Tres oras de trasmiccion a la television de Provença

   Per doas semanas la tropa de France 3 - Mediterranée, menaa per lo jornalista Andieu Abbe, a virà en long en larg la Val Varacha. Ne son sortì cinq trasmissions de na mesa ora l'una, que pasaran a la television rejonala francesa dal luns 10 a lo venre 14 d'abril, de mesjorn a mesjorn e mesa, dins en moment de grand escòut, e que chasque jorn, da la Corsega a Lion e da Menton a Montpeiller tochon apopres cinquecent mila personas.

Es pa lo premier bòt que France 3 vien dins las Valadas Occitanas; lo fai apopres chasque an, dins una Valada difrenta. Los ans areire s'es pasat en Val Pelis, en Val Ges, en Val Grana, l'an que vien se farà beleu en Val Maira.

A la television rejonala de Provença, despei carqui ans trabaion na man de valent jomalistas de cultura e de sensibilitat occitanista, un es Andrieu Abbe, n'aute es Jan Paul Belmond, que lo navizen, carqui ans pasà ganhet lo Concors "Idea d'Oc" abo son romans, enfin Miquela Bramerie. Miquela mena decò tuchi i sande a 13 oras e 25 la trasmiccion "Vaqui", qu'es tota en lenga occitana.

Dins lo derier an lo chambi de direction a France 3 - Meditenanée semiava menar a la disparicion de la trasmicion "Vaqui", me lo grand sostenh popolar, la recolta de pasa de 3.000 sinhaturas, per eira an fermat lo projet e la trasmicion continua coma dran.

La presencia de la question occitana a marcà pa mal decò na part de las rejistracions fachas en Val Varacha; na part de las entervistas se son pasà directament en lenga occitana, e coma tal se veiaran a la television francesa; nauta part se son pasà en lenga francesa, a demostraccion de la cultura plurilenga, e en fin finala europença, d'aquest teritori.

France 3- Mediterranée es pa la soleta a donar n' espacì a las questions occitanas, bela s'es aquela que segurament n' en dona lo mai. Navisen içi France 3 - Languedoc, que contia sus lo bon trabai de Jan Pierre Laval, jornalista professional e occitanista de la prima ora.

Enfin deven encara navisar lo trabai remarcable que fan las difrentas radio privaas, espantiaas en pau sus tot lo teritori occitan; en particolar sinhalen "Radio Pais" de Paris e, sobretot, "Radio Pais" dal Bearn, ben menaa da David Grosclaude.

Esperienças coma aquela de la rejistracion en Val Varacha nos far dire que beleu es arubà lo moment per serchar na colaboracion entre "Piemont e Provença", al fin de produche de programa entre Rai e France 3 que se possen veire sus las doas cheinas. Dins aquel encastre las Valadas Occitanas aorion en role da jugar!