Sonde 12 d'avust, din la Salo dei Cusei d'la Cümüno de San Peire (Val Varacio), ube la partesipasiun tra i autre de l'autur Giovanni Bernard, dei sendic de San Peire Renato Baralis, del vicepresident de la pruvinsio G.B. Fossati, di cuseier pruvinsial Dino Matteodo, Livio Berardo e Marco Carpani, dei president dei Distret Sculastic de Burg Son Dalmas Walter Cesana, de Jusep Rous, de Franco Bronzat, Pier Leone Massajoli, Michele L. Straniero, aven festejà la surtiò de "Steve - Roumans Ousitan", Edisiun Ousitanio Vivo.

Ome de cultüro e ome de pulitico present a la festo, se sun trubà dacuordi din lu recunuisser a n'achesto obro lu gros merit de far surtir la lengo usitano scricio da lu piciot spaziu che da na vinteno d'an (da curo a tacà a renaisser la cuscienso usitano) la liavo, "en maniero scazi fulkluristico", a la puesio u a la picioto storio.

Lu lonc, úmile e dei meme temp serius travai de resercio de Janò di Vielm (Giovanni Bernard), sa groso capacità de scrire, de cuntar, a purtà a n'achest'obro che tüci i present a "'s bateaies" de "Steve - Roumans Ousitan" (circo 140 persunes) on sentü cumo na svolto, en punc de partenso per d'autres e sempre pü empurtontes òbres en lengo nuostro.

Lengo, cumo a fac remarcar L. Michele Straniero (lu studius, jurnalisto e etnomusicologo), che à n'estorio e na dignità blou pü ricio de d'autres lenghes (italion u franses) de pü grondo furtüno, ma ch'es t rop suvent mespresà.

Chi pensavo che nuostro lengo fus mach adato per descrive de sitüasiun cuncretes es està sbüziardà da acheste rumons: Janò di Vielm a usà la parlado usitano de Blins per descriver na gron cantità de "cuncet astrat" de na maniero che à paren a envidiar a d'autres lenghes.

Blou decò per acò d'ome d'escolo present achel jur a San Peire se sun augürà, e tüci sun està dacuordi, che "Steve - Roumans Ousitan" poise venir a esser en libre d'escolo.