La i a quinze journ degun i sario pasà per la testo l'ideo de reveire en soulet estat tedesc. Eiro, apres carant'an de divizioun, apres vintevouech an de mur a Berlin, en t'en crep, la questioun es jomai aquì. I reviroment que se pasoun dedin l'emperi de l'Est nous an ben lest butà dran a la grando questioun nasiounalo de l'Europo: la questioun tedesco. Es na questioun que da i nosti caire, coumo dedin l'Eouroupo entiero, souvent vien vivuo bou gaire de rasiounalità. I jenerasioun pu vieie poloun ren far a menc de pensar a la deriero guero, ai camp de councentrament, a i masacre, a l'emperialisme tedesc. Tuchi aquii sentiment, avisc e afrous apres lou carantoçinc, an menà à lou partaje dal pople tedesc, me an menà, beleou senso que la jent se ne navizese, a en ben pi gran partaje de l'Eouroupo e dal mound sout a dui grandi emperi.

Eroun i an, aquii, doundo la souleto parolo "nasioun" fasio viene la pel d'oco a la jent, doundo minco revendicasioun nasiounalo fazio bramar al fasisme e al nazisme. Din aquelo situasioun lou partaje de la Germanho es està lou partaje de tuchi nouzaouti: d'en caire lou capitalisme esfruchaire que mountavo e coulounizavo; de l'aoute n'emperialisme buroucratic al servisi de la nasioun russo;

en, t'al mes na guero freido que fazio afre ai pichoti pople e ai pichoti estat e fazio la goi e l'enteresi de i trust e de i burocrasie.

Despei d'aquii an en baroun de caouse se soun pasaa.

Dran de tout lou proublemo nasiounal s'es paousà coumo proublemo numbre un dedin tout lou resto dal mound: per paso de trent'an aven vist naise e ganhar dezene e dezene de revendicasiuon a l'indipendensio: l'Indio, Israel, i Pais Arabe,...

L'entiero geugrafio dal mound chambiavo sus i nosti libre d'escolo. I luche nasiounale irlandese, basque, catalane eroun i soulete espine en tal pè de l'Eouroupo ousidentalo. A l'Est tout ero fourmalment recouneisù, me tout ero partajà e soufoucà. Doucatre ana a n'aquesto part, coumo se l'estorio ourgues repià a marchar decò desout l'Emperi russe, tout bouligo, lou partaje e la soufoucasioun pareisoun aver i journ countià. Fas pa en temp de boucate la questioun armeno, que deves jo oucupate d'aquelo baltico.

Creies que i Estat de l'Est, apres i carrarma a Budapest e Praga, i pensaren dui viaje dran de ousar la testo, ensinto lou Partì Coumunisto Ungueres en t'en Coungres se trasfourmo en t'en Partì Souchalisto, e degun semeo mestounase. Me soque la s'es pasà en Germanho ourientalo nous laiso lou fià coupà. Es la demoustrasioun que degun mur, degun partaje, degune represioun, deguno razoun de l'estorio, poloun justifiar la separasioun d'en pople que a counsienso de eselou.

L'unificasioun de la Germanho se fazarè segurament pancaa deman, i ourè encaro damanco de en baroun de real-politik, tucharè ganhar la mesfianso de en baroun de jent e de carqui pople que, coumo i poulac, an agù ben da se pianhe de l'emperialisme tedesc. Tutun eiro lou proublemo es paousà, milioun de persoune que journ e nouch an ecrazà lou mur de Berlin nous dien, s'encaro i fougues damanco, que aquel pople pol nus restar partajà.