Un concors de poësia per l'Occitania, e per tot son teritòri, da la Val D'Aran a nòstas Valadas, es una bona demostracion d'optimisme.
Tot acò en barba a l'eslarjament dal desordre de grafia e a i mila e ben mai gravós problema que ent'a questa sasón travalhon lo monde occitan.
Tot acò perque, s'es ver que l'identitat occitana beta las reis, es ben ver que s'escriu gaire: gaire e men que dins i an sessanta, quora la presa de cosiensa era a lo sio comensament.
Ren escricha, la lenga d'òc perd lo mielh que a e, menassaa da d'autras lengas mai fuòrtas, se modernisa ren, se fai paura e vai chabal.
Te 'qui alora espiegat las rasons d'aqueste concörs, te 'qui lo perque de tan optimisme.
La manifestacion, que din l'entencion de i organisaire avaré escadensa bi-anuala, s'enchamina abó l'idea de la colaboracion de una juria que contarè personas de cultura occitana e de poëta e escribaire de autres pòpol, ren mac minoritaris.
Aqueste vòl decò èsser un senhal de dubertura vers de situacion que, per un avenir de progres, nos chal regardar e se mesurar e, en mai qu'acò sarè en posson a s'empenhar e far de bon travalh.
La luea siernua per comensar es pa en cas. En efet la Val Maira es da long temp tera de poëta e escribaire: beleu, ent'a queste moment una tera de marca que pòl donar fuòrsa a la creacion poëtica de la jent occitana.
A l'ocasion de lo Segond Rescontre Occitan que se passarè a Sant Damian (Val Maira) lo 10-11-12 de Lulh 1987; l'Associacion Culturala "Occitania Viva" e l'Associacion "Amís de Ezio Cucchietti" abó lo sostenh de: l'Institut d'Estudis Occitanis, l'Assessorat a la Cultura de la Comunitat Montana Val Maira, la Comuna de l'Arma
organíson
Lo 1er concors de poësia en lenga occitana
"POESIA D'OC"
a tema libre
Las poësias, ren publicaas e ren premiaas en d'auti concors, pòlon ren esser mai que 2 per poeta, e pòlon èsser escrichas en que se sia grafia que vai marcaa drant o après la poësia. Chal que i sia la traducion de la/las poësia /poësias en italian o en francés o en espanhòl.
Las poësias saren esaminaas da una Juria qualifiaa nomaa da l'Associacion Culturala "Occitania Viva" e da l'Associacion "Amís de Ezio Cucchietti", e contarè personas de cultura, en particular de las nacionalitats minorisaas en Itàlia e de l'Occitània d'un cant e de l'aute de i Alp. I nom d'aquestas personas de la Juria saren dich a lo moment de la premiacion e lo judici d'aquesta Juria sarè definitiu.
Las associacions que organíson lo Concors se resèrvon lo drech de publicar las poësias premiaas o remarcaas sensa degun dover vers i poèta. Deguna tassa es demandaa per partecipar a lo Concors, las poësias venaren pas renduas.
Las demandas de partecipacion a lo Concors, escrichas sus un papier esprès, e las poësias en 5 copias chasqueduna devaren arribar abò una letra recomandaa a aquesta adressa: "Occitania Viva", via Roccabruna 39/B - 12025 Dronero (Cn) - Italia per lo 30 de mai 1987.
La premiacion se fasarè a Sant Damian (Val Maira) lo 12 de Lulh 1987 a 11.30 oras, en occasion de lo Segond Rescontre Occitan. A 1 ora d'après mesjorn sarè ofert un dinar a i poeta qu'an partecipar a lo Concors. Las poësias premiaas saren presentaas dins l'après mesjorn dal 12-7-1987.
Lo concors avarè 2 secions:
-Jove fins a 15 an
-Mai de 15 an
Premi
I) La poësia mai apreciaa
2)La poësia mai apreciaa de la Val Maira
Tra las autras poësias:
3)La poësia mai apreciaa de la zona occitana d'Itàlia
4)La poësia mai apreciaa de la zona occitana de França
5)La poësia mai apreciaa de la zona occitana de l'Espanha
I premi saren: diploma, medalhas d'òr, tra valh de l'ars e de l'artisanat de las Valadas Occitanas, publicacions que regàrdon la vita de l'Occitania.
Per informacion escríver o telefonar a: Occitania Viva, via Roccubruna 39/B - Dronero (Cn) - Italia - Tel. (0171) 918971.
* * *
Ezio Cucchietti, naissut ental 1956, es mancat a la prima dal 1986 en chaent da una montanha a Entraigas (Val Ges).
Originari dal cant dal paire de l'Arbaret e dal cant de la maire de Celas, tuhi dui en Val Maira, a viscut tota la vita a Busca, ma son còr de mai en mai se meirava a lo país d'ente veniá.
Já ental 1980 aviá tocat a èsser conselhier comunal a l'Arma abó de responsabilitats de govern d'aquela comuna e de la Comunitat Montana Val Maira. Ental 1985 era passat séndic de l'Arma.
Sa sensibilitat per la lenga, la cultura coma, en general, per la vita de las Valadas Occitanas, remonta a quora Ezio aviá pas encar 20 an. Coma administrator de l'Arma volem masque navisar ici l'iniciativa de betar per chasque ruà de la comuna una targa abó lo nom "a nòsta moda".
Da temp era militant seriós e engatjat dal Moviment Autonomista Occitan.
* * *
commenta