Sande 28 e diamenjo 29 outobre i à stà a Vinai la 4° edisìoun de la moùostro di moutoun e de les feos Sambucànos.

Lou trabai fach din aquesti an, per recuperar e valourizar la feo de la Val Esturo, i a fà milhourar la coualità de les feos ménas a la fìero.

 

L'anagrafe e la valutasìoun de les feos Sambucànos.

Din lou 1988 s'es encoumensà en trabai, per counoùishe mìoi coumo ero facho la feo Sambucàno, din tuche li estabi de la valado e per aribar a chouzir les féos pu belos per mantenir la raso e levar les encrouziéiros.

Soun estas countroulas vouch (e) sent feos e an agù lou pountejou didin trento alevaméntes. Apres la valutasìoun de les feos s'es encoumensà a marcar li anhel (me la marco a l'oureio) nishus dea de maires de boùono raso.

 

Lou "Centro Arieti".

De l'an pasà a dezembre à encoumensà a founsiounar a Poumbarnart (coumun de Peiropuorc) lou "Centro Arieti"; din n'estabi ben aranjà se soun tengus, din l'uvèrn, na trenteno de mountouns.

Lou "Centro" nous douno la pousibilità de na valutasioun pu coumpleto, facho per temp e la pousibilità de paragounar les fatesos de les bestios. Aquesti moutouns, sernis just nishus didin li alevament dou "Comitato di Razza", couro soun destrìas lou counsoursiou l'Escaroun li croumpo e li meno aou "Centro". Aqui venoun counhtroulas, valutas e visitas dou viturinari.

 

Lou prèmi per li anhél fumel.

Per poùire aribar a aver, lou pu vite pousìbie, en bel numer de tardouns fumèls de raso sambucano, s'es pensa de dounar en prèmi a li alevatour per tuche li anhèl fumel nishus de de moutouns dou "Centro" e de na feo que àìe agù na bouono valuasìoun.

 

La salute de les feos.

L'A.P.A. de Couni me la coulabourasìoun de la Comunità Montana, que pago la part de li alevatour, an dounà andi aou "Servizio di lotta all'ipofertilità ovina e mortalità neonatale".

Din la valado trabaio n'escouàdro facho d'en viturinari e de n"'agronomo". Ai elevatour que chamoun, lous dounoun asistenso tecnico e sanitario; lou pian de trabai prevet decò n'enteresanto iniziativo per cuir d'enformasìouns que dounoun a l'alevatour la pousibilità de veire l'andament de soun alevament e de lou counoùishe mìoi.

Din lou 1988, an countroulà vuochsent feos din douje estabis, aquest'an li alevamentes repasas soun vintoset'me milosincsent feos. Grasio a l'ajut de l'USSL dou Bourc/Borgo S. Dalmazzo, i a la pousibilità de curar de primo e d'outoun, la malatìo di verm din tuche li alevament me la destrebusìoun de na mizhino, lou "Fenbendazolo".

 

Gruppo giovani

Lou trabai de far renàishe la raso sambucano ven fach en coulabourasìoun 'me li alevatour de la valado. 'Me li apoch de i Ent public, coumo i à agù fín èiro, de sigur d'ishì a carqui an l'alevament de la feo aounè na groso empourtanso ecounomico e dounarè de trabai ai jouve din touto la valado. Serè li jouve a déoure countuniàr lou trabai di vìoi ou a emparar a lou far.

Noùostro ideo es aquelo d'ourganizar, din les escoles, d'encòntres per parlar me li jouve de l'alevament de les feos e de far nàishe en group de garsouns enteresàs, per li far troubar ensèmou e lous presentar en prougramo d'enformasìouns. Aquest trabai aourè de rezultas se li parent, li magistre eli proufesours faren capir a li éscoular l'enpourtanso de l'inisiativo.

Stefano Martini

Antonio Brignone

Giovanni Massimino

 

LA FÌERO D'EN VIAGE

 

Les feos soun aribas sus la piaso de Vinai 'me les touzhouns bianchos coumo lou lach, avìoun dezmountanhà mac carqui journ deran.

Din lou pasà li escaroun aribavoun a pè de touto la valado en fazent la vio la nùoch de deran la fìero. Ma per la feo, abitùa a couraséar sus les mountanhos aquelo vio èro ni lounjo ni fatigouzo. Beléou... aquelo vio, mai facho deran, charinavo carco vìeio feo que pensavo a toutos ses draios que counoushìo ben... e 'me na foùorto picoundrio semiàvo que capishése que aquelo vio aourìo pus agù de retourn.

Irouzament carqui viage li negousiant "vinhoulin" semounìoun gaire de les feos e parìor la vìeio bizo pouìo encà mountar per n'istà a la mountanho.

Belo per li pastre n'ero pà en sacrifisi far aquelo routo a pè, la fièro ero empourtanto: se vendìoun li tardoun e les feos e 'me aquì sòou se croumpavo, sui banc, les sabàtos ou carcaren per se vestir, ma ero sourtoù na boùono oucazìoun per se troubar 'me li amic e 'me li pastre de la valado.

Retournavoun a mizhoun de sero tart 'me lou mounde dou pais e, de temp en temp per la vio, se fermavoun a-i oste, souvens s'aribavo en paou lourtes...