatounà ilamoun a 1500 m. ent la faouda d'aquela mountanhasa a pouncha! I ome trebulaven per arampinhar-se sus d'echales e de careies, entant que les fremes, aboù  les cotes longes, dounaven de coumand just: "Nò, Toumà, eslonja  lou courdin dran que far lou group; lou lume deou calar chabal, justa soubre lou mourre! Frot, buta lou "quinquè" ar mes, ent travaien puèi les fiies! Nadin, cale-ne duei, en lai un da l'aoutre, lou derrìer ai pè d'la Gaia. La vacha, a sente lou siou noum, avìa virà la testasa; i siei uèi grimous semeaven chamar 'na pinhà de sal! Chezarin, qu'entrava ent aquel moument de counfuzioun, capis ar  vol e, afesiounà cmà ar l'era a les besties, fai un saout dran lou muzou machà, gavà da la sacocha un grum de sal escura, ar l'eslarja la soua pichota man encà tenra, per dounar- la a lecar a  la lenga granoulua de la vacha! Tuchi avìen da far e les meinà embarasaven  fort! Aquel sera la gent, qu'era ilamoun per l'uvern (de jouventù d 'ome eren anà ent ar mound per ganhar: qui en Fransa, qui chabal ent la piana) devìa troubar-se per pareiar i "quiar"...Deineal anava arrubar La mancava mac noou jour... Eh! bo... la nouvena. A la pichota chapela, qu'era aval sus la rocha, justa sou t la Ruà,  la s' anava a l' embrun . Les meinà courrien jo dran per demourar-se ai "catre cantoun" ou a "lolo" dentourn la sacrestia. Ma ai prim bot d'la quiouqueta i anaven fitou ajanouiar-se ai pè de l'aoutal, genà dai uèi rustì dar viei "Barba Prit". El, aboù lou fià court, tacava a chantar les proufesies e i aouti ensem respoundien: regem venturum Dominum, venite adoremus! Que ne poulia souber, aquela gent de "Colli di Sion" ou des aoutes cozes en latin? pura, aboù ben de "fede", tuchi chantaven... Coura puèi la s'aousava l' imne: "En clara vox redarguit, obscura quaeque personans, procul fugentur... la venia fora un brai fort fort, coumpanhà dai pè que battien, e fazia tramoular fin la chapela, la se sentia en lai, en lai ent i bosc! Aquel latin, que deguncapia ren, venia 'stroupià, 'scardasà, ma la vous ben grousiera, saia dar founs de l'anima aboù 'na vigour viva, que dizia la partecipasion de tuchi ar misteri sempre noou: la naisansa dar Bambin! La neou toumbava larja cmà de fuèies; i couatava tout: i cubert, i viol. La charamaiava tuchi  i an ! Les meinà se campaven din a far i chichou e i virabaraquin. I ome beicaven de durbir i pasage da 'na ruà a l'aouta fin a la guieza e chabal ar pais ent l'avia lou medic, se carcun n' avia da manca dran de murir! Tuchi eren paoure, ma ilamoun l'avia da vioure! Lou fourn avia ben travaià... Ent les cuzines la se veia sei baouti, sout les vooutes, de pan reound, ben cuèch, que se gardaven per un an. Les vaches se mouzien tuchi i jour; aboù lou lach la se fazia buèr e fourmage, les jalines fazien doou. Ent i selier 'scur l'avia de tartifoules; ent les mait de sac de farina biancha, jaouna e de fourmentin per la poulenta! I journ court pasaven fitou, mas tuchi atendien  i sera, qu' eren long, per troubar-se ent i' stabi a travaiar, a descoure, a chantar... Eoura puèi l'avìa da pensar a pareiar i "quiar". Dar soum de la Ruà partìen a 'stroup meinà, jouve,  viei; en  moumant sounaven i aouti pr'anar ilmoun a la sima ent l' estabi gros, que poulìa tenir tuchi! Banches, careies, 'scanh eren fitou piià per setar-se: Sar gros paioun, pareià dran lou nas dei vèel pr'aquiei qu'eren encà ren bon a travaiar, treiaven les meinà ou i se bestucaven fin que i uèi se fermaven per la son! Dai sac pien, que la gent avia pourtà, saìa de tout: papier a fiour, tezouires, fil, aguies, de toc de chandeles; tout acò qua l' anava per les figures de Deineal ! Les fremes travaiaven propi ben; una per l'aouta i butaven en "soque de gueddou" a far de baloun, de roulades arrisà ou de mourre aboù  i uèi, que i ome enfilaven sus de bastoun e de chandeles per pouler-ie puèi viscar! La se sentia descourre e rire! Un jouve, que 'na fiia calinhava, s'era arambà per tirar-ie la tressa ou lou coutin e dir-ie aboù duech tout lou siou amour! de bot la fiia venia rousa e basava la testa vergounhouza perquè i fazien "cancanhina"! Chot decò travaiava e se moustava countenta, ma ent i siei uèi la se poulia veire un sagrin gros que i' strenhia les bouches, fazent 'na rupia dacant! I era marià da ben de temp, ma la soua faouda era sempre turja, ben que lou cor fous pien de vigour! Iie avìa pi d'un bot engourjà ent i sangut ou couatà da les grimes les paroulases que i dizìa lou siou ome grousier e 'sganasà! ìie se sentìa na bona a ren, cmà la i venìa souvent campà sar moure! Perquè un destin parei propi a ìie? I beicava aboù gelouzia les fremes dla soua eità, jo ben sfiancà e desfaches que 'scazi tuchi i an, campaven alai 'na meinà ou doues...Iie era 'nvidiouza fin d'aquela bona dona de Catlinin, fiia da mariar, qu' avia agù un pichot, ma avia ren vourgù dir qui l'avia enchastrà! La marria, s'agù quittar lou pais,.. Ma, troubà un post per lou fiiet, ìie era mai mountà ilamoun a travaiar, ben que i fous 'scharniià da tuchi! La semea ren ver; pr' aquela gent que vivia en mountanha de pastura, la devia èsser tout bel; tuchi braou; noupà l' avia d'acò ben marrì, que fazia dar mal ai aouti! Chot pensava de tout, ma i travaiava voulentier per pareiar i lume. Les soues man viraven fitou e ben, ìie avia un bel gueddou e un duèch 'stes smà i enfaisès un pichot just naisù!... Ma i avia carcoza dedin qu'era pa nourmal; un fremoulear per les chambes; la testa viroundava; un group ent ar col; freit e chaout i coulouraven les jaoutes...Que poulia èser? La chalour umida de l'estabi? Lou parloutear fort, que enchournia? Ou lou prim avis de la "menopaouza" que arubava trop fitou? Ma! ...Lou seioun gros era jo pien. Eooura seria groupar i baloun ensem e far 'na lonja coulana coulourà que virava ent les ieres per enluminar touta la Ruà: i "quiar" de Deineal ! L'avia charamaià ben fòrt, ma eoura lou sel era seren e les nuèch jalà. Lou sera de la "vigilia", de gent, un après a l' aoute soun parti per anar a la guieza (un' oura e pi de chamin ent la neou 'ntra mountar e calar) a la mesa de mezanuèch!... V iei e meinà 'staven a caza; i viscaven i "quiar" per moustrar la via a Gesù Bambin, que venia paouzar sout i couisin de cadò ai pichot qu'atendien!... ('na pinhà de tistanhes, de mandarin, ou de bescoutin e de carameles)... Dinou era mountà sar quiouquier; la baoudeta qu'el sounava tan ben presava la gent qu'anava fitou... Les chandeles eren avisques e lou preire viei e gof viroundouleava enroujoulà dentourn al'aoutal. En trambaleant per un emprouvis lourdim, Chot s'arambava ar banc sout lou pulpi; ma coura i an tacà a chouquinar per la mezanuèch (la naisansa dar Bambin), ìie a pus ni vist, ni ai capì nhente... Dubert  i uèi, i s'es troubà en tera tengùa dai bras de l'ome! Lou preire, soulet, versouneava a l'aoutal; tuchi i aouti eren aqui que la beicaven arvenir! Menica, 'na vieia i dizia a l'aoureia : "Brava! Sis 'sta bona!" Que bouneur! Chot a sentù 'na gòi que se pol ren dir e subit l'es pasà aquel lourdim! Gezù Bambin era alai sus l'aoutal que la beicava en rient e 'spourzia les pichotes man! La mesa es fenia fitou! Iie es mountà aboù i aouti fin sar col e amoun i s'es fermà enterdìa! La soua Ruà era alai ajarisà a la mountanha, touta bela per la luminaria dar Deineal. La semeava un cadre fach de lume coulourà! I "quiar" ent aquela nuèch freida e 'stelà pourtaven lou sentiment ent un mound fantastic, un post da faoula... un presepi gros cmà lou mound entier! L' emousioun l'a ganhà: doues grimes, en calant, soun jalà sus les jaoutes, ma dar cor la mountava chapua 'na chalour, 'na chalour de fuèc! D'eslusi ben pu luzent dei "quiar" que tremoulaven a la Ruà, i moustraven un chamin noou; ìie se sentìa pus 'na bona a ren! Un lume gros gros la 'slansava ent l' avenir, perquè decò ìie aouria laisà a la mountanha acò pu bel, acò pu grand, acò pu sant que pol far 'na frema! Eoura i era segura: ìie sentia dedin naise 'na vita nova! En fin! Que Deineal!

(continua in ottava'