La Guero dal Golfe, coumo i l'an chamaa, per nuozaouti es pasaa. Es pa ista en gran bel espectacle, n 'espetacle que en tuchi i cas ourien fach a menc de veire. Tutun sario empourtant eiro pa lisar pasar aquest moument per fouzar na vero pas en t'aquel caire malurouz dal mound.

Na pas que posse durar se marco dran de tout per en pien recounouisiment de l'Estat d'Israel. Aquesto guero a fach veire a tout lou mond coumo find'eiro i difrent pople arabe, la pi gran part de la claso dirijento arabo e aquelo palestinezo en particoular, ourguesoun refuzà en pratico la prezenso d 'Israel. La i a pa en palestines que countie que tiene pa en cazo na carto de la Palestino que vai dal Jourdan al mar. Aquest refus a pourtà, malurouzoment, enca n'i aje i palestines a sierne i 'amis esbalhà, e acò pa mec perqué Saddam Hussein a perdù la guero, me perqué es ben quiar que i a doubrà e pei se n'es enfoutu, coumo jo avien fach dran na man d'aouti duzou arabe.

Me, la semeo decò quiar que la pas din la rejoun pasò per lou recounouisiment de lou drech a la libertà e a l'aoutodeterminasioun per i palestines. Acò voularé dir, dran ou apres, me pi dran que apres, n'estat palestines dapè a n'equel israelian. Malurouzoment la guero a marca pi de pounch en t'aquesto diresioun que tanti an de parole, dran de tout perqué nous a fach veire qu 'espetacle afrous es la guero dal duimilo; e pei perqué a ben marcà que la famouzo sicureso d'Israel se jouo sempre de menc sus i sie counfin, me bou lou recounouisiment de tuchi e lou pibot, ou lou palouc, american.

Tutun en t'aquel caire dal mond la i a pa mec i ebreou e i palestines; soque la se paso en Iraq apres la nosto guero mostro ben d'aouti proublemo dubert. Dran de tout aquel d'aouti pople escrazà, encoumensant da 25 milion de Kurd que d'espei se batoun per l'aoutodeterminasioun e que mai coumo eiro, arubà a i uis de Bagdad, poloun sumiar la liberasioun d'en prim tros de la lour tero.

En n'a pei de mal a pensar que na pas e n'esvilup d'aquelo rejoun,. e pi en jeneral de tout lou mounde arabe, pose bastise se la se bastis decò pa n'esvilup de la demoucrasio e se la chambeo pa l'aport dounà per i pais esvilupà. Es ben quiar que se da i nosti pais, nou pa tecnouloujio de pas, i countinuarè a arubar tecnouloujio de guero, dran ou apres nous countiaren n'aoute viatge que la guero ero la souleto caouzo que la se pulio far!