L'avia 'n bon paou que Mora era da ferrar: i pé sanhaven, ma 'nt l' e stabi ìie picava l'e stes per terra e a tuchi i creps ìie fazìa: fss....iìiì..., perqué ìie sontìa na mal da chan.

Serìa 'dco anar ar moulin e menar-la dar ferrìer, ma l'avia 'ncà d'urge da taiar, lou fourmentin da cùeiir e les lentiies? iì eren pr'amoun que s'esgrunaven... tout pressava e Talina stava ren segur 'd bada...

Meirina, ben vieia, touta 'nderenà, ii së rablava c mà ii poulìa, ma 'd travai ii nen fazìa pus bela ren!

-"Talina ii à dich: mi sonou Guitin e guichàn 'd mandar chabal les meinà: que n'en dis-tu?"

-"L'à degun sust, ma s'à que beiquen 'd far parei: la vai 'n journ 'ntìer për anar e venir e que Touniet nous la ferre... seren lour bones les pichotes? Mah!" -

Lo journ d'apres lou soulei era 'ncà ren levà que les fiietes s'agù sautar chabal dar liech; ii 's fretaven ben fort les parpeies, perqué i ùei 's voulien propi ren durbir!

Mora era jò dran l'us 'd l' e stabi touta ben senguià e 'mbastà: sus les chaviies, un per can eren groupà dùei sac 'd bià. Le s fremes viraven dentourn per stachar-i quarqui tascapan lou saquet que poulìa tenir cinc quilou 'd sucre.

-"Aloura, fiietes, beicà ben 'd far tout cmà la vai: anà subit da Jacoulin d' Zotou, dizè-ie qu'ar mole 'nt n'oura ou doues, mountà dar ferrìer, qu'ar ferre la rossa, e 'nt ar ment, anà piiar da la Fouquetta cinc quilou 'd sucre: ar post leissà-ìie aquisti tres pan 'd bùer: ìie cuenta aquò que la fai"!-

Meirina nous à butà 'nt les sacoches quarques nosses 'd pan dur e 'n bel toc 'd touma dura, que n' aguessen fin ar sera! Lou soulei 's levava justa coura nous partien.

Lou journ i era bel cmà 'n paradis: i auzelets voulaven e chantaven tant que ii poulien e i gri nous sautaven ar mes 'd les chambes ment qu'anaven après a la rossa!

Lou viol era strech, ma Mora lou counouissìa tout e ii soubia 'n t anar. Quarqui bot ii funava 'n terra e ii fazia: frr, frr... dar nas... Aloura senties mac: schacc.. chss chss...Leures, vourps 'nsarrussì 's garaven 'd pr aqui. I eschirols sus les nouzìeres qu'eren për amoun que pounhien les grùeies, partien ar vol da n'arbre a l'aute e sercaven d'estremar-se. Lou viol virava 'n sai e 'n lai 'n calant ar mes dei  bosc, ma ilen l'a s veia jò la via grossa a les cases noves dar pais!

-"Ehi!Mora, fermte 'n pau, issì a la font di ausel"-, 'n calant, avien boucouneà; eura lou sé së fazia sente e aquesta aiga es tan bona! Ma arrubà sar pont 'd Maira la rossa s'es 'ntestà: "uh!, Mora uh!" ren a far: ii avia pòu d l'aiga e poulien pas far-la passar.

Uh! uh! Choutina dran e mi derreire:ìie tirava e mi picavou: uh! Mora uh!, ma ii 's boujava ren d'en dé! Zotou, da 1' aute can d' la coumba era amoun que 's fumava la sigala, 'n veient aquò s 'es butà a rire dë sout i barbis, ma ar l'à tacà a courre. La gent d'aquest pais soun brau cmà lou journ e a nousaouti d'eilamoun ii nous volen ben cmà aquò! A mi ii më piazen e la më piai venir chabal! Coura ii parlen, istou aquì 'nchantà beicar-ii: ii fan les bouches reoundes e ii àn 'n se que dùechet; la semea sempe que ii riien ou ii chanten e la lour vous te caresséa e te ganha; tout aquò quë ii din feniss per "o", ma na "o" qu' es ren cmàles autes; l' es d'aquò que të fai piazer! E ii nous escharnissen ren cmà 'n t i auti post, perqu'aven i chausseiras ou les soques groupà abou lez estravìeres ! Ment que pensou aquò Zotou arrubba: "Oh!, les marries fiietes! L'à 'degun dùech: dùes pichotes aquì chabal après a n'ase ben charjà; e se la saumà vira dë sout?" Ar chappa lou sibouc, ar trucha 'n pau Mora s'ar nas que coula eìie pian pianet ii vai aprescmà ii fouss n'anhel! Mi e Choutina s' eissuàn la siour! Mountàn aboù Zotou que nous cuenta 'd faraboules. Oh! lou brau! Ar nous descharja la rossa, ar ii buta dran fen e aiga; ar fai 'n subbi ar ferrìer: "Touniet, beica subit les pichotes, qu' ii àn da mountar dran qu' la fasse nùech !" El ven piiar la bestia, parei nous poulen anar da la Fouqueta: "Oh! lesbeles fiietes, vaila ben ?Que voulè- vous?" "cinc quilou 'd sucre, issi l'à lou saquet e tres pan 'd bùer!"

Iie se buta les baricoules e strenh i ùei per veire tout: ìie pesa i tres pan e fai :"La vai propi ben; la fai justa aquò: lou bùer per lou sucre!" "Passàn pei piiar lou noste saquet"

"Ei, ei!" Viràn 'n sai e 'n lai per lou pais; cmà l'es tout bel!: na via larja e 'd cases noves d'en can e d'l'aute! La gent anaven chatar d' aquò ben; derreire i vedre l'as veia 'd bescoutins que fazien venir la saliva quiara, ma nous avien nhanca 'n sòut e poulien pas chatar. Si én anà stremar-se derreire la chapela dla Santo Ternità 'nt l'avia na font; se sien 'setà sus n'eschalinét per minjar pan e touma dura e beure d'aiga frescha. Lou soulei virava fitou e nous s'agù partir. Zotou aviajò charjà l'ase: la farina 'n sac per can, dë soubre lou bren, 'nt ar mes 'd vers la coua lou saquet dar sucre: la Fouqueta l' avia groupà ben strech. Zotou nous à mai ajouà a passar lou pont e la rossa pian pianet à tacà a mountar, ma aquel diau dë n' ase chaminava sempe a l'embroua dar viol; fazia moulinar chabal i brec e la semeava que da 'n moument a l'aute ii s'encrestesdëcò ìie. "Mora, eiss, eiss!" Ma aquela testassa scoutava ren dar tout: "Fermte, que 't mountou a caval, parei t' adountou mi!" Erou, jò stanca e 'setà amoun aboù na chamba per can sus lou saquet dar sucre, la s'estava propi ben! Choutina s'era chapà a la coua per far-se tirar. Ma 'n bel moument (per soubrar 'n rouchas qu'era chalanchà ben ar mes dar viol) la rossa à piantà 'n saut e mi qu'erou 'setà sar sucre sentou 'n "crac" dë sout lou cul. Choutina 's buta a criar: "Cala, cala, oh! lou sucre coula tout chabal la coua!" Lou saquet s'era crepà dapè lou courdin, que lou groupava. Ai virà subit chapua lou saquet, ma lou sucre da l'eschina coulava, coulava chabal la coua. Aloura nousautes, qu'eren propi meinà, aven tacà a cùeiir aboù les man lou sucre chabal i pels e a minjar a quatre ganasses. Que bon! La nous fazia pecà aquel que calava 'n terra! Countentes cmà 'd subioles aven tacà a rire cmà 'd foles, sensa pensar a 'n aquò qu'aurien piià ilamoun. La rossa soubia pus que dir e stava aquì cmà ii fouss 'mpicà. Cmà Diu vol, sien arrubbà e coura Meirina fai: "L'à pas gaire 'd sucre, issi ! ", mi subit ài replicà: "La Fouqueta a dich-la fai justa aquò-!"

Meirina aourè pensà que lou pressi dar sucre fous mountà! Mora, descharjà dar bast, s'es fitou scoulà 'nt un bot 'n gros poussaias pien d'aiga, qu'era dran l'e stabi ar soulei. Après ìie es anà dran l' us, ma ii s'es 'nterfermà: ii à aussà lou pé drech, cmà ii vourgues soubrar, ii à stirà les aureies, ii à aguzà les bouches, que leissaven veire i long dentas, i à aussà la testassa nìera, e ii à tacà a braiar tan fort que lou son, rentrounant ar mes dei sap, se sentia fin ilamoun chapua lou Buc! La pol èsse que ii vourgues cuentar aquò dar sucre, la Meirina la spounchouneava per far-la'ntrar ar chaud, perqu'ii era suà, les besties armuaven s'ar jas e ii an pa dubert i ùei. Les fees , qu'avien fach i anhelét 'ncà banhà sus la paia ii lecaven sensa aussar lou nas. Les chabres, qu'avien i chabrì stachà ai tetin, se viraven pa vers l'us!

Aloura, Mora mourtficà que ii poulia ren far-se 'ntende, souqueteant pianet, aboù la coua ar mes 'd les chaanbes, farfuzant dar nas que coulava, neca-neca, ii es anà ar siou post 'nt ar cantoun pus scur derreire l'us!