Coma na mascha escota

[...] La música es coma na mascha. Quora te pilha te ten estachat e te laissa pus anar. Te fai çò que vòl ilhe e tu sies pus padron. En qualque moment te fai sumiar e lo sumi es talament bèl que voleries que contunhesse sempre. E parelh sònes e chantes, chantes e sònes esperant qu'arribe mai aquel sumi que te fai viure.[…]

(testo e audio: Dario Anghilante, Sampeyre, valle Varaita; tratto da Briga lo violaire)

Fai fito escota

Fai fito Maria
la dança es finia
lo jorn perd lo clar
da ta maire fa-te pas criar.
Estossera fai luna
ne dança encara quarqu’una.
Maria en dançant
a desmentiat lo pensant,
en braç a Joanin
fasia virar son cotin.
Quand lo bal a finit
e tuchi son partits
Joanin en braç a Neta
a laissat Maria soleta
que ben desolaa
a pres l'escorcha enti prats.
Mas n'ombra niera
darreire un boisson,
ilh a fach venir des frissons,
avia gaire de coratge
ben gròs sentia un tapatge
fito, fito chama mamà
e sus s'eschina na bastonaa.
Maria chamava perdon
la maire usava lo baston,
la maire sempre criava
Maria pentia plorava
son prim dolor
procurat da l'amor.

(testo di PIetro Antonio Bruna-Rosso, Elva, valle Maira; adattato alla grafia classica; audio: Esteve Anghilante, Elva).

Vien devisar Marieta escota

L'ai encontraa
a la fèsta de Sant Jaco, l'ai encontraa
ai ben bocat
que balava la correnta, ai ben bocat
lhi ai demandat de balar bo mi na treça
e ilhe m'a dich: ja, ja

Rit.: Vien devisar bo mi, Marieta
vien devisar bo mi.

L'ai mai encontraa
ailamont a la pastura l'ai mai encontraa
ai ben sentut
que chantava coma n'àngel, ai ben sentut
l'ai ben preicaa de chantar per mi na vinca
e ilhe m'a dich: ja, ja

Rit.

L'ai mai encontraa
na matin a messa prima, l'ai mai encontraa
ai ben bocat
que pregava Sant Antòni, ai ben bocat
lhi ai fach lo senh de pregar per nòstre amor
e ilhe m'a dich: ja, ja

Rit.

Ai demandat
a la maire de Marieta, ai demadat
si vos voletz
mi Marieta esposariu, si vos voletz
m'a respondut: faserèm de gròssas nòças
e mi lhi ai dich: ja, ja

Rit.

M'an reportat
que Marieta es ben malata, m'an reportat
siu lèst corrut
da pe al liech de mia Marieta, siu lèst corrut
l'ai ben preicaa de garir per lo mariatge
e ilhe m'a dich: no, no

Devisarèm pas pus, Marieta
devisarèm pas pus.

(testo di Masino Anghilante, Sampeyre, valle Varaita; adattato alla grafia classica; audio: Dario Anghilante, Sampeyre)

Música escota

Música
Coma una música
Que corre sota lei parpèlas
Furba
Coma una música
De nuech recomençada
Que jamai non s'arrèsta
Coma una música cridant
L'eternitat dau crit
Coma una música de paur
De can picat cercant la sieu tèrra
Passa la vida
En lòng, en larg
O de travèrs
Sota dau pònt gibós
Si negan lei estelas
Coma una música sensa camba
Trampinant dins l'escalinada
Coma una música de jorns
Pintats de guinhas
Sota dau pònt gibós
Acabant de crepar
La boca dubèrta
Jogant cada jorn
Un pauc pus bas
Coma una música
Que s'estofa
Davant d'anar crepar dins la còla.

(testo di Alan Pelhon, Occitania grande; audio: lettore dell'Occitania grande)