La jai de far festo

Lu Rescuntre d'achest'ann a Böbi en Val Pelis - lu 3-4-5 de juiet nus a facc cunuisser miei l'eficienso urganizativo e la despunibilità de la gent usitano des Valades Valdéses.

L'eficienso di urganizaire es està remarcablo e, cozo novo per i Rescuntre, la agù la partesipaosiun a l'urganizasiun dei Enti püblic: da la Pro-Loco a la Cümüno a la Comunità Montana che on betà a despuzisiun tutes lur strutüres en permetont cumo-co la pieno valurizasiun d'es manifestasiun en prugramo.

La jai de far festo la fasiò da padruno din achie jur a Böbi, abu la partesipasiun de tuto la pupulasiun, abu i amis che sun vengù ben nümerus da s'àutres valades e da tüci i cantun de l'Usitanio de Fronso, a cunfermo acò, s'encà n'aviò da besugn, de la validità de la fòrmulo Rescuntre.

A ben funsiunà la culaburasiun ube i albergatur de Böbi che on capì l'empurtonso d'achel tipu de festo decò cumo imajo dei pais e cumo fuorso d'atrasiun vers en certu tipu de türisme e se sun facc ciargio de tuto la part che regardavo la cüzino.

Les seràdes de müzico e d'espetacle abu i grüp de l'areo de Nisso e de Tuluzo, abu i ciantaire de Angrogna, abu i sunaire des müziches e des dònses des Valades Usitanes on agù na presenso de gent cumo a Böbi s'ero jomes vist. E bele se propi acheles seràdes avion d'autres festes pa lüegn, din la memo valado.

N'estis mai de partesipasiun, surtut da part de i aministratur de achelo valado, oriòn envece vurgù i düi cunvegn: siò per l'empurtonso d'i temo che se tratavun, siò per i gros persunage che èrun està envità. Lei està ben endalmage che tropo gent <>isse pa cumpres che purtar de persunes d'achelo autur din 's valades lei pa cozo de tüci i jurn.

Da remarcar enfin lu gros enteres de la gent che a virà din achie jur per Böbi vers lu material usitanisto e per tutes les püblicasiun che tratun, sut i difrent aspet, la chestiun usitano, atravers la cultüro, la lengo, la tradisiun: ma decò atravers na pruposto pulitico che miro a dunar a la gent des Valades Usitanes la pruprietà des lur rezòrses.

De segür l'ero de gent ben despuniblo a cunuisser miei e pü da vezin soche da en pau d'ann lu Muviment Autunumisto Usitan vai a prepausar a tütelo de la gent de muntagno din sa particularità de minuronso etnico.