Lo 16 de otobre a l' apres meijorn ilh s'es baron'a a Aosta la componenta estorica de la lista Federalisme.

Lo ponch central a l'ordre dal jorn l'era de estimar la posicion dal Partit Sard d'Acion, tant totun res envidat a la reunion, de sor la question de l'alternansa abo' l'Union Valdostana dins lo Parlament Europenc.

Coma un baron de gent ilh n'es a conoissensa, denant a las dareras elecions europencas tota la lista Federalisme (aostans, occitans, slovems, tiroles, venecians, meridionalistas e sards), ilh avia sotescrit un document - Milan 22/ 4/89 - que declharava la rotacion al Parlament entra l'esponent sard eleiut, Mario Melis, e l'esponent valdostan.

Tot aquo l' es pas arubat, e aquesta mancansa de respet d'i pats a provocat la franc justa reacion de Federalisme contra lo P.S. d'Az.

Per aura la s'es decidut de mandar una letra a la direcion dal P.S. d'Az, mas d'autras acions per far raizonar 'i sards las venaren bastias d'apres.

Tant totun aura lo P.S. d'Az. al es praticament defora de la lista Federalisme.

A part aisò aquesta reunion l'es dequò ist'a l'ocasion per far lo ponch de sor aquò que l 'es, o que polaria esre Federalisme.

La demanda de tuits l'era de establir se Federalisme deu solament esre un cartel eletoral, o se la se pol pensar de far-o venir quilhchosa de demai.

La descussion ilh es endrair'a, e chal menar-la anant, ma l'es clhar que chal trobar de espacis novels ent ont Federalisme ilh pol dir sa parola e far sentir sa voiz per 'i poples de l'estat italian.