La Loza i -t' inna bourjà de Graviére, a 1200 mètre, andounque , in col, ièroun li Benedetin è apré li Chertouzin. qui l' aviòn coustrouì la chapèla è le lour chelle.
Lou 26 de lulh Silvana, sa famelha è si amì von tuit a la Loza per la feta de la Madona è de Sant' Ana.
Se vèit in baroun de gen! Touit countent de alé a la pechita chapèla de la bourjà è partechipé a la mëssa, a la prouchesioun, eicouté la muzica qui soune è, apré, mingé din li prà d' antorn avéi la merenda din lou bersac. Vente speré que fazise bèl è choout senò la feta i rouinà è, apré merenda, la banda pouràt pà souné din la plasa princhipala.
Onhi an, vente que lou prioù ourganizise la feta è dounise lou pon benedèt.
In col li prioù ieroun trèi, varra a n' i èt maque pi un qu'ou nomine lou viche prioù per l'an d'apré.
Corra arive lou preiri tuit se radounoun a la chapèla avei lou prioù è sëlli vitù an coustum.
De matin, se fèit inna prouchesioun avei la statoua de Sant' Ana, d'antorn a la chapèla è din la plasa de la bourjà è, vers trei oure, se rechitoun li vepro.
Pèr mesjorn, ièt qui vèit a mingé din sa meizoun o din li prà avei la cuvèrta è li bersac.
Silvana minge avei li soi aou soulelh dezot lou malëzzou aou found de la bourjà e it an duratén de eicouté lou counchert avei si amis è de balé e chanté ansén le vielhe chansoun d'in col finca de vepro.
La Madona de la Loza l' at sempre vit, pèr li 26 de lulh, in baroun de gen qu' i vient a mandé le grasie a la Madona è a Sant'Ana, sa Mari. In col, pèr devosioun, le prouchesioun se faziòn a pìe da Suza è da Graviére. |
