Despì na man d'ans en val Esturo s'es recoumensà a sounar e a balar a la modo di noùostre vìoi.

Propri la val Esturo es aquelo que, mai de toutos les aoutros valados, a perdù aquesto tradisìoun e mac carco persouno ben d'età se navizo di bal que se fazioun en viage.

La reprezo de les festos me la muzico ousitano es istà pousibio per l'inisiativo que la Comunità Montana e i Coumun an butà enandi da carqui an.

Lou magistre Sergio Berardo 'me Daniela Mandrile an encoumensà a far de courses de muzico e de bal pe les minas de les escolos elementars e medios.

La Roco, Gaiola, Mouiolo, Vinai, Sambuc, Peiropuorc e l'Argentìero soun li coumun entè i à sta li cours.

Tuche li an, n'outanteno de minas an trabaià me Sergio e Daniela.

Les lesìouns an coumensà 'me l'uzou d'estrumentes sempies: lou galoubét, lou pifre e en emparant carqui bal: la farandoulo, saouto lapin, la courento... Man man que li cours se repétoun per les minas, countùnioun decò per li jouve que an fenì d'anar a l'escolo.

Acò ero propi l'entensìoun de la Comunità Montana couro avìo fach aquelo prouposto: encoumensar 'me li pichoùot ma tachar manìero que la muzico venguese ren prezo coumo n'endemourim per les minas ma coumo mezou de festo per tout lou monde.

En prim rezultà s'es jo agù: a Gaiolo es nishù en group "L'Oula" furmà de na dezeno de jouves que soùonoun de strumentes tradisiounals coumo: la vioulo, lou semitoun, lou galoubét.

L'Oula à jo ralegrà tanto festo din la valado, lou councours e l'enteres dou monde li ajùo e li pouso a countunìar.

Din li coumun de l'aouto valado: Sambuc, Peirapuorc e l'Argentìero , na dougeno de jouves se prepàroun per fourmar n'aoutre group.

A Demont li pichoùot de l'escolo elementar an fa en cours de bal, grasio a la boùono voulountà dou diretour e di magistre.

Reprendre aquesto tradisìoun es na cauzo ben enpourtanto, sourtoù couro es vourgùo dai jouve, de sigur es na maniero de far vioure lou mounde mai ensemou e unis.