Venre 25 de jenier Fraisse e la Val Varacho an acoumpanhà al sementieri Fredou Garnero, de 45 an, miei couneisù coumo Fredou de la Fumo, per aquel soubriquet que i arubavo da i sìe reire.

Ferìe e mecaniq en te i an de la jouventù, despei carqui temp, Fredou, avio dubert e ardounà d'andi a l'albergou "Italio" de Chasteldelfin, doudo s'ero fach na bono nomino bou la sio manero de far alegro e piazento.

Navizen içi l'amis Fredou de la Fumo, decò perquè, en te la sio primo jouventù, ero istà un d'aquii que s'eroun barounà dapè de François Fontan e avioun foundà lou Mouviment Aoutounoumisto Ousitan. I trafeje de la vido avien pian pianet menà Fredou a abaudounar la militanso poulitico ativo, belo se al s'ero jomai separà dal Mouviment.

Maraman vintecinq an soun pasà d'aquel temp, lou mai d'aquii jouve d'alouro se soun desperdù d'en caire e de l'aoute. S'encui l'Ousitanio e l'ousitanisme soun apresià e couneisù d'empertout, es decò grasie a qui, coumo Fredou, avio agù lou couraje d'enchaminalou per prim. Da carcun d'aquii jouve d'alouro nous es arubà aquest record, que voulentie poubliquen.

A nostre amis "Fredou de la Fumo"

"Erian tuchi, tuchi ensemo, per acompanhate en t'aquelo deriero silensiouzo spasejado. Avian i grimme a i ouei e lou cor pien de tendreso e regret per tu Fredoo, nostre pi grand amis.

Per la deriero vinco, marcà dal soun trist de la choco, aven revist bou tu lou temp trop court de nosto  joventù, couro, bou l'esgouard virà a i bric pi aout, rich de suenh e d'esperanço, cuivian soque de bel la vido nous dounavo: la vueio de vioure, l'argal de l'amicisio, l'amour per nosto jent e noste cà.

Erian propi tuchi ensemo, como entl'ouro, dran que ciasquedun de nouzaouti se leves per soun destin.

Tanti arcors, tanto tristeso e regret per aquel tros de nosto vido que te sies menà vio.

Me de i noste pichote coze resto la memorio de ne proumeso que muraré jomai: nosto amicisio, en sentiment rich e armounious, que ren al mound nous pourtaré vio.

Ero sies libre de voular e de te perde en tal suenh de na vido senso boine, senso temp ni doulour. Sies libre d'encountrate bou Nossenhour, pourtaie noste pene, noste fatigue e desperasioun, ensem a la nosto esperanço e al noste amour. Libre en t'aquel çel pien de souleil e d'estele, que tanti viaje aven armirà.

D'ilamoun, bou toun souris boun e çenser, nous das la forso d'arcoumensa.

Lou souleil se levo sus Fraisse, lou çel es serren, tout coumo n'iaje, Fredou, tout parei. Tournaren a pista l'erbo de Coundumino e a fa en bel farò bou i fisine ruba, a grinha e cianta, a minja i cireize "sgrafinha".

En te i nosti cor ren l'ei chambià, tu sies bou nous, Fredou, nous as jomai lisà."

 

I tie amis de Fraise