Sé t’a ‘na rimoustreunsi da fa eun Coumuna.
Anquë sé t’è propi inrabià can quë eut va a l’espourtel coumunal a fa ‘na rimoustrënsi, serca sempër d’èstri lou più pousibil trëncouil, gentil é educà, parei lou toun ënterlocoutoù magara ou i ëst più dispounibil a scoutate é aruvà a na soulusioùn doou proublema.
Për pruma choza è ventet subit prezentase, prezentant lou proublema, për ezempi “Boun dì, sëi Pèrou Alasonatti, sëi éisì për fa ‘na countestasioun fourmal përqué è m’eu quëpità quë…”.
Sé geu gro briva quë t’è spete ‘na risposta sènsa avè nhune nëve é nhun ou diount pi nhente, ès peut dise “È geu gro briva quë spetou, j’arì nhint joi quë ou vou sësià dëzmeuntià ëd tsè proublema quë vouz-avò dit …”opura “è geu pasà gro ëd tèn é j’ai nhune noutisie” o ëncoù “Ouramai è i eu pasà più d’ën mèis é è ventët dëschetà la couestioun”.
Can cou sercount ëd piì tèn “Ou i érià douvù avertime” o “T’arì douvù chamame” é për fali ën po ëd pèou “Vou faou prezent quë ‘stou descomout ou ‘m portet ën gro dan ecounomic” o “To ‘sto ritard risquiou ëd perdri ëd client” è a la fin “për tou’ sousì o dëschetèn la couestioun o vou chamou li dan”.
Për finì ès peut anquë dise quë “oura j’ai veramënt presa përqué sé èz defineit nhint la couestioun perdou travai, soldi é client, quë soulusioun pouèn trouà?” o “Sëi propi nhint soudisfait, parèi peui pi nhint alà avënti, j’ai dabezounh ëd trouà ‘na soulusioun!”opura “Creiou quë è sèt istà fait ën travai propi trëscurà, quë soulusioun oum proupounè?”
Souvënt, sé t’è fourtunà, ès trëvet daboun ‘na soulusioun. Pruma ëd tout ringrasia lou chèl é poi ringrasia sè cou s’eu dounà da fa për reunì la sitouasioun dizënt “Tè istà propi gentil” o “Grasie për la pasiensi quë t’a butà” é poi “Grasie për l’ajut, t’a propi fait ën miracou, grasia bin bin” o “J’ai nhint ël parolë për ringrasiate, t’eut m’a gavà propi ën bè sagrìn”o ëncoù “Sensa ëd tè j’ou sai nhint sé srì riusì a rëngila, grasie”.
scouta
(da “lezioni on line di lingua francoprovenzale”
Progetto interreg
Regione Valle d’Aosta-Piemonte
Marzo 2012)
