Es da lu 1967 -68, curo es neysü lu Muviment Autunumisto Usitan e bu ele naysìo l'usitanisme pulitic da la cayre italian de l'Usitanio, che a cumensà a virà la vòus, sempe may forto che parlavo de autunumio, de Regiun autunomo a Statüt espesial per le noste duze valades usitanes.

 

Acò es pa carcaren de tut nòu per nuzauti che vivèn dins l'Estat italion ente la y a giò na Val d'Usto, en Süd Tirol, na Sardegno, en Friul, ma, bu tut acò, es 'stà na marìo cauzo fà entrà achel returnel dedins l'ureyo de nosto gent (fin a n'achei che lur piazìo giò nosto lenge e culturo d'oc), e encà encüi cumo encüi y a en barun de gent che trebülo a capì. Pensà che tuci dedins es Valades (agricultur, artizan, empreziari, cumersant, ubergisto,ubryè,...) n'avarien en pau de ben per n'autunumio e bastarìo anà a

fa en viret en Val d'Usto u Alto Adige per veyre e devizà na brizo bu la gent achì òuto. E vus semeyo ch'achelo gent achì vutarìo tan ch'acò i lur muviment autunumisto (Union Valdôtaine, Süd Tiroler Volkspartei, Movimento Friuli, Unione Slovena...). subretut ent'achesti derìe temp. se ughesun pa vist che l'autunumìo es en ben?

 

Es chiar che, en acò noste, de gent che vol ese cuntro e far es marìe lenghes la n'y a, ma sun achey lià a i Partì italion (subretut achei che an sempe duminà da nuzauti)

ch'escoutun lu cumant che lur ven d'ilaval (Rumo u Turin) e che sun pa segürament per l'autunumìo usitano cumo sun pa per achelo Val d'Ustano, Süd Tirulezo, Sardo, Friulano, Sluveno, Ladino. I Partì italion volun ren ch'en giurn dins es nostes Valades i abie na sitüasiun deferento de la resto de l'Estat., che se pose pa püs pià de rezurses (energìo eletrico, mineral, aigo...) senso la pagà. volun pa ch'en giurn dedins nosto regiun í abie la presedenso d'empiec (escolo, üfisi, üzines) a n'achei dal post. Ma per nuzauti achestes cumo d'aute cozes che siervun a fanus viure al pais e nu pa parte, sun pa da renunsià vist che pulèn a vele bu l'aplicasiun de la Custitüsiun italiano.

 

Ma acò aribaré pa tut d'en crep e nosto gent l'Autunumio cialaré che la gagne pian pianet, demucraticament, en fazent de piciote bataye, isì e ilai per pa se laysà escrazà per so che la pulitico italiano nus semun: d'ese cübert per en gros lac en Val d'Estüro; d'ese empuizunà per la « silicosi e l'uranio » a Peuragn, en Val Vermenagno, en Val Mayro e vai sabé enté; de fase purtà vio les muntagnes « gratis » en Val Vermenagno, Val Ges, Val S. Martin; de fà chità lu lur trabai ai gavadur de peyres a Bagnol en Val Po, de cuerbenus de siment a Frabuzo, Limun, Entrayghes, San Peyre, Sestriere, Bardunecio...; de fa muere l'agricultüro d'enpertut, de lìsà serà les üzines dins es Valades e pa n'en vulé de nove.

 

La gent, tüci nuzauti cial che se revulten a tut'acò. E la revolto cial la fa cuntro tute les forses pulitiches e ecunomiches che nus an culunizà e no culunizen. Ma miei encà es aribà e ese 'na forso dins es Valades per fa en maniero che la vito (cumunalo, de Cumünità muntano,...) se mene giò difrentement d'avüro e giò per lu vantage de la gent denant ch'aribe l'autunumio. Es cum'acò apres che i uré al vueio entre Cumünes, entre Cumünità Muntanes de se betà dacorde per n'esvilup de l'ecunumio, en prugres de la vito susialo e cultüralo e subretut veyre de lià ensemu de zones, cumo 3 u 4 Cumünità Muntanes, per n'en fa de Cumprensori de prugramasiun e d'esvilüp, de distret esculastic, de zones de servisi,...

Es pr'achesto vio che nu cial pasà e per i aribà. tüci achei che creun a l'autunumio usitano debun s'empegnà dedins i urganisme aministratiu, serciant en pertut dins es Valades d'ese prezent bu n'ideyo chiaro e novo: trabaià per lu ben de la gent d'es Valades e per l'autunumio usitano.

 

Dario Anghilante