S'es debanaa lo 10 e lo 11 de novembre a z-Ais de Provença l'Amassada Generala per lo 1991 de l'institut d'Estudis Occitans. La matinaa dal detz ilh es istaa dediaa sobretot a l'analìsi de las activitats directaments menaas d'a lo Burèl Nacional de l'l.E.O.: la revista OCCITANS, l'estructuracion dal Servici Edicion-Difucion I.D.E.C.O., lo lançament dal FORUM D'OC.

L'idea dal Forum d'Oc, naissuá a Besièrs l'an passat, s'es concretisaa cest an e nos sembla que las fòrças qu'an partecipat -I.E.O., Felibrige, Partit Occitan, Parlaren, Calandretas, M.A.O., P.N.O. ecc. -an ben armarcat la necessitat d'un travalh comun entre lo monde Occitanista e 'quel Felibrenc, faça als poders estatals e internacionals.

Nos sembla emportant, plus que far un conth rendut de çò que s'es passat dins l'apres meijorn de quel mesme jorn, de far conoisser als nòstres legeires lo document publiat per l'ocasion a firma de Robert Martí, President de l'I.E.O.

De nòstre caire esperem que lo bon travalh entemenat a z-Ais de Provença entre occitanistas, felibrencs, moviments politics e culturals puèsche portar un novel esprit de frairança dequò aici dins las Valadas, per un chamin ncomun e responsable.

La matinaa de l'onze non pas ilh es istaa dediaa a la part plus organisativa de l'Institut: bilanç dal 1991 e projectes per lo 1992.

Una bona plaça a agut la descutiá per la creacion de seccions regionalas. Per aüra existís una soleta seccion regionala, 'quèla dai Lengadòc; dins un'autra region Miegjorn Pireneus - fonsiona una seccion despartimentala "facente funzione". Praticament sion las soletas regions d'Occitanià que financian organicament l'I.E.0.. Encara, dins cèstas doas regions al es istat creat un pòste de conselhier tecnic a la cultura occitana. La creacion de seccions regionalas auriá pròpi la finalitat d'enrear los rapòrts entre I.E.O. e region abò lo but d'aguer de sobvencions, de crear de pòstes de conselhier tecnic, de financiar de projectes coma la toponomastica, l'ensenhament de la lenga.

Per çò que nos tocha plus dapè, beleu sarè possible que qualcun de nosautres puèsche far partiá de l'estructura que sarè organisaa en Provença Costa d'Asur sobretot per çò qu'argarda los problemas trans-frontaliers.

A prepaus de la lenga, Jaume Taupiac, responsable dal Sector de lingüistica, a anonciat que per lo mes de julhet dal 1992 aTolosa sarè organisat un rencontre sus la neologiá-es a dire la formacion de las paraulas novèlas -. La chausa emportanta ilh es 'quèla que a cest achamp deurián, dequò esser presents los lengüistas felibrencs.

 

 

L'ora es venguda de despassar las bregas intestinas, per metre en abans, non pas çò que nos divisa, mas çó que nos unís. Felibres e Occitanistas an tant de legitimitat los uns coma los autres per menar la batèsta de nòstra cultura, al delà dels problèmas reals que son de discutir entre nosautres pausadament, fasèm l'unitat d'accion, sens rèire-pensadas.

La vida de nòstra lenga se bastirà al prètz de la solidaritat entre totes los parlaires d'Òc.

1)Una idèa:

Federar las fòrças que prenon en defensa la civilisacion del País d'òc (totas las fòrças sens cap d'exclusivas), aquela federacion o melhor dich confederacion se deu far dins lo mai grand respièch de l'identitat de cadun, pausant coma principi la toleréncia e lo dialòg. La necessitat de l'union se fa sentir de mai en mai dins un mond que càmbia cada jorn. Se cal pas enganar d'enemic. Çò que mai nos amenaça es lo silenci pas la divergéncia grafica, folclorica o politica. Sovenètz-vos de Bisança e de la discutida del sèxe dels àngels!

2)Un programe d'accion per estapas:

Dins un primièr temps metre en plaça una solidaritat per reagir collectivament e unitariament a las atacas sus tal o tal punt del territòri geografic o cultural.

Dins un segond temps, preparar de projèctes comuns e federators dins lo respièch de l'identitat e la sensibilitat de cadun.

Dins un tresen temps, envisatjar d'accions cap a las autoritats de totas menas, per dire de far avançar nòstra reconeissença oficiala.

3)Un objectiu mediatic

Organisar en 1993, amb la dobèrtura de l'Euròpa (mercat o super-mercat?), un grand FORUM D'OC*, per dire de marcar nòstre territòri e nòstra existéncia cap als poders publics nacionals e internacionals. Aquel FORUM deurà èsser la frucha d'una preparacion menimosa, e d'una granda mediatisacion (Crida als artistas, als elegits d'Euròpa, ecc...) Nos cal far tèca sus la mapa del vièlh continenti

* FORUM D'OC:

Lo contengut, las datas, lo luòc d'aquela manifestacion demòran de definir amb totes los partecipants, mas l'idèa es de far a l'entorn d'un "debat-collòqui" a l'escala internacionala una granda veirina de la nòstra cultura amb mòstras, espectacles... ecc.

Aquel tèxt es dobàrt, es inutil de n'en far l'exegèsa, de ne 'n cercar las intencions amagadas, de ne 'n pesar los tèrmes, demandam una critica de l'accion non pas del vocabulari!