En i acaresseont i pél lonc la fiheto i-a demandà: "mamà me couontes 'n éstorio?".

La mai re s'es setà dacont a la fiheto e i-a tacà a countar: "Alouro déves saber que en bot, tonti e tonti an fa, na vieieto viviò din en post que aviò nom Mountanhes Aoutes, ma que tuchi n'en disiòn Ousitanio.

La vieieto passavo si joum a far maio, i fasìo de maioun sus mesuro per tuchi. L'ero na fremo ou-be en fort boun sens i couneissiò tuchi i segret per viòoure en armounio ube la naturo. I sabiò soque la se passavo e coumo viviò la gent dreire aqueles aoutes pounches, parén de boun, e i couseiavo a tuchi de pa les subrar, ma de star tranquile din lour terres.

L'Ousitanio l'ero na terro richo e pieno d'aboundonzio, l'aigo sourtiò poulito e bouono da na gron cantità de sourses, din les mountanhes eroun stremà de richesses misteriouses e les eroun bionches de neòou, que din la sasoun pu chaoudo foundiò e i anavo a counfiar i bealot e i fium d'es valades e de la piano.

Ome e fremes eroun ric e eirous, i meinà creission ben, i s'amusavoun oube s'besties e i courion vers de prataries de suegn. L'ero 'n pople fier de sa coulturo, ben enreisà din ciasque persouno. I parlavoun na

lengo antico, i creavoun muzico e pouesio e i eroun envidià da 's poupoulasioun vezìnes per lour valent artisto.

I ome èroun de muradour abìle, i sabion coustruir de meizoun que temion pa i caprisi de la naturo e l'aviò pa teremot, lavonches ou aouro que manassésoun i pais ousitan.

Da tout lou mound l'aribavo din la terro d'es Mountanhes Aoutes de famous scienziatou, d'artisto empourtont e de noble escribaire per veire e emparar la coulturo d'aquel pople. La vieieto resebiò din sa meizoun i cap d'estat e aoutourità d'oni nasioun, i devisavo oube lour e i fasiò de gron afar per sa gent.

Ma 'n brut jour si uei se soun sarà per sempre. Da alouro tonti ome e fremes on abità aquelo noblo meizoun. L'Ousitania a vist coumbater de gueres, i a piourà si mouort, i a refacc les meizoun que puro èroun sta.'coustruies en preveont oni pericle, ma pa aquel d'es boumbes e pion pion a repres sa vito. 

I èroun pa pus arestà gaire, tonti avion passà i couol e i èroun pa pus tournà. D'aquel temp, din la meizoun abitavo en viei que vouliò countinuar la tradisioun de la vieieto: ei fasiò i maioun per la gent, ma lou travai reusciò pa ben, i eroun sempre 'n paou gront e trop mouol.

Bucò, tonti s'eschambiavoun 'es màies e carcun ero aribà a les vender per catre soldi a de marchont desunest.

Apres carque temp aqueles màies eroun desfourmà, i manjounet frust a fouorso de tirar, s'espales eroun strasà, lou dreire coumpletament desfach, mentre lou dron, bele se tout ermendà, semeavo encà scazi entier. I Ousitan on vist lour terro pistà, les lour mountanhes desvuidà, la lour aigo roubà e lour artisto despareissù. Lour poueto soun sta reduch a la fam e lour musicisto oubligà a emigrar".

La fiheto duerm ma la maire countinuò a countar "da carque temp carcun din aquesto terro cercho de refar la maio justo, oube de fil 'rbust, per tuchi si abitont, ma i soun trop aquie que de nuech taioun lou fil e stremoun lou croumeissel...".