franco-provenzale
Mini é Mërguitta, dopo quërqui dì pasà àou mar é a Barselouna, ou i ont pìia lou treno cou li pòrtet a Toulouza. Pla vìi ou i ont pensà ëd frëmase a Quërcasoun për vizità la sità vieui. Ou reèstount zbëlurdì ëdvant a ël grosë muraië é ou ìntrount ënt la sità medieval: ou moùntount piën piën për ël quitivë vì é ou ‘s trëvount ëdvant a ‘na queu ëndoua è i eu ‘na targa “Calandreta de Carcassona”.
Mërguitta: “Mini, varda! T’oou sastou coza ou sount ël Calandreta?”
Mini: “d’ësgù! Ou sount dë scolë, privaië é pagà da li genitoù ëd li manhà, ëndoua ou font lesioun eun ouzitën, ou moùstrount a li manhà toutë ël materië ën lènga, pa nhint parèi ‘me da nou ëndoua la lènga è i ëst utilizaia can quë sèn fourtunà peur fà ëd “laboratori” …”
Mërguitta: “ma da boun? Ou font scola ën ouzitën? Ma sempër? Tui’ li dì? Ou moùstrount toutë ël matèrië? J’arì gro joi ëd vizitala!”
Mini: “J’èn nhint lou tèn ëd fà tout, douèn ëncoù vè la sitadina é sërcà l’ëndiris cou nouz ont dounà për trouà l’oubergi për sta noit. Vinën, quë të zmounou quërcoza ëd frësc da beiri”.
Parei ou vont ëncoù për ‘na bèla briva pruma ëd sëtase ënt ‘un café për pìise quërcoza ëd boun.
Lou dì ëd dopo ou sount a Toulouza é ou vont a vè, për pruma, la piasi doou Capitoul é la maestouza Catedral ëd San Sarnin. Mërguitta è restët zbëlurdia da la grosa crës ëd pèra qu’è i eu su la pavimentasioun ëd la piasi.
Mini” Pouèn pìi l’eideia é fa l’istes a to lou soulèi dërz Alp ëdvant a la gèzia ëd Mizinì”
Mërguitta: “Oh geu! Ma pruma è ventet gavà l’asfalt é poi pensèn a fà lou mouzaico”
Mini: “Uh crusiete nhint sé si ëd Toulouza ou visount li nostri afrësc ou crëpëriont d’ënguichou”
É lou viajou ëd li nostri dui amis ou countinouët peur aoutre sità: Nimë, Arlë, Avinhoun, As ën Prouvensi, Dinh. Ma la noustalgia ëd la mountanhi è i ëst forta parèi Mini é Mërguitta ou dechìdount ëd tournà pasënt për lou Queiras.