Lou tsatél de la marqueza Adelaide disando 26 è dimèindza 27 de mai ou l’ot aieu in seminaře que ou senhe ina data ampourtan per la minouřansa francoprovensal. Se sot que la lèinga francoprovensal lhet èibrizaa an diverseus varianti, que fan la veřa riquesa dla lèinga, ma souveun soun ina barieřa per la comprensioun èicrita tra li parlan. D’in setis an le comunità francoprovensal ian trouvà avé l’adzut de vèiřo de lèinguista li pi vario sistema d’èicrituřa parafonetica ( couman èicrio) avé lou risultato de izoulese col coumée.

Incué que la tecnologia lhe nou permét de counservé è trasmetre li soun de notra lèinga, fachil è lèsto, fot per forsa avé in sistema d’èicrituřa pratic per tot lou teritoře. Quinze an fét Dominique Stich ou l’aprestave ina sinhificativa proposta per l’èicrituřa per douné a lh’èicritou francoprovensal in rifeřimeun ortografic per aumenté la coumprensioun èicrita tra le diverseus comounità. De segù sa proposta, d’in li tèin deloun milhouřà, lhot trouva in gran counsens, se peut diře que li tre quart de seun que pase desù internet et èicrit d’in sa sistema.

Lou sandic Gemma Amprino lhe riceve li partesipan è li vèiřo aministratou preseun è lhe iouvre li travalh è lh’anterveun de le autorità. L’Asesou de la Provincia de Touiřin Ugo Perone ou deut de la vivacità dle minouranseus ma ou marque lou besouèin de unitàa è de coumprensioun èicrita. Per la regioun Piemoun porte li salut lou counsilhie Gianfranco Novero, sare li salut de le autorità lou presideun de la comounità Valsuiza e Sangoun Sandro Plano. Lou seminaře de Souiza ou l’et anseřìi din lou programma de formasioun de la Provincia de Touiřin è finansia da la ledze 482, la dzournà aprestà da tsambra francoprovensal.

Lou cors natuřal de evolusioun de la lèinga ou damande in pas pi amoun que la richerca dialettologica loucal è ou nou porte dret a in sistema normalizàa, couman per aoutro capità per tot le minouřanseus de lèinga. Lou Proufesou Jean Baptiste Martin, respounsablo de la lèinga francoprovensal per lou dipartimeun Rhone-Alpes ou l’aprove notroun proudzét ma ampenha dèifeřeun ou mande ina letrò de condivisioun de obietivo que vien lèizu a l’asemblea.

L’èicritou valdotèin Floran Corradin ou coumanse li travalh d’in soun bèl francoprovensal è ou l’aspiegue lou besouèin de pasè a in sistema per la comprensioun èicrita tra touit li francoprovensal, preun la pařola Dominique Stich que ou parle de soun gran travalh. Travalh que ou duře da vint’an, ou pase a travè veiřo de publicasioun per arivé aou voucaboulaře è a sa manieřa de anouvrelo an rete.

Countinue li travalh lou proufesou Eric Varnay de Lioun è dou proufesou Jaques Munir de Losanna. Apré portoun lez-esperieunse Christiane Dunoyer, diretris du Centre René Williem de Saint Nicolas, lou proufesou Alain Favre de la Savoia, Nicole Margot da la Svisera, Diego Lucianaz madzistre du Brel valdoustan, Claudio Santacroce dle Val de Lans è sare lh’anterveun Matteo Ghiotto de la Val Souiza.

Lou seminře ou l’ot travalha avé lou senhal wireless fournì da Gabriele Giovine de Informatica &computer pařie onhi anerveun ou l’ot anouvrà in support an linea è dispouniblo an tèin real.

La salute de notra lèinga lhet pa bien bèin è arivè a in sistema d’èicrituřa ortografic coundiviz et inevitabil. Se in tèin la lèinga lhe se parlave maque d’in lou paì ařò capite deloun de meno è si que parloun sou aspatařa per tot lou teritoře francoprovensal; se parle desù facebook, twitter e se travalhe tsu li social network . Ma an que manheřa èicrieun? D’in le varian semifonetiqueus principal ( genre, brel, conflans), o pedzo d’in le tanteus anvensioun loucal o in sistema codificà ?

La risposta et maque inò. Se anvente pa ina lèinga nueva, lou travalh de Stich ou valute tot lez-implicasioun de la lèinga è ou preun le prinsipal carateristiqueus de tot lou teritoře, et segù que foot pa abandouné le varian loucal è nhanca le trascrisioun fonetiqueus, et clař que in sistema ou matze pa l’aoutro. An bien de caz le varian semifonetiqueus deivoun coumplementé l’ortografia de refeuřeunse.

La Dimèindza se iouvre li dibatito, onhidun deut la suò per amelhouře lou sistema d’èicrituřa, se travalhe an rete desù lou tresor arpitan, lou voucaboulaře que ou l’arbate le diverseus varian loucal è que ou l’et netsesaře per èicriře d’in lou sistema supradialetal. La fin di travalh lhe coumbine que lou sistema ou l’et valid alouřa vaieřeun de anouvrelo per la coumunicasion èicrita, le situasioun fourmal, la leteřatuřa mentre per touit li dzort abandouneun pa notra lèinga maternela.