Sal darie nümbre de lu Jurnal avyan repurtà la novo de la Jurnado dal Kaval de Merens ke se devio tyene a Rure de San Peyre tu 22-23 de setembre. L'avyan fach per enfurmar la jent süs n'emprezo ke nus semeyavo bono, ben novo e ke anavo drech süs la vio de prepawzar karkaren de now per l'avenir de la nosto muntanho usitano.

A la Festo de i kaval, kumo es pey istaa batya da la jent en Val Varacho, i syen dekò anà nusyawti e soke s'es pasà es anà ben delay de soke puliun tüchi pensar, magaro dekò belo y-istesi urganizatur.

Istaren pa isì a kuntyavus menüto per menüto la Festo, nus entereso de may remarkar katre kunsiderasyun.

La Festo, subretut la dyamenjo, es istà karkaren de veroment pupular, din lu sens ke es la jent ke s'es barunà e ke a fach la festo. E la jent akel jurn a Rure mankavo pa, mankavun mek y-awturità, ke per katre kaval se sun pa bujà e parey an perdü na bono vinko per strenhe en barun de man e fase en paw de prupagando!

De jent n'es venguo da tuto la Val Varacho, me dekò da y-awte Valade; ero de jent de tuto razo: da y-estüdent e i prufesur a i negusyant da bestye; da ki trabayo en kampanho a ki en te l'üzino; y-ero i juve e ki juve es pas püs gayre. La basto ren dir ke la bono enfurmasyun facho da y-urganizatur abye sabü tiraye, de dreyre la y-a karkaren de may ke l'a fach bujar la jent.

I pra dal Kunh de Rure, dundo la s'es pasà la Festo, se prestun ben a na festo süs i pra, kumo karki bot d'istà la se retrobo enkaro per karke Madona de kampanho, me st'y-aje de may y-ero i bestye. N'y-aje y-ero pa fyero ke empyes pa i pyase de trupel de vache u de fee; eyro tut akò es despareysü, i fyere van de may en may a menk, e ben la vay se i vyenen enkaro i katre bank per tenile dreche.

La Jurnado dal Kaval de Merens a sabü dunanu tut akokì ke en te i darie vint an aven perdü: na festo sus i pra e lu sens de la bono fyero de n'y-aje. Apres la y-ero i kaval da presyar, i kaval da muntar e lu baruchin per vinkulyar i minaa. Me y-ero subretut la jent ke s'enkuntravo, ke ganasyavo dal pi e dal menk, le jent ke pasavo na dyamenjo ke l'ero karkozo a mità, tra la festo de la Madono e la fyero de San Michel!

A nosto manero de veyre, se la Jurnado dal Kaval de Merens venarè repetüo en te y-an a venir, dapè al mument de valurizasyun d'akelo belo razo de Kaval, sarè propi lu mument de festo-fyero ke anarè enkaro de may valurizà.

Dich akokì, es segur ke apres lu 23 de setembre lu kaval de Merens es intrà dedin la testo e l'ambisyun de ben de famiye de nosto Valado, e ako la pol mek ese en ben per l'eslarjament de akelo bestyo per isì de i nosti kant.

Due parole a la fin van enkaro spendüe per l'urganizasyun! Rure es en t'en mument de gran trafeje, pyen de vito, de idee e de bono vuluntà. Akó s'es vist dekò lu 22 e 23 de setembre. L'urganizasyun ero perfeto, tut marchavo ben, chaskedün avio lu siu trabay a far. Tut lu pais s'es sentü respunsable de la bono surtio de la manifestasyun e bukò tüchi an purtà lu 1ur trabay. Es en bun senh e la demunstrasyun ke, s'en trabayo tuchi unì, i rezültà polun pa mankar.